Baburao Chandere: उचलून आदळलं, डोकं फोडलं; अजित पवारांच्या निकटवर्तीय अन् माजी नगरसेवकाची पुण्यात दादागिरी, कोण आहेत बाबुराव चांदेरे?

Who is Baburao Chandere: बाबुराव चांदेरे यांनी पुण्यात एका काल (शनिवारी, ता 25) नागरिकाला मारहाण केल्याची माहिती संतापजनक घटना समोर आली होती.

Who is Baburao Chandere

Source : ANI

पुणे: राष्ट्रवादी काँग्रेसचे नेते आणि उपमुख्यमंत्री अजित पवार (Ajit Pawar) यांचे निकटवर्तीय बाबुराव चांदेरे पुन्हा एकदा आपल्या वादग्रस्त कृतीने राजकीय वर्तुळात चर्चेत आले आहेत. चांदेरे  (Baburao Chandere) यांनी पुण्यात एका काल (शनिवारी, ता 25) नागरिकाला मारहाण केल्याची माहिती संतापजनक घटना समोर आली होती. या घटनेचा व्हिडिओ सोशल मिडियावरती मोठ्या प्रमाणावर व्हायरल झाला होता, मारहाण झालेल्या व्यक्तीला डोक्यावर आणि गुडघ्याला जखम झाली होती, त्यानंतर आता या प्रकरणात कारवाई करण्यात आली आहे. बाबुराव चांदेरे (Baburao Chandere) यांच्या विरोधात गुन्हा दाखल करण्यात आला आहे. पुण्यातील बावधन पोलिस ठाण्यात गुन्हा दाखल करण्यात आला आहे. दरम्यान वारंवार मारहाण आणि शिवीगाळ या घटनामुळे बाबुराव चांदेरे  (Baburao Chandere) चर्चेत येतात.

कोण आहेत बाबुराव चांदेरे?

बाबुराव चांदेरे राष्ट्रवादी काँग्रेसकडून तीन टर्म नगरसेवक राहिले आहेत. अजित पवारांचे निकटवर्तीय म्हणूनही त्यांची ओळख आहे. कबड्डी क्षेत्रात गेली 35 ते 40 वर्षाचा त्यांना प्रदीर्घ अनुभव आहे, त्यांच्यावर राज्य कबड्डी संघटनेच्या सरकार्यवाह पदाची जबाबदारी आहे.दरम्यान मिळालेल्या माहितीनुसार, 1986 मध्ये त्यांच्या लग्नानंतर त्यांनी त्यांचे सासरे मारुतराव धनकुडे यांच्यासोबत राजकारणात प्रवेश केला. त्यांचे सासरे शरद पवार यांच्या जवळचे असल्याने बाबूरावांना राजकारण समजलं. काम करत असतानाच चांदेरे उपमुख्यमंत्री अजित पवार यांच्या संपर्कात आले. कब्बडी प्रेमी असल्याने त्याने खेळातही मोठे योगदान दिले आहे. सतेज कबड्डी संघाची स्थापना त्यांनी केली आहे. सध्या पुण्यात बाबुराव चांदेरे  (Baburao Chandere) सोशल फाउंडेशन आणि बाणेर संघ कबड्डी खेळतात. त्यांचा मुलगा समीर चांदेरे राष्ट्रवादी काँग्रेस अजित पवार पक्षाचा पुणे शहराचा राष्ट्रवादी युवक अध्यक्ष आहे. मात्र, वेळोवेळी मारहाण शिवीगाळ केल्याच्या वादग्रस्त घटनांमुळे बाबुराव चांदेरे चर्चेत आलेले आहेत. 

आत्तापर्यंत तीन घटनेमुळे चर्चेत 

१) काही महिन्यांपुर्वी चांदेरे यांनी एका रिक्षाचालकाला शिवीगाळ करत मारहाण केली होती, त्याचा व्हिडिओ मोठ्या प्रमाणावर व्हायरल झाला होता.
२) कबड्डी स्पर्धेमध्ये त्यांनी बालेवाडी येथे पंचांवरती शिवीगाळ करत हात उचलला होता, त्यावेळी देखील ते चर्चेत आले होते.
3) आता पुन्हा एकदा जमिनीच्या वादातून चांदेरे यांनी एका व्यक्तिला मारहाण केली आहे, त्यामुळे ते पुन्हा एकदा चर्चेत आले आहेत

बाबुराव चांदेरे यांनी काल (शनिवारी, ता 25) विजय रौंदळ या नागरिकाला मारहाण केल्याचा व्हिडिओ व्हायरल झाला होता. जमिनीच्या वादातून चांदेरे यांनी विजय यांना चापट मारत उचलून आदळले असल्याचा हा व्हिडिओ व्हायरल झाला होता. त्यानंतर त्यांच्यावर बावधान गुन्हा दाखल झाला आहे. आत्तापर्यंत वादग्रस्त घटनेमुळे ते वारंवार चर्चेत राहिले आहेत.

जमिनीच्या वादातून ही मारहाण

हा संपूर्ण प्रकार जमिनीच्या वादातून घडला असल्याची माहिती समोर आली आहे. यावेळी बाबुराव चांदेरे यांनी नागरिकाला चापट मारली आणि त्यानंतर त्याला उचलून खाली आपटलं. यामध्ये त्यांच्या डोक्याला व गुडघ्याला गंभीर दुखापत झाली आहे. चांदेरे यांनी नागरिकाला मारहाण करत त्यांचा फोन काढून घेण्याचा प्रयत्न केला. यामध्ये विजय रौंदळ यांच्या डोक्याला व गुडघ्याला जखम झाली आहे.

अजित पवारांची प्रतिक्रिया काय?

प्रतिक्रिया देताना अजित पवार म्हणाले की, जे झालं ते अतिशय चुकीचं आहे. कोणालाही अशा प्रकारे कायदा हातामध्ये घेता येत नाही. त्यांना फोन केला होता, त्यांचा फोन बंद आहे. त्यांच्या मुलाशी बोलून सांगितलं आहे. की, जो प्रकार झाला आहे, ते मला आवडलं नाही. राष्ट्रवादी काँग्रेस पक्षात असे प्रकार खपवून घेतले जाणार नाहीत. त्याला बोलून याचा जाब विचारणार आहे. तक्रार दिली तर नक्की कारवाई होणार असल्याचंही अजित पवारांनी यावेळी म्हटलं आहे.