ज्येष्ठ अभिनेत्री शबाना आझमी कार अपघातात जखमी

शबाना आझमी यांच्या कारला मुंबई पुणे महामार्गावर अपघात झाला आहे. अपघात झाला त्यावेळी जावेद अख्तर हे देखील कारमध्ये उपस्थित होते.

पिंपरी : ज्येष्ठ अभिनेत्री शबाना आझमी या कार अपघातात जखमी झाल्या आहेत. मुंबई-पुणे द्रुतगती महामार्गावर खालापूर टोलनाक्याजवळ त्यांचा अपघात झाला आहे. अपघात झाला त्यावेळी शबाना आझमी यांचे पती ज्येष्ठ गीतकार जावेद अख्तर हे त्यांच्याच मागे असलेल्या कारमध्ये होते.

अपघातात शबाना आझमी यांच्या नाकाला आणि तोंडाला मार लागला आहे. त्यानंतर त्यांना तातडीने पनवेल जवळील एमजीएम रुग्णालयात दाखल करण्यात आलं असून त्यांच्यावर उपचार सुरु आहेत. शबाना आझमी यांच्या गाडीने ट्रकला मागून धडक दिल्याने हा अपघात झाला. शबाना आझमी मुंबईहून लोणावळा येथे जात होत्या त्यावेळी दुपारी 4 वाजण्याच्या सुमारास हा अपघात झाला आहे. लोणावळ्याला कार्यक्रमानिमित्त की विकएंडसाठी निघाले होते हे अद्याप समजू शकलेले नाही.

शबाना आझमी आणि जावेद अख्तर मुंबईतून काही दिवसांसाठी खंडाळा येथे जात होते. खंडाळ येथे त्यांचा बंगला आहे. जावेद अख्तर यांचा 75 वा वाढदिवस 17 जानेवारी रोजी वांद्रे येथील ताज लँड्स हॉटेलमध्ये साजरा करण्यात आला. जावेद अख्तर यांच्या वाढदिवस पार्टीमध्ये बॉलिवूडमधील अनेक सेलिब्रिटींनी हजेरी लावली होती. शाहरुख खान, गौरी खान, दीपिका पदुकोण, कटरिना कैफ, करण जौहर यांच्यासह अनेकजण या पार्टीत सहभागी झाले होते. 16 जानेवारीला शबाना आझमी आणि जावेद अख्तर यांनी आपल्या जुहू येथील घरी वाढदिवस साजरा केला होता. या पार्टीत रेट्रो थिममध्ये सर्व कलाकाम मंडळी पोहोचले होते. जावेद अख्तर आणि शबाना आझमी हे देखील रेट्रो लूकमध्ये दिसले. गेल्या काही दिवसात शबाना आझमी आणि जावेद अख्तर यांची मोठी धावपळ झाली होती. त्यामुळे खंडाळा येथील आपल्या घरी काही दिवस आराम करण्यासाठी ते जात असताना आज अपघात झाला. संबंधित बातम्या PHOTO | ज्येष्ठ अभिनेत्री शबाना आझमी यांच्या कारला मुंबई-पुणे एक्स्प्रेस वेवर अपघात