Vidhan parishad Election 2024 : काँग्रेस आमदारांचं विधान परिषद निवडणुकीत क्रॉस व्होटिंग? विजय वडेट्टीवार म्हणाले...
Maharashtra Vidhan parishad Election 2024 : विधान परिषद निवडणुकीत काँग्रेसचे आमदार क्रॉस व्होटिंग करणार असल्याची चर्चा आहे. यावर विरोधी पक्षनेते विजय वडेट्टीवार यांनी वक्तव्य केले आहे.
Maharashtra Vidhan parishad Election 2024 : आज विधान परिषदेच्या (Legislative Council Election) 11 जागांसाठी मतदान होणार असून 12 उमेदवार निवडणुकीच्या रिंगणात उतरले आहेत. त्यामुळे या निवडणुकीत एका उमेदवाराचा पराभव होणार आहे. त्यातच विधान परिषद निवडणुकीत काँग्रेसचे (Congress) आमदार क्रॉस व्होटिंग करणार असल्याची चर्चा आहे. अजित पवारांच्या राष्ट्रवादीने (NCP Ajit Pawar Camp) काँग्रेसचे 4 आमदार आणि भाजपने (BJP) काँग्रेसचे 4 आमदार फोडल्याचे बोलले जात आहे. मात्र या चर्चा आता विरोधी पक्षनेते विजय वडेट्टीवार (Vijay Wadettiwar) यांनी फेटाळल्या आहेत.
विधान परिषद निवडणुकीसाठी महाविकास आघाडीकडून शिवसेना ठाकरे गटाने मिलिंद नार्वेकर, काँग्रेसने प्रज्ञा सातव, तर शेकापचे जयंत पाटील यांना उमेदवारी देण्यात आली आहे. महायुतीकडून भाजपच्या पंकजा मुंडे, योगेश टिळेकर, डॉ. परिणय फुके, अमित गोरखे, सदाभाऊ खोत या पाच जणांना उमेदवारी देण्यात आली आहे. राष्ट्रवादी अजित पवार गटाकडून राजेश विटेकर आणि शिवाजीराव गर्जे निवडणुकीच्या रिंगणात असून शिवसेना शिंदे गटाने माजी खासदार भावना गवळी आणि कृपाल तुमाने यांना उमेदवारी दिली आहे.
आमचे आमदार फुटणार हे कुठून आणलं?
काँग्रेस आमदार विधान परिषद निवडणुकीत क्रॉस व्होटिंग करणार का? अशी विचारणा केली असता विजय वडेट्टीवार म्हणाले की, मतदानाला सुरुवात झाली आहे. आमचे नऊ आमदार फुटणार हे कुठून आणलं? गैरसमज करण्याचे धंदे अजूनही बंद झाले नाहीत. आमचे आमदार हलवण्याची वेळ आली नाही. ज्यांना मतं फुटतील अशी भिती आहे त्यांनी आमदारांना हॉटेलला ठेवले. आमचे तीनही उमेदवार निवडून येणार आहेत. जे आमदार बोलले ते आमच्या सोबत होते. त्यांचा गैरसमज झाला आहे. हवा आमच्या बाजूने आहे, असे त्यांनी म्हटले आहे.
असे आहे पक्षीय बलाबल
महायुतीमध्ये भाजपचे 103, शिवसेनेचे 40 आणि राष्ट्रवादीचे 40 आमदार आहेत. महायुतीमध्ये महाराष्ट्र नवनिर्माण सेनेचा (मनसे) 1 आमदार, बहुजन विकास आघाडी 2 आमदार असलेल्या एनडीएचा भाग आहे. प्रहार जनशक्ती पक्ष 1, इतरांसह, महायुतीचा वाटा 203 वर आहे. महाविकास आघाडीकडे काँग्रेस (37), शिवसेना ठाकरे गट (16), राष्ट्रवादी शरद पवार गट (12), समाजवादी पक्ष (2), भारतीय कम्युनिस्ट पार्टी (मार्क्सवादी) (1) आणि शेतकरी आणि कामगार पक्ष अशा 69 आमदारांचा पाठिंबा आहे.
इतर महत्वाच्या बातम्या
महत्त्वाच्या बातम्या
ट्रेंडिंग न्यूज
