Nashik Loksabha : नाशिकमधून राजाभाऊ वाजे ठाकरे गटाचे उमेदवार, महायुतीचा उमेदवार कोण?
Shiv Sena UBT Candidate List : ठाकरे गटाने राजाभाऊ वाजे यांना नाशिकमधून निवडणुकीच्या रिंगणात उतरवलं आहे. तर दुसरीकडे महायुतीचा नाशिक लोकसभा मतदारसंघाचा उमेदवार अद्याप ठरलेला नाही.
मुंबई : शिवसेना उद्धव बाळासाहेब ठाकरे (Shivsena UBT Candidates) पक्षाने लोकसभा निवडणुकीसाठी उमेदवारांची पहिली यादी जाहीर केली आहे. ठाकरे गटाकडून 17 उमेदवारांची यादी जाहीर करण्यात आली आहे. ठाकरे गटाने नाशिक मतदारसंघातून राजाभाऊ वाजे यांना लोकसभेची उमेदवारी जाहीर केली आहे. गेल्या काही दिवसांपासून नाशिक (Nashik Politics) जिल्ह्याला राजकारणात अनेक घडामोडी घडताना दिसत आहे. महायुतीमध्ये नाशिकच्या जागेचा तिढा अद्याप कायम असताना ठाकरे गटाने आपला खंदा शिलेदार मैदानात उतरवला आहे.
नाशिकमधून राजाभाऊ वाजे ठाकरे गटाचे उमेदवार
बहुप्रतिक्षित अशी ठाकरे गटाच्या उमेदवारांची यादी अखेर जाहीर झाली आहे. ठाकरे गटाने मराठा आणि संयमी चेहरा राजाभाऊ वाजे यांना निवडणुकीच्या रिंगणात उतरवलं आहे. तर दुसरीकडे महायुतीचा नाशिक लोकसभा मतदारसंघाचा उमेदवार अद्याप ठरलेला नाही. महायुतीकडून राष्ट्रवादी अजित पवार गट लढणार असल्याचा निर्णय झाल्याची सुत्रांची माहिती आहे. मात्र, असं असलं तरी शिंदे गटाचे नाशिकचे खासदार हेमंत गोडसे हे लोकसभा निवडणुक लढण्यापासून माघार घेण्यास तयार नाहीत. हेमंत गोडसे यांनी नाशिक मतदारसंघावर दावा ठोकला आहे.
महायुतीचा उमेदवार कोण?
यासोबतच छगन भुजबळ यांच्याकडूनही अजित पवारांवर दबाब वाढवण्यात येत असल्याची माहिती सुत्रांकडून समोर येत आहे. एकीकडे नाशिकची जागा महायुती अजित पवार गटाला सोडण्याचं नक्की झाल्यानंतरही शिंदे गटाचे हेंमंत गोडसे मागे हटायला तयार नाहीत. दुसरीकडे नाशिक लोकसभा मतदारसंघासाठी राष्ट्रवादी काँग्रेसकडून समीर भुजबळ (Sameer Bhujbal) आणि छगन भुजबळ यांची नावे नावे चर्चेत आहेत. महायुतीत आधीच भाजप आणि शिंदे गटात नाशिकच्या जागेवरून रस्सीखेच सुरु आहे. त्यातच नाशिकमधून लोकसभेच्या तिकीटासाठी छगन भुजबळ यांच्याकडून दबाव वाढवण्यात येत असल्याची माहिती आहे.
राजाभाऊ वाजे यांना लोकसभेचं तिकीट
नाशिक लोकसभा मतदारसंघातून उद्धव बाळासाहेब ठाकरे गटाने राजाभाऊ वाजे यांना लोकसभेचं तिकीट दिलं आहे. राजाभाऊ वाजे सिन्नर विधानसभा मतदारसंघाचे माजी आमदार आहे. ठाकरेंनी मराठा चेहऱ्यावर विश्वास दाखवला आहे. संयमी शांत नेता आणि मराठा चेहरा अशी राजाभाऊ वाजे यांची ओळख आहे. 2014 च्या विधानसभा निवडणुकीत राजाभाऊ वाजे पहिल्यांदा आमदार झाले होते.
राजाभाऊ वाजेंना संधी देण्यामागचं कारण काय?
राजाभाऊ वाजे हे कट्टर शिवसैनिक म्हणून ओळखले जातात. सिन्नर विधानसभा मतदारसंघातील दीड लाख मते राजाभाऊंकडे आहेत. यासोबतच इगतपुरी ग्रामीण भागातील संपर्काचा विचार करून त्यांचे नाव निश्चित करण्यात आल्याची माहिती आहे.
महत्त्वाच्या इतर बातम्या :
Shiv Sena UBT Canditates: शिवसेना ठाकरे गटाकडून 17 उमेदवारांची यादी जाहीर; कोणत्या मतदारसंघातून कोणता उमेदवार?
महत्त्वाच्या बातम्या
