Maharashtra Politics: पालकमंत्री, जनता दरबार ते शिवसेनेचा 'नवा उदय', एकनाथ शिंदेंना डिवचण्याचा महायुतीचाच डाव?
मुख्यमंत्रीपद सोडावं लागल्यानंतर शिंदे यांचा नाराजीचा सूर सातत्याने चर्चेत राहिला. नंतर राजकीय समिकरणं इतकी बदलली की उपमुख्यमंत्री एकनाथ शिंदें राजकारणातून बाहेर फेकले जात असल्याच्या चर्चा रंगू लागल्या आहेत.
Maharashtra Politics: महाराष्ट्राच्या राजकारणात वेगाने हालचाली सुरू आहेत. मुख्यमंत्री पदावरून थेट उपमुख्यमंत्री पदावर आलेल्या एकनाथ शिंदे (Eknath Shinde) यांना सत्तेतील मित्र पक्षांकडूनच अडचणी येत असल्याची चर्चा रंगली आहे. लोकसभा निवडणुकीनंतर लोकसभा निवडणुकीनंतर समीकरणं बदलली असून, त्याचा फटका शिंदेंना बसत असल्याचं बोललं जात आहे. विधानसभेनंतर राजकीय समिकरणं इतकी बदलली आहेत की उपमुख्यमंत्री एकनाथ शिंदें राजकारणातून बाहेर फेकले जात असल्याच्या चर्चा रंगू लागल्या आहेत. पालकमंत्रीपद, जनता दरबार ते शिवसेनेतला 'नवा उदय'अशा चर्चांनी एकनाथ शिंदेंना डिवचण्याचा प्रयत्न सुरु असल्याची चर्चा आहे. (Politics)
मुख्यमंत्रीपद सोडावं लागल्यानंतर शिंदे यांचा नाराजीचा सूर सातत्याने चर्चेत राहिला. दिल्लीच्या फेऱ्या वाढल्या, संपर्क होत नाही, या चर्चांदरम्यानच गिरीश महाजन थेट त्यांच्या घरी जाऊन भेटले. त्यानंतर शिंदेंनी पत्रकार परिषद घेतली, पण त्यांचं समाधान झालं का, हा प्रश्न कायम राहिला. मंत्रिमंडळ विस्तारातही त्यांना फारसं महत्त्व मिळालं नाही. शिवसेनेच्या माजी मंत्र्यांना संधी दिली नाही, गृहमंत्रीपद फडणवीसांकडेच राहिलं, महसूल आणि सार्वजनिक बांधकाम खातंही भाजपने स्वतःकडेच ठेवलं. रायगड आणि नाशिकच्या पालकमंत्रीपदावर राष्ट्रवादीच्या नेत्यांची वर्णी लागली, आणि शिंदेंच्या मावळ्यांचा पत्ता कट झाला. (Gurdian Minister)
‘नवा उदय’ आणि शिंदेंभोवती राजकीय संकट?
उद्योगमंत्री उदय सामंत हे मुख्यमंत्र्यांसह दावोस दौऱ्यावर गेले आणि शिवसेनेत ‘नवा उदय’ होणार असल्याच्या चर्चांनाही उधाण आलं. सामंत हे 20 आमदारांसह वेगळा गट काढणार का? अशा चर्चा राजकीय वर्तुळात चांगल्याच रंगल्या. यावर सामंत यांनी परदेशातूनच खुलासा करत चर्चांना पूर्णविराम द्यायचा प्रयत्न केला, पण शिंदेंना मात्र या चर्चांमधून चांगलंच डीवचण्यात आलं.
कालच्या कॅबिनेट बैठकीला शिंदे ऑनलाइन हजर होते. यावरूनही राजकीय चर्चांना उधाण आलं. ‘शिंदे मागे का?’ हा प्रश्न विचारला जातोय. यातच भाजपचे ज्येष्ठ नेते आणि पालघरचे पालकमंत्री गणेश नाईक यांनी ठाण्यात जनता दरबार घेणार असल्याचं जाहीर केलं. भाजप आता ठाण्यातही शिंदेंना आव्हान देणार का, हा मोठा प्रश्न निर्माण झाला आहे.
अजित पवारांचा नवा डाव?
त्यातच अजित पवार यांनी मंत्रालयात ठाण मांडला, विरोधी पक्षनेते अंबादास दानवे यांची भेट घेतली. मात्र पण रायगडच्या शिवसेनेच्या दोन आमदारांना आणि एका मंत्र्याला भेट दिली नाही. शिंदेंवर दबाव वाढवण्यासाठीच हा नवा राजकीय डाव असल्याचं बोललं जातंय. शिंदेंभोवतीचा तणाव वाढत आहे. भाजपने ठाण्यात वेगळीच खेळी सुरू केलीय. आता हे वाद किती वाढतात आणि शिंदे त्यातून कसे बाहेर पडतात, हे पाहणं महत्त्वाचं ठरणार आहे.
हेही वाचा:
महत्त्वाच्या बातम्या
