India-China Clash: तवांग संघर्षावरून संसदेत गदारोळ, सोनिया गांधींच्या नेतृत्वात विरोधकांनी केला सभात्याग

Lok Sabha Session: अरुणाचल प्रदेशातील (Arunachal Pradesh) तवांग येथे भारत आणि चीनच्या सैनिकांमध्ये झालेल्या चकमकीच्या मुद्द्यावरून बुधवारी लोकसभेत गदारोळ झाला.

Congress MPs stage a walkout from Lok Sabha

Lok Sabha Session: अरुणाचल प्रदेशातील (Arunachal Pradesh) तवांग येथे भारत आणि चीनच्या सैनिकांमध्ये झालेल्या चकमकीच्या मुद्द्यावरून बुधवारी लोकसभेत गदारोळ झाला. काँग्रेसच्या माजी अध्यक्षा आणि खासदार सोनिया गांधी (Sonia Gandhi) यांच्या नेतृत्वाखाली काँग्रेस लोकसभा खासदार आणि तृणमूल काँग्रेस (TMC) खासदारांनी सभात्याग केला. भारत-चीन सीमा मुद्द्यावर चर्चेची मागणी विरोधक करत होते. बुधवारी प्रश्नोत्तराचा तास संपताच काँग्रेस नेते अधीर रंजन चौधरी यांनी भारत-चीन सीमा परिस्थितीवर चर्चेची मागणी केली.

अधीर रंजन चौधरी म्हणाले की, माजी पंतप्रधान पंडित जवाहरलाल नेहरू यांनी 1962 मध्ये लोकसभेत भारत-चीन युद्धावर चर्चा करण्यास परवानगी दिली होती. ते म्हणाले की, आम्ही भारत-चीन सीमा परिस्थितीवर चर्चेची मागणी करत आहोत. 1962 मध्ये जेव्हा भारत-चीन युद्ध सुरू झाले तेव्हा जवाहरलाल नेहरूंनी 165 खासदारांना या सभागृहात बोलण्याची संधी दिली. यानंतर आपण काय करायचे ते ठरले.

अधीर रंजन चौधरी यांच्या मागणीला उत्तर देताना लोकसभा अध्यक्ष ओम बिर्ला म्हणाले की, व्यवसाय सल्लागार समितीच्या बैठकीत यावर निर्णय घेतला जाईल. ओम बिर्ला यांनी सभागृहाचे कामकाज सुरू होताच, काँग्रेस आणि टीएमसीने निषेधार्थ सभात्याग केला आणि भारत-चीन सीमा मुद्द्यावर चर्चा होऊ न दिल्याचा आरोप सरकारवर केला. टीएमसी खासदार सुदीप बंदोपाध्याय यांनीही सभागृहात चर्चेची मागणी केली आणि म्हणाले की, त्यांच्या पक्षाचे सदस्य सरकारच्या वृत्तीच्या निषेधार्थ सभात्याग करत आहेत.

#ParliamentWinterSession | Congress MPs stage a walkout from Lok Sabha after being denied discussion on China. Adhir Ranjan Chowdhury and Sonia Gandhi lead the walk out.

— ANI (@ANI) December 14, 2022

याआधीही विरोधी पक्षाच्या खासदारांनी केला होता सभात्याग 

मंगळवारीही विरोधी पक्षांच्या खासदारांनी विविध मुद्यांच्या निषेधार्थ लोकसभेतून सभात्याग केला होता. सभागृहाचे कामकाज सुरू होताच काँग्रेस आणि द्रमुकच्या खासदारांना काही मुद्दे उपस्थित करायचे होते. यावर लोकसभा अध्यक्ष म्हणाले की, प्रश्नोत्तराचा तास महत्त्वाचा असून तो तुमच्यासाठीच आहे. यानंतर ही विरोधी पक्षाचे खासदार आपले मुद्दे उपस्थित करण्याचे प्रयत्न करत होते. यानंतर काँग्रेस, द्रमुक, राष्ट्रवादी काँग्रेस आणि नॅशनल कॉन्फरन्ससह अन्य पक्षांच्या खासदारांनी प्रश्नोत्तराच्या तासात सभात्याग केला.