Chhagan Bhujbal and Sharad Pawar : पुण्यातील कार्यक्रमाला छगन भुजबळ उशीरा आले, शरद पवारांना दीड तास ताटकळत बसावं लागलं

Chhagan Bhujbal and Sharad Pawar, Pune : पुण्यातील चाकण बाजार समिती परिसरात सावित्रीबाई फुले यांच्या पुतळ्याचे अनावरण करण्यात आले.

Photo Credit - abp majha reporter

Source : ABPLIVE AI

Chhagan Bhujbal and Sharad Pawar, Pune : पुण्यातील (Pune) चाकण बाजार समितीमध्ये आज (दि.3) सावित्रीबाई फुले यांच्या पुतळ्याचा अनावरण सोहळा पार पडला. यावेळी राष्ट्रवादीचे सर्वेसर्वा शरद पवार (Sharad Pawar) आणि माजी मंत्री छगन भुजबळ (Chhagan Bhujbal) उपस्थित होते. यावेळी शरद पवारांनी  (Sharad Pawar)  छगन भुजबळांना (Chhagan Bhujbal) पत्रिकेवर एक लिखित संदेश दिला, त्यानंतर दोघांमध्ये काही सेकंदाचा संवाद ही झाला अन् दोघे एकमेकांकडे हसू ही लागले. हे सगळं घडलं महात्मा फुले आणि सावित्रीबाई फुलेंच्या पूर्णाकृती पुतळ्याचं अनावरण सोहळ्यात पाहायला मिळालं. 

सावित्रीबाई फुलेंच्या पुतळा अनावरण सोहळ्यात पवार -भुजबळ एकत्र 

दरम्यान, चाकण बाजार समितीच्या प्रवेशद्वारावर पुतळ्याचा अनावरण सोहळा पार पडला. यावेळी व्यासपीठावर शरद पवार आणि छगन भुजबळ हे दोघेही 5 वाजून 45 मिनिटांनी पोहचले. सावित्रीबाई फुलेंच्या पुतळ्याचं अनावरण पवारांच्या हस्ते पार पडणार होतं. तर या कार्यक्रमाच्या अध्यक्षस्थानी माजी मंत्री छगन  भुजबळ होते. त्यामुळं मंचावर दोघे एकमेकांच्या बाजूला बसले होते. 

छगन भुजबळ तब्बल दीड तास उशिरा आले, शरद पवारांना दीड तास ताटकळत बसावं लागलं

मात्र मंचावर आल्यापासून दोघांनी एकमेकांकडे पाहणं ही टाळलं होतं. मुळातच शरद पवार हे या कार्यक्रमासाठी चार वाजताच पोहचले होते. मात्र,भुजबळ तब्बल दीड तास उशिरा आल्यानं पवारांना दीड तास ताटकळत बसावं लागल्याचं पाहायला मिळालं. त्यामुळं वेळेला महत्व देणाऱ्या पवारांना साहजिकच थोडा का होईना राग आला असेल याची कल्पना छगन भुजबळांना होतीच. त्यामुळं मंचावर आल्यापासून भुजबळांनी ही बोलणं टाळलं. मात्र त्याचवेळी पवारांनी पत्रिकेवर दोन ओळी मजकूर लिहिला. मग भुजबळांच्या हातातील पत्रिका काढून घेतली अन् स्वतःच्या हातातील पत्रिका त्यांच्या हातात सोपवली. मग पवारांनी भुजबळांना खुणावले अन वीस मिनिटांनी दोघांमध्ये काही सेकंद संवाद झाला. त्यानंतर दोघे एकमेकांकडे पाहून हसले ही. मंचावरील या घडामोडींमुळं राजकीय वर्तुळात चर्चा रंगलेल्या आहेत.

छगन भुजबळ काय काय म्हणाले?

छगन भुजबळ म्हणाले, मागे मी पवार साहेबांशी चर्चा केली. अनेक जण म्हणतात फुलेंना भारतरत्न दिले पाहिजे. मी साहेबांना विचारलं महात्मा मोठं की भारतरत्न मोठं? मुळात भारतरत्न किती अन महात्मा किती आहेत? अहो महात्मा गांधींनी ही म्हटलं ज्योतिबा फुले हे खरे महात्मा आहेत. जसं की छत्रपती शिवाजी महाराज हे एकमेव तसं महात्मा म्हटलं की सगळं आलं.

इतर महत्त्वाच्या बातम्या