अजित दादांच्या मातोश्री म्हणाल्या पवार कुटुंब एकत्र यावं; अमोल मिटकरींनी घेतलं 2 नेत्यांचं नाव, ज्यांचा आहे विरोध

पवार कुटुंबं एकत्र यावेत, असं अजित पवारांच्या मातोश्री आशाताई पवारांनी विठूरायाला साकडं घातल्याचं माध्यमांसमोर बोलतांना म्हटलंय.

Amol mitkari on Ajit pawar and sharad pawar collabs

Source : abp

मुंबई : राज्याच्या राजकारणात गेल्या 5 वर्षात अनेक भूकंप पाहायला मिळाले. त्यामध्ये, शिवसेना पक्षात झालेली फूट, त्यानंतर अजित पवारांनी बंड करुन शरद पवारांची सोडलेली साथ. याशिवाय राष्ट्रवादी काँग्रेस (NCP) पक्षावर दावा करत थेट पक्षाची कायदेशीर मान्यता मिळवण्यातही ते यशस्वी ठरले होते. मात्र, विधानसभा निवडणुकांच्या निकालात घवघवीत यश मिळाल्यानंतर आता अजित पवारांच्या (Ajit pawar) राष्ट्रवादीकडे इतरही आमदारांचा कल वाढल्याचं दिसून येत आहे. शरद पवारांच्या 10 आमदारांचेही अजित पवार गटाशी मिळते जुळते वातावरण पाहायला मिळत आहे. त्यामुळे, दोन्ही राष्ट्रवादी पुन्हा एकत्र होणार का, अशी चर्चा राजकीय वर्तुळात रंगत आहे. त्यातच, उपमुख्यमंत्री अजित पवारांच्या मातोश्री यांनी पवार कुटुंब एकत्र व्हावं, अशी प्रार्थनाच आज पंढरीच्या पांडुरंगाकडे केली आहे. त्यानंतर, राष्ट्रवादीचे प्रवक्ते व आमदार अमोल मिटकरी (Amol Mitkari) यांनीही या वक्तव्यावर प्रतिक्रिया दिली आहे. 

पवार कुटुंबं एकत्र यावेत, असं अजित पवारांच्या मातोश्री आशाताई पवारांनी विठूरायाला साकडं घातल्याचं माध्यमांसमोर बोलतांना म्हटलंय. या संदर्भात राष्ट्रवादीचे आमदार अमोल मिटकरी प्रतिक्रिया दिली. रोहित पवार आणि जितेंद्र आव्हाड हे दोन नेते पवार कुटुंब एकत्र येण्यासाठी अडथळा ठरतायेत. या दोघांनाही पवार कुटुंब एकत्र यावं, असं वाटत नसल्याचं मिटकरी यांनी म्हटलं. आशाताईंनी व्यक्त केलेल्या भावना आमच्यासारख्या कार्यकर्त्यांच्या भावना आहेत. शेवटी पवार कुटुंबातील वरिष्ठ लोक यावर एकत्र येण्यावर निर्णय घेतील असेही मिटकरी यांनी एबीपी माझाशी बोलताना म्हटले.

अमोल मिटकरींचा नवा संकल्प

दरम्यान, 2024 हा काळ राष्ट्रवादीसाठी अतिशय संघर्षाचा काळ होता. पण अजितदादांनी आपलं अस्तित्व सिद्ध करून दाखवलं. आता 2025 हे वर्ष राष्ट्रवादीसाठी महत्त्वाचं असणार आहे. 2025 डिसेंबरपर्यत अजितदादांचं नेतृत्व महाराष्ट्रात आणखी ठळकपणे समोर येणार असल्याचे मिटकरी यांनी म्हटले. दरम्यान, आपण भूतकाळातील आपल्या चुका सावरत नवीन वर्षात काम करणार असल्याचा संकल्प त्यांनी व्यक्त केलाय. मात्र, अमोल मिटकरी यांनी थेट शरद पवारांच्या राष्ट्रवादीतील दोन नेत्यांचे, दोन आमदारांचे नाव घेऊन पवार कुटुंब एकत्र येण्यास हे दोनच नेते कारणीभूत ठरत असल्याचे म्हटले आहे. त्यामध्ये, रोहित पवार हे पवार कुटुंबातीलच आहेत. तर, जितेंद्र आव्हाड हे शरद पवारांना पितृतुल्य मानतात. त्यामुळे, मिटकरी यांच्या दाव्यावर आता शरद पवारांच्या राष्ट्रवादीतून काय प्रतिक्रिया येते हे पाहावे लागेल. 

हेही वाचा