Nagpur News: डॉक्टरांचा निष्काळजीपणा भोवला? पत्नी, नवजात बाळाचा मृत्यूनंतर पतीची हायकोर्टात धाव

डॉक्टरांच्या निष्काळजीपणाने नवजात बालक आणि पत्नीचा मृत्यू झाल्याचा आरोप करत पतीने हायकोर्टात याचिका दाखल केली आहे.

डॉक्टरांच्या निष्काळजीपणा भोवला? पत्नी, नवजात बाळाचा मृत्यूनंतर पतीची हायकोर्टात धाव

Nagpur News : डॉक्टरांच्या निष्काळजीपणामुळे पत्नी आणि नवजात बाळाचा मृत्यू झाल्याचा आरोप करत पतीने हायकोर्टात याचिका दाखल केली आहे. नवजात बाळ पुरूष लिंगाचे असले तरी कागदोपत्री ते स्त्री लिंगी असल्याचे नोंदवण्याचा आरोप करण्यात आला. डॉक्टरांच्या कार्यपद्धतीवर तीव्र (complaint against doctor) आक्षेप घेत मृती पत्नीचे पती हर्षद टोपरे यांनी मुंबई उच्च न्यायालयाच्या नागपूर खंडपीठात (Bombay High Court Nagpur Bench) याचिका दाखल केली आहे. न्यायमूर्ती सुनील शुक्रे आणि न्यायमूर्ती एम. डब्ल्यू. चांदवानी यांनी वैद्यकीय रुग्णालय, प्रादेशिक न्यायवैद्यक विज्ञान प्रयोगशाळा, अभियोग रुग्णालय, हेल्थ सिटी चिल्ड्रन हॉस्पिटल आणि इतरांना नोटीस बजावून उत्तर दाखल करण्याचे आदेश दिले आहेत. याचिकाकर्त्याच्या वतीने अॅड. कौशल त्रिवेदी आणि सरकारी पक्षातर्फे अतिरिक्त सरकारी वकील केतकी जोशी यांनी बाजू मांडली.

डॉक्टरांनीच दाखवले होते बाळ 

याचिकाकर्त्यानुसार, गर्भवती पत्नीला प्रसूतीसाठी अभियोग रुग्णालयात दाखल करण्यात आले होते. 8 जुलै 2020 रोजी तिने बाळाला जन्म दिला. ऑपरेशन थिएटरमधून बाहेर आलेले डॉ. हर्षल इंगोले यांनीच त्यांना मुलगा झाल्याचे सांगितले. मात्र त्याला श्वासोच्छवासाचा त्रास होत असल्याने इनक्युबेटरमध्ये ठेवण्यात आल्याची माहिती दिली.डॉ. हंगोले यांनी हर्षद यांना बोलावून नवजात बाळ दाखविले होते. प्रसुती दरम्यान मुलाला काही अंतर्गत जखमा झाल्या. त्यामुळे त्याला हेल्थ सिटी चिल्ड्रन हॉस्पिटलमध्ये दाखल करावे लागणार असल्याचेही सांगितले होते. त्याच दिवशी सकाळी 8.15 वाजता मुलाला अन्य रुग्णालयात हलवण्यात आले. मुलाच्या जन्मानंतर रुग्णालयात पोहोचलेल्या कुटुंबीयांना डॉक्टरांनीसुद्धा तीच माहिती दिली होती.

प्रसुत मातेचीही प्रकृतीही खालावली

अॅड. कौशल त्रिवेदी यांनी सांगितले की, सकाळी 9.15 वाजता याचिकाकर्त्याच्या पत्नीला ऑपरेशन थिएटरमधून बाहेर आणण्यात आले. त्याला बाहेर आणताच डॉक्टरांनी नातेवाईकांना सांगितले की, पेशंटचे (पत्नीचे) मोठ्याप्रमाणावर रक्तस्राव झाला आहे. परिस्थिती हाताबाहेर जात असल्याने त्यांना तातडीने दुसऱ्या रुग्णालयात हलवण्यात आले आहे. एकीकडे मुलगा दुसऱ्या रुग्णालयात तर दुसरीकडे पत्नीलाही दुसऱ्या रुग्णालयात दाखल करण्यात आले. याचिकाकर्ता पत्नीसोबत होता. त्याला फोनवरून मुलाच्या मृत्यूची माहिती देण्यात आली. त्यांनी कुटुंबियांसह तातडीने बाल रुग्णालय गाठले. 9 जुलै रोजी मुलावर अंत्यसंस्कार करण्यात आले. त्याच दिवशी दुपारी एक वाजण्याच्या सुमारास हर्षद यांना पत्नीच्या निधनाची बातमी समजली.

अंत्यसंस्कारानंतर 13 जुलै रोजी याचिकाकर्ता मुलाचे मृत्यू प्रमाणपत्र घेण्यासाठी रुग्णालयात पोहोचले. डॉक्टरांनी दिलेल्या कागदपत्रांमध्ये मुलाऐवजी 'मुलगी' असा उल्लेख आढळल्याने याचिकाकर्ते चक्रावून गेले. या संदर्भात बराच वाद झाला, त्यानंतर मुलाला दफन केलेल्या ठिकाणाहून बाहेर काढण्यात आले आणि डीएनए टेस्ट करण्यात आली. पण याचिकाकर्त्याला न्याय मिळाला नाही. त्यामुळे उच्च न्यायालयात याचिका दाखल केली आहे.

ही बातमी देखील वाचा