Shivsena : दसरा मेळाव्याला परवानगी मिळो वा न मिळो, शिवसेनेचा दसरा मेळावा शिवतीर्थावरच होणार; शिवसेना नेते मिलिंद वैद्य
Dasara Melawa : शिवसेनेच्या दसरा मेळव्यासाठी परवानगी मिळावी यासाठी शिवसेनेचे एका शिष्टमंडळाने महापालिकेच्या अधिकाऱ्यांची भेट घेतली.
मुंबई: आम्ही बाळासाहेबांचे कडवट शिवसैनिक आहोत, आम्हाला दसरा मेळाव्यासाठी परवानगी मिळो वा न मिळो, उद्धव ठाकरे सांगतील त्या ठिकाणी आम्ही दसरा मेळावा घेणार असं शिवसेना नेते मिलिंद वैद्य यांनी स्पष्ट केलं आहे. शिवाजी पार्कवर दसरा मेळाव्यासाठी परवानगी देण्यात यावी असा अर्ज करुन महिना झाला तरी त्यावर कोणताही निर्णय घेण्यात आला नाही, आता प्रशासनाने ठरवायचं की परवानगी द्यायची किंवा नाही, आमचा निर्णय ठरला आहे, आम्ही दसरा मेळावा घेणारच असंही ते म्हणाले.
शिवसेनेच्या शिवाजी पार्क मैदानावर दसरा मेळाव्यासाठी परवानगी मिळावी यासाठी मिलिंद वैद्य यांच्या नेतृत्वाखाली एक शिष्टमंडळ महापालिकेच्या जी उत्तर कार्यालयामध्ये गेलं होतं. त्या ठिकाणी पालिकेच्या अधिकाऱ्यांशी चर्चा केल्यानंतर त्यांनी माध्यमांशी संवाद साधला. ते म्हणाले की, "शिवसेनेने 22 ऑगस्टला दसऱ्या मेळाव्यासाठी परवानगी मिळावी यासाठी पहिला अर्ज केला होता. या आधीच्या मेळाव्यासाठी दोन दिवसात परवानगी मिळायची. पण आज आज 20 सप्टेंबर आला तरी त्यावर कोणताही निर्णय घेण्यात आला नाही. त्यासाठी शिवसेनेने महापालिका प्रशासनाला दोन वेळा पत्र लिहिलं तर अधिकाऱ्यांची तीन वेळा प्रत्यक्ष भेट घेतली. त्यावर विधी खात्याचं मत घेण्यासाठी त्यांच्याशी संपर्क साधल्याचं या आधी आम्हाला सांगण्यात आलं होतं. विधी खात्याकडून आजपर्यंत कोणताही निर्णय झाला नसल्याने त्यांनी आता कोणतंही उत्तर देणार नाही असं सांगितलं."
मिलिंद वैद्य पुढे म्हणाले की, "शिवसेनेच्या दसरा मेळाव्याला परवानगी मिळू नये यासाठी राज्य सरकारचा महापालिकेवर दबाव आहे. एका वेगळ्या प्रकारचा दबाव महापालिकेवर एक महिन्यांचा वेळ झाला तरी यावर कोणताही निर्णय नाही. दुसऱ्या गटाने बीकेसी साठी परवानगी मागितली होती, त्यांना मिळाली, त्या ठिकाणी त्यांनी पैसेही भरले आहेत. एकाच ठिकाणी दोन गटाने अर्ज केला असता तर त्याचा विचार केला गेला असता. पण आता तोही प्रश्न उरला नाही. या मेळाव्याला परवानगी देताना कायदा आणि सुव्यवस्थेचा प्रश्न असल्याचं सांगितलं जातंय. पण त्याचा इथे काही संबंध नाही."
शिवसेनेचा दसरा मेळावा शिवाजी पार्कवरच होणार
मिलिंद वैद्य म्हणाले की, "महापालिकेला परवानगी द्यायची असो वा नसो, आम्ही बाळासाहेबांचे कट्टर शिवसैनिक आहोत. शिवसेनेचा दसरा मेळावा हा शिवाजी पार्कवरच होणार. उद्धव ठाकरे सांगतील त्या ठिकाणी शिवसैनिक एकत्र जमतील आणि दसरा मेळावा पार पडेल."
महत्त्वाच्या बातम्या
