काका, आत्यांशी बोलून पार्थ पवार निर्णय घेणार!

शरद पवार यांच्या कठोर वक्तव्यानंतर पार्थ पवार कुटुंबाशी चर्चा करणार आहेत. काका तसंच सर्व आत्यांशी बोलून पार्थ आपली भूमिका आणि निर्णय घेणार आहेत.

मुंबई : सुशांत सिंह राजपूत मृत्यू प्रकरणात सीबीआय चौकशीची मागणी केल्यानंतर राष्ट्रवादी काँग्रेसचे अध्यक्ष शरद पवार यांनी पार्थ पवार यांच्याविरोधात कठोर भूमिका घेतली. यानंतर आता पार्थ पवार कुटुंबाशी चर्चा करणार आहेत. पार्थ पवार आपले काका श्रीनिवास पवार, अभिजित पवार जयंत पवार तसंच सर्व आत्यांशी बोलून आपली भूमिका आणि निर्णय घेणार आहेत.

शरद पवार यांनी फटकारल्यानंतर पार्थ पवार यांनी काल (13 ऑगस्ट) सिल्वर ओक या शरद पवार यांच्या निवासस्थानी पोहोचले होते. परंतु यावेळी पार्थ आणि सुप्रिया सुळे यांच्यातच चर्चा झाली. मात्र शरद पवार आणि पार्थ यांची भेट झाली नसल्याचं कळतं. त्यानंतर आता कुटुंबातील इतर सदस्यांसोबत बोलण्याचा निर्णय पार्थ पवार यांनी घेतला आहे.

राष्ट्रवादी काँग्रेसचे अध्यक्ष शरद पवार यांनी नातू पार्थ पवार यांच्यावरील वक्तव्यानंतर पवार कुटुंबात नव्या वादाला तोंड फुटलं. मीडियासमोर शरद पवार यांनी नातू पार्थ पवार यांचं वक्तव्य इमॅच्युअर असल्याचं म्हटलं होतं. तसंच, पार्थ यांच्या वक्तव्याला कवडीचीही किंमत आम्ही देत नाही, असंही शरद पवार म्हणाले होते. शिवाय शरद पवार यांच्या अजित पवार यांनीही जाहीररित्या कोणतंही वक्तव्य केललं नाही तर याविषयी आपल्याला कोणतंही भाष्य करायचं नाही, असं पार्थ पवार म्हणाले होते.

मात्र पार्थ पवार नाराज असून मोठा निर्णय घेणार असल्याची चर्चा रंगली आहे. पवार कुटुंबात वाद उफाळल्याची चर्चा सुरु होताच खासदार सुप्रिया सुळे यांनी मध्यस्थी केली आणि पार्थ यांना शरद पवारांच्या निवासस्थानी बोलावून घेतल्याचं सांगितलं जात आहे.

शरद पवार काय म्हणाले होते? पार्थ पवार यांनी काही दिवसांपूर्वीच राज्याचे गृहमंत्री अनिल देशमुख यांची भेट घेऊन सुशांत सिंह राजपूत प्रकरणाची सीबीआय चौकशी करावी अशी मागणी केली होती. तशा आशयाचं पत्र त्यांनी गृहमंत्र्यांना दिलं होतं. यावर शरद पवार यांनी पार्थ पवार यांच्याबाबत कठोर भूमिका घेतली आहे. याविषयी शरद पवार म्हणाले की, "नातवाच्या बोलण्याला कवडीचीही किंमत आम्ही देत नाही. त्यांचं वक्तव्य इमॅच्युअर आहे. परंतु सीबीआय चौकशी जर कोणाला करायची असेल, मी स्पष्ट सांगितलं की माझा महाराष्ट्र आणि मुंबई पोलिसांवर 100 टक्के विश्वास आहे. पण कोणाला असं वाटत असेल की सीबीआय चौकशीची मागणी करावी, तर त्यालाही कोणी विरोध करायचं कारण नाही."

संबंधित बातम्या

Parth Pawar | कुटुंबातील सगळ्यांशी चर्चा करुन पार्थ पवार निर्णय घेणार!