Mumbai Rain Update | मुंबईत मान्सूनचं दमदार आगमन! मुंबईसह उपनगरात पहिल्याच पावसाने दाणादाण

मुंबईसह उपनगरांमध्ये मान्सूनचं दमदार आगमन झालं आहे. मात्र, या पहिल्याच पावसाने दाणादाण उडाली आहे. रेल्वे वाहतूक विस्कळीत झाल्याने नोकदारांचे मोठ्या प्रमाणात हाल झाले.

संपादित छायाचित्र

मुंबई : मुंबईसह महाराष्ट्रात मान्सूनचं दमदार आगमन झालंय. दरवर्षीप्रमाणे यावर्षीही मुंबईसह उपनगरात पहिल्याच पावसाने दाणादाण उडवून दिलीय. मुंबईसह उपनगरात पावसाने जोरदार हजेरी लावली. अनेक ठिकाणी सखल भागात पाणी साचल्याने मुंबईतल्या महत्त्वाच्या रस्त्यांवर वाहतूक कोंडी झाली होती. तर रेल्वेची वाहतूकही विस्कळीत झाली. मध्य रेल्वेची मुंबईच्या दिशेनं जाणारी वाहतूक पुढील सूचना मिळेपर्यंत बंद करण्यात आलीय.

ठाणे, कल्याण-डोंबिवली, नवी मुंबईत पावसाच्या सरी कोसळत आहेत. मुंबईतील पश्चिम उपनगरं म्हणजेच, अंधेरी, जोगेश्वरी, मालाड, गोरेगाव या उपनगरांमध्ये दमदार पाऊस बरसतोय. तर मुंबईच्या पूर्व उपनगरांमध्ये मुलुंड, भांडूप, घाटकोपर, चेंबूर या परिसरातही पावसाची रिमझिम सुरु असून अधूनमधून जोरदार सरीही कोसळत आहेत. या पहिल्या पावसाने नोकरदारांचे मोठ्या प्रमाणात हाल झाल्याचे पाहायला मिळाले. पावसामुळे रेल्वेची वाहतूक विस्कळीत झाल्याने कामावर निघालेल्या चाकरमाऱ्यांच्या वाटेत अडथळा निर्माण झाला. सायन रेल्वे स्थानकाजवळ रेल्वे ट्रॅकवर पाणी साचलं आहे. पहिल्याच पावसात मुंबतील सखल भागांसह अनेक रेल्वे स्थानकांमध्येही पाणी साचलं आहे.

मुंबईतील किंग सर्कल परिसरामध्ये कमरे इतकं पाणी असून अनेक गाड्या बंद पडल्या आहेत. तर एका एसटीमध्ये चालक आणि कंडक्टर गेल्या पाच तासांपेक्षा अधिक काळ अडकून होते. त्यांच्यापर्यंत मदत सुद्धा आली पण पाणी जास्त असल्यामुळे ते पोहोचू शकले नाही. ही बातमी एबीपी माझाने दाखवल्यानंतर याची दखल घेत किंग सर्कल येथे अडकलेल्या एसटी चालक आणि कंडक्टरला सुखरूप बाहेर काढण्यासाठी मुंबई अग्निशमन दलाचे जवान पोहचले आणि या दोघांना सुखरूप बाहेर काढण्यात त्यांना यश आलं आलंय.

हार्बल लाईन ठप्प
मुंबईमध्ये सकाळपासून सुरु असलेल्या मुसळधार पावसामुळे चुनाभट्टी रेल्वे स्थानकात मोठ्या प्रमाणात पाणी भरलं आहे. यामुळे मुंबईची जीवनवाहिनी हार्बर लोकल ठप्प झाली आहे. पुढील काही तास असाच पाऊस सुरु राहिला तर जे मुंबईकर अत्यावश्यक सेवा देण्यासाठी बाहेर पडले होतं आणि ते लोकलचा वापर करत होते त्यांना मात्र घराकडे परतताना मोठ्या त्रासाला सामोरे जावे लागणार आहे. चुनाभट्टी रेल्वे स्थानकात लोकलच्या रांगा लागलेल्या आहेत.

ठाणे मुख्यालयासमोर गुडघाभर पाणी 
ठाण्यातील सखल भागांमध्ये मुसळधार पावसामुळे पाणी साचण्यास सुरूवात झाली आहे. गेले एक ते दोन तास सलग पाऊस पडल्याने ठाणे महापालिकेच्या मुख्यालयासमोरच गुडघ्यापर्यंत पाणी साचलेले बघायला मिळत आहे. याच पाण्यातून वाट काढत रहिवाशांना आणि वाहनचालकांना जावे लागत आहेत. पाऊस असाच सुरू राहिला तर परिस्थिती आणखी बिकट होण्याची शक्यता आहे. 

वंदना सिनेमा रोड पाण्याखाली
ठाण्यात थोडादेखील पाऊस पडला तरी हमखास ज्या ठिकाणी पाणी साचते ठिकाण म्हणजे वंदना सिनेमा रोड. या रोडवर आज देखील सकाळपासून झालेल्या पावसामुळे प्रचंड पाणी साचले आहे. त्यामुळे हा संपूर्ण रोड वाहतुकीसाठी बंद करण्यात आला आहे. इथे पाणी साचल्याने आसपासच्या सोसायटीमध्ये राहणारे रहिवासी आणि घरात अडकून पडले आहेत. एसटी स्टँडमधील बसेस बाहेर पडू शकत नाहीत. तसेच जे नागरिक काही कामासाठी या भागातून जात आहेत त्यांना यापेक्षा जास्त पाण्यातून वाट काढत जावे लागत आहे.