![ABP Premium](https://cdn.abplive.com/imagebank/Premium-ad-Icon.png)
Gudi Padva 2022 : गुढीपाडव्याला डोंबिवलीत साधेपणाने स्वागत यात्रा, ढोल पथकांना परवानगी नाही
गुढीपाडव्यानिमित्त यंदा डोंबिवलीत साधेपणाने स्वागत यात्रा होणार आहे. दीपोत्सव, कोविड काळात प्रत्यक्ष काम करणाऱ्या कर्मचाऱ्यांचा सत्कार यांसह विविध धार्मिक कार्यक्रम आयोजिक केले जाणार आहेत.
![Gudi Padva 2022 : गुढीपाडव्याला डोंबिवलीत साधेपणाने स्वागत यात्रा, ढोल पथकांना परवानगी नाही Gudi Padva 2022 : Shobha Yatra will be held on Gudi Padva in Dombivali Gudi Padva 2022 : गुढीपाडव्याला डोंबिवलीत साधेपणाने स्वागत यात्रा, ढोल पथकांना परवानगी नाही](https://feeds.abplive.com/onecms/images/uploaded-images/2022/03/28/0d1fd3c1079da65823e07c24cd8c80b8_original.jpg?impolicy=abp_cdn&imwidth=1200&height=675)
डोंबिवली : गुढीपाडव्यानिमित्त संपूर्ण महाराष्ट्रात नववर्ष स्वागत यात्रेची मुहूर्तमेढ रोवणाऱ्या डोंबिवली श्री गणेश संस्थानची नववर्ष स्वागत यात्रा यंदा साधेपणाने करण्याचा निर्णय आला आहे. कोरोनामुळे 2020 आणि 2021 अशी सलग दोन वर्षे या स्वागत यात्रेला ब्रेक लागला होता. यंदा मात्र कोविडची परिस्थिती बऱ्यापैकी निवळली असली तरी निर्बंधांच्या पार्श्वभूमीवर ही स्वागत यात्रा साधेपणाने करण्याचा निर्णय घेतल्याची माहिती अध्यक्ष राहुल दामले यांनी पत्रकार परिषदेत दिली.
यंदा कोणत्याही प्रकारचे देखावे असणारे रथ या नववर्ष स्वागत यात्रेत सहभागी होणार नसून साधेपणाने श्री गणेशाच्या पालखीच्या माध्यमातून काढली जाणार आहे. भागशाळा मैदानाऐवजी डोंबिवली पश्चिमेच्या पंडित दिनदयाळ मार्गावरील मारुती मंदिरापासून ही पालखी निघणार आहे. तर यंदा स्वातंत्र्याचा अमृत महोत्सव म्हणजेच 75 वे वर्ष असून त्याचे औचित्य साधून संस्कार भारतीतर्फे 75 कलाकार वेगवेगळ्या ठिकाणी अत्यंत सुबक अशा 75 रांगोळ्या काढणार आहेत.
Gudi Padwa 2022: ‘या’ दिवशी साजरा होणार गुढीपाडव्याचा सण, जाणून घ्या तिथी आणि धार्मिक महत्त्व
ढोलपथकांना यात्रेत परवानगी नाही. चौकाचौकात वाजवायला परवानगी दिली जाणार आहे मात्र याबाबत ढोल पथकांनी नियोजन करायचं आहे. तर गुढीपाडव्याच्या निमित्ताने दीपोत्सव, कोविड काळात प्रत्यक्ष काम करणाऱ्या कर्मचाऱ्यांचा सत्कार यांसह विविध धार्मिक कार्यक्रमही आयोजित करण्यात येणार असल्याची माहिती राहुल दामले यांनी दिली.
मराठी नववर्षाची स्वागत यात्रा आणि डोंबिवली हे समीकरण आहे. गुढीपाडव्याला निघणारी शोभायात्रा ही डोंबिवलीची सांस्कृतिक ओळख आहे. कोरोनाच्या निर्बंधांमध्ये शिथिलता आल्याने डोंबिवलीकरांनी दोन वर्षांनंतर स्वागत यात्रा काढण्यासाठी परवानगी द्यावी अशी मागणी केली होती. पण स्वागत यात्रा होणार की नाही याबाबत नागरिकांमध्ये संभ्रम होता. या पार्श्वभूमीवर डोंबिवली श्री गणेश मंदिर संस्थानतर्फे विश्वस्तांची एक बैठक पार पडली. यानंतर झालेल्या पत्रकार परिषदेत यंदा गुढीपाडव्याला नववर्ष स्वागत यात्रा काढली जाणार असल्याचं जाहीर करण्यात आलं.
नाशिकमध्ये स्वागत यात्रा रद्द
रंगपंचमी, दाजीबा वीर मिरवणूक या पाठोपाठ नववर्ष स्वागत यात्रांच्या परवानगीवरुन नाशिक पोलीस आणि कार्यकर्त्यांमध्ये खटके उडायला सुरुवात झाली आहे. अनेक दिवसांपासून पोलिसांकडे परवानगीसाठी फेऱ्या मारुनही ती मिळत नसल्याने नववर्षाच्या स्वागत यात्रेसह सर्वच कार्यक्रम रद्द करण्यात आले आहेत. स्वागत यात्रा समितीने शनिवारी (26 मार्च) या निर्णयाची घोषणा केली. त्यामुळे धुलिवंदन, रंगपंचमी पाठोपाठ गुढीपाडवानिमित्त होणाऱ्या कार्यक्रमांच्या परवानगीवरुन नाशिककर आणि पोलिसांमधील संघर्ष उभा राहिला आहे.
महत्त्वाच्या बातम्या
ट्रेंडिंग न्यूज
![ABP Premium](https://cdn.abplive.com/imagebank/metaverse-mid.png)