Corona Effect | संचारबंदीच्या काळात शैक्षणिक नुकसान होऊ नये यासाठी विद्यार्थ्यांसाठी ऑनलाईन अध्यापन प्रक्रिया

संचारबंदीच्या काळात विद्यार्थ्यांचे नुकसान होऊ नये म्हणून सर्व तंत्रशिक्षण संस्थांमधील कामकाज 'वर्क फ्रॉम होम' या ऑनलाईन पद्धतीने पूर्ण करण्यात येत आहे. विद्यार्थ्यांचं शैक्षणिक नुकसान होऊ नये, म्हणून शिकवणीसाठी ऑनलाईन अध्यापन सुविधा उपलब्ध करून देण्यात येत आहे.

मुंबई : राज्यात कोरोनाच्या पार्श्वभूमीवर संचारबंदी लागू असताना आणि दुसरीकडे विविध अभ्यासक्रम अपूर्ण असल्याने महाविद्यालयातील प्राध्यापकांना वर्क फ्रॉम होमच्या सूचना देण्यात आल्या आहेत. विद्यार्थ्यांचे शैक्षणिक नुकसान होऊ नये, म्हणून शिकवणीसाठी ऑनलाईन अध्यापन सुविधा उपलब्ध करून देण्यात येत आहे. त्यामुळे विद्यार्थ्यांनी काळजी करू नये, असं आवाहन उच्च व तंत्र शिक्षणमंत्री उदय सामंत यांनी केलं आहे.

एकीकडे कोरोनामुळे राज्यात सर्वत्र लॉकडाऊन असल्याने या संचारबंदीच्या काळात विद्यार्थ्यांचे नुकसान होऊ नये, याकरिता सर्व तंत्रशिक्षण संस्थांमधील कामकाज 'वर्क फ्रॉम होम' या ऑनलाईन पद्धतीने पूर्ण करण्यात येत आहे. हे ऑनलाईन कामकाज पूर्ण करण्यासंदर्भात तंत्रशिक्षण विभागाचे संचालक डॉ. अभय वाघ हे व्हॉट्सअॅप ग्रुपवर मार्गदर्शन करत आहेत.

प्राध्यापकांनी विद्यार्थ्यांना ऑनलाईन प्रक्रियेद्वारे अभ्यासक्रमांच्या अनुषंगाने माहिती पुरवणे तसेच पाठ्यक्रमानुसार व्हिडिओ तयार करून ते इमेल, व्हॉट्सअॅपद्वारे उपलब्ध करून देणे. तसेच ऑनलाईन संसाधनांचा (SWAYAM, NEAT, COURSERA, edX etc) अध्ययनासाठी स्वतः प्राध्यापक आणि विद्यार्थ्यांनी वापर करणे , Screen-o-matic सारख्या ऑनलाईन व्हिडीओ एडिटिंग प्रणालीचा वापर करून प्राध्यापकांनी विषय निहाय व्हिडीओ क्लिप तयार करून विद्यार्थ्यांना पुरवणे, व्हॉट्सअॅप ग्रुपद्वारे नेमवून दिलेले कार्य (Assignment) पूर्ण करून घेणे, विद्यार्थ्यांच्या समस्यांचे निराकरण करणे, पुढील सत्राचे शैक्षणिक नियोजन विभागास सादर करणे, प्रश्नावलीची बँक तयार करणे, असे अनेक ऑनलाईन पर्याय उपलब्ध करून देण्यात येत आहेत. जास्तीत जास्त ऑनलाईन वापर करून विद्यार्थ्यांचे शैक्षणिक नुकसान टाळावे, असे आवाहनही उदय सामंत यांनी केले आहे.

पुढील टप्प्यात सर्व संस्थांचा आढावा ऑनलाईन पद्धतीने घेण्याचे तंत्रशिक्षण संचालनालयाने नियोजन केले आहे. सर्व संस्था व प्राध्यापक यांना गुगल फॉर्म पाठवून त्यांनी वर्क फ्रॉम होम करताना वरीलपैकी कोणकोणते पर्याय वापरले, त्याचा किती विद्यार्थ्यांना फायदा झाला? तपासण्यात येणार आहेत. त्यासाठी सर्व विभागीय तंत्रशिक्षण सहसंचालक आणि संबंधित संस्थेचे प्राचार्य यांना जबाबदारी देण्यात आली आहे. अभियांत्रिकी महाविद्यालये व तंत्रनिकेतनांमधील प्राध्यापक पदांना सातवा वेतन आयोग लागू करताना शासनाने प्राध्यापकांची कामगिरी तपासण्यासाठी 360 डिग्री फीडबॅक संकल्पना अनिवार्य केली आहे. यात प्राध्यापक वर्गाचे वार्षिक गोपनीय अहवाल, आणि '360 डिग्री फीडबॅक' या बाबींचे मूल्यमापन करताना त्यांनी 'वर्क फ्रॉम होम' अंतर्गत केलेल्या कार्याचा मूल्यमापनाच्या दृष्टीने समावेश असेल, अशा पद्धतीने आधुनिक तंत्रावर आधारित अध्यापन पद्धतींचा वापर करून या लॉकडाऊन कालावधीत विद्यार्थ्यांचे शैक्षणिक नुकसान होऊ नये यासाठी उपाययोजना करण्यात येत आहेत.

संबंधित बातम्या