BMC: मुंबई महापालिकेत टनेल लाँड्रीत घोटाळा? कंत्राट रद्द करण्याची भाजपची BMC आयुक्तांकडे मागणी
BMC Tunnel Laundry : मुंबई महापालिकेने टनेल लाँड्रीची निविदा प्रक्रिया रद्द करण्याची मागणी भाजपने केली आहे. कंत्राटदाराच्या फायद्यासाठी पालिका अधिकाऱ्याने काही निर्णय घेतले असल्याचा आरोप भाजपने केला आहे.
BMC Tunnel Laundry : मुंबई महापालिकेच्या रुग्णालयांमधील कपडे धुण्यासाठी महापालिका प्रशासनाने अत्याधुनिक टनेल लाँड्री उभारण्याचा निर्णय घेतला आहे. मात्र, या निर्णयात घोटाळा झाल्याचा संशय भाजप आमदार अमित साटम यांनी व्यक्त केला आहे. महापालिका आयुक्तांनी हे 160 कोटींचे कंत्राट रद्द करावे अशी मागणी त्यांनी एका पत्राद्नारे केली आहे. ही लाँड्री नेमकी कपडे धुण्यासाठी उभी केली जातेय की या कंत्राटात टक्केवारीसाठी आपले ‘हात धुवून’घेण्यासाठी असा सवाल अमित साटम यांनी उपस्थित केला आहे.
भाजप आमदार अमित साटम यांनी महापालिका आयुक्त-प्रशासक इक्बाल चहल यांना लिहीलेल्या पत्रात खळबळजनक आरोप केले आहे. टनेल लाँड्रीचे कंत्राट काढण्यासाठी महापालिकेच्या एका अधिकाऱ्याने १६ कोटीची रक्कम स्वीकारली आहे. त्याचे सविस्तर पुरावे मी वेळ आल्यावर तपास यंत्रणेला सादर करणार असल्याचेही साटम यांनी म्हटले. कुठलेही तंत्रज्ञान, टेकनिकल स्पेसीफिकेशन किंवा अनुभव याबाबत यात कुठलीही एकसुत्रता नाहीये आणि सगळ्या गोष्टी विशिष्ट कंत्राटदाराला फायदा होईल याकडे लक्ष दिले असल्याचा आरोपही साटम यांनी केला आहे.
मुंबई महापालिकेकडून जेव्हा निविदा काढली जाते, तेव्हा मुंबई महापालिका आणि CVC च्या मार्गदर्शक तत्वानुसार संबंधित कंपनीच्या कामाचा अनुभव ग्राह्य धरला जातो. मात्र, या मार्गदर्शक तत्वांना धाब्यावर बसवून खासगी क्षेत्रात काम करणाऱ्या व विदेशातील कंपन्यांचा मार्ग सुकर करण्यात आला असल्याचा दावा त्यांनी केला आहे.
क्षयरोग रुग्णालयाच्या आवारात टनेल लाँड्री
ज्या रुग्णालयाच्या आवारात ही टनेल लाँड्री उभारण्याचे प्रस्तावित आहे, ते क्षयरोगाचे रुग्णालय आहे. क्षयरोग हा संसर्गजन्य आजार आहे. जर क्षयरोग रुग्णालयात टनेल लाँड्री बनवून तिथे धुवून व सुकवून पाठवले तरी त्याद्वारे जंतूसंसर्ग होणार नाही याची हमी आरोग्य विभाग देणार आहे का? असा सवालही अमित साटम यांनी केला आहे. जंतूसंसर्गाच्या भीतीने आरोग्य विभागाने ही परवानगी दिली नसल्याची माहिती आम्हाला मिळत आहे. आरोग्य विभागाला ही भीती वाटत असेल तर भविष्यात रुग्णालयातील विविध आजारांनी ग्रासलेले रुग्ण आणि डॉक्टर यांच्या जीवाशी खेळण्याचा प्रयत्न का केला जात आहे? असा प्रश्नही त्यांनी उपस्थित केला आहे. ही निविदा प्रक्रिया त्वरीत रद्द करून संबंधित अधिकाऱ्यांवर कायदेशीर कारवाई करावी अशी मागणीदेखील त्यांनी केली आहे.
परेल येथील केंद्राला पर्याय
रुग्णालयांमध्ये वापरलेले कपडे धुण्यासाठी सध्या महापालिकेकडून परेल येथील विद्युत धुलाई केंद्राचा वापर केला जातो. हे केंद्र महापालिकेच्या मालकीचे आहे. मात्र, या केंद्राची कार्यक्षमता कमी झाल्याने याठिकाणी सध्या ५० टक्के कपडे धुतले जातात. तर, उर्वरीत कपडे खासगी लाँड्रीतून धुतले जातात.
महत्त्वाच्या बातम्या
