Vinayak Mete Death : ..तर आज विनायक मेटेंचा जीव वाचला असता;  मुंबई-पुणे महामार्गावर ट्रॉमा सेंटर हवेतच!

Vinayak Mete Death : "जर मुंबई-पुणे एक्सप्रेस वे वर वैद्यकीय सुविधा उपलब्ध असल्या असत्या, किंवा एखादे ट्रॉमा सेंटर असले असते तर कदाचित मेटे यांचा जीव वाचला असता"

vinayak_mete_accident

Vinayak Mete Death News : शिवसंग्रामचे नेते विनायक मेटे (Vinayak Mete) यांचं अपघाती निधन झालं आहे.  मुंबई-पुणे द्रुतगती महामार्गावर (Mumbai Pune Express Highway) ही घटना घडली आहे. माडप बोगद्यामध्ये आज पहाटे साडेपाच वाजताच्या सुमारास विनायक मेटे यांच्या गाडीचा अपघात झाला होता. या घटनेबाबत असे सांगण्यात येते की, अपघातानंतर जवळपास एक तासभर मेटे यांना कुठलीही मदत मिळाली नव्हती. दरम्यान, भाजप नेते गणेश नाईक यांनी याबाबत प्रतिक्रिया देत पुणे ते नवी मुंबईपर्यंत एक्सप्रेसवेवर तीन ते चार ठिकाणी ट्रॅामा सेंटर लवकरात लवकर उभे करावेत, अशी मागणी केली आहे. 

मुंबई-पुणे महामार्गावर वैद्यकीय सुविधा नाहीत, ट्रॉमा सेंटर उभारण्याची होतेय मागणी
विनायक मेटेंच्या अपघातानंतर जवळपास एक तासभर त्यांना कुठलीही मदत मिळाली नव्हती. जर मुंबई-पुणे एक्सप्रेस वे वर वैद्यकीय सुविधा उपलब्ध असल्या असत्या, किंवा एखादे ट्रॉमा सेंटर असले असते तर कदाचित मेटे यांचा जीव वाचला असता, अशी प्रतिक्रिया सर्वस्तरातून येत आहे. तब्बल तासाभरानंतर मेटे यांना नवी मुंबईतील एमजीएम रुग्णालयात (Navi Mumbai MGM Hospital) दाखल करण्यात आलं होतं. मेटे यांच्यासह त्यांच्या बॉडीगार्ड आणि गाडी चालकाची प्रकृती गंभीर होती. दरम्यान उपचारादरम्यान मेटे यांचं निधन झालं असल्याची माहिती रुग्णालय प्रशासनानं दिली आहे. 

"100 नंबरला आम्ही फोन केला मात्र त्यांनी फोन उचलला नाही." 

मेटे यांचे सहकारी एकनाथ कदम हे देखील यावेळी त्यांच्यासोबत होते. कदम यांच्याशी एबीपी माझानं संवाद साधला त्यावेळी त्यांनी सांगितलं की, बीडकडून आम्ही मुंबईकडे येत असताना हा अपघात झाला. आम्हाला एका ट्रकने कट मारला. आम्हाला अपघातानंतर एक तास मदत मिळाली नाही, असंही त्यांनी सांगितलं. 100 नंबरला आम्ही फोन केला मात्र त्यांनी फोन उचलला नाही. मदतीसाठी मी प्रत्येकाला विनवणी करत होतो मात्र कुणीही गाडी थांबवली नाही. मी रोडवर झोपलो होतो, आम्ही गाड्यांना हात करत होतो, मग एका गाडीवाल्यानं गाडी थांबवली आणि आम्हाला मदत केली. एका तासानंतर तिथं अॅम्ब्युलंस आली. अपघातानंतर मी मेटे यांच्याशी बोललो तर तेव्हा ते माझ्याशी संवाद करत होते, असंही एकनाथ कदम यांनी सांगितलं. एकनाथ कदम हे अपघातावेळी मेटे यांच्या सोबत होते. कदम यांना या अपघातात किरकोळ मार लागला आहे. मदतीसाठी एक तास कुणीही आलं नसल्याचं कदम यांनी सांगितलं. यंत्रणांनी देखील मदत केली नाही, असं ते म्हणाले. 

मराठा आरक्षण आंदोलनातील महाराष्ट्रातील प्रमुख नेते

विनायक मेटे हे शिवसंग्राम पक्षाचे प्रमुख होते. मराठा आरक्षणासाठीच्या आंदोलनातील मेटे हे महाराष्ट्रातील प्रमुख नेते होते. मराठा आरक्षणासाठी मेटे यांनी अनेकदा आंदोलनं केली. अरबी समुद्रातील शिवस्मारक समितीचे ते अध्यक्ष देखील होते. बीड जिल्ह्यातील केज तालुक्यातील राजेगावचे रहिवासी होते. सर्वप्रथम शिवसेना भाजप युती सरकारच्या काळात आमदार त्यानंतर सलग पाच टर्म विधानपरिषद सदस्य होते.

 

संबंधित बातम्या