यवतमाळमधील काल वाहून गेलेली एसटी बस अखेर मिळाली, चालक मृत, दुर्घटनेत एकूण चौघांचा मृत्यू

काल सकाळी आठ वाजण्याच्या सुमारास मुसळधार पावसात यवतमाळमधील उमरखेडच्या दहागावात एसटी बस थेट पाण्यात कोसळल्याची दुर्दैवी घटना घडली. ही एसटी बस नाल्याच्या पाण्यात वाहून गेली होती.

st_bus

यवतमाळ  :  काल सकाळी आठ वाजण्याच्या सुमारास मुसळधार पावसात यवतमाळमधील उमरखेडच्या दहागावात एसटी बस थेट पाण्यात कोसळल्याची दुर्दैवी घटना घडली. ही एसटी बस नाल्याच्या पाण्यात वाहून गेली होती. ती गाळात फसलेली बस आज नाल्यातून काढण्यात यश आले आहे.  एसटी बस मधील बेपत्ता असलेला एक मृतदेह नाल्यापासून दीड किलोमीटर अंतरावर बचाव पथकाला आढळला.  सदरचा मृतदेह हा बस चालकाचा असल्याची महिती आहे. या दुर्घटनेत काल तीन व्यक्ती मृत झाल्या होत्या.  काल 2 व्यक्तींना वाचविण्यात बचाव पथकाला यश आले होते. काल आलेल्या मुसळधार पावसामुळे रात्री रेस्क्यू ऑपरेशन थांबले होते. आज सकाळपासून पुन्हा शोध मोहीम सुरू केले होती. 

काल सकाळी आठ वाजण्याच्या सुमारास मुसळधार पावसात एसटी बस थेट पाण्यात कोसळल्याची दुर्दैवी घटना घडली. नागपूरहून नांदेडकडे जाणाऱ्या (MH 14 BT 5018) या एसटीच्या हिरकणी बसचा अपघात झाला होता. यवतमाळ जिल्ह्यातील उमरखेड शहरापासून काही अंतरावरील दहागाव नाल्यावर ही दुर्घटना घडली. दरम्यान, या अपघातात 2 प्रवाशांना वाचवण्यात यश आलं होतं तर कालच तिघांचे मृतदेह हाती लागले होते. यातील चालकाचा शोध सुरू होता.  ज्या प्रवाशांचा मृत्यू झाला त्याची सरकार जबाबदारी घेईल. कोणत्याही प्रकारचा धोका पत्करून पाण्यात बस घालू नये, अशा वाहन चालकांना सक्त सूचना देण्यात येतील आणि यामध्ये चूक कोणाची आहे याची चौकशी केली जाईल, असे आश्वासन राज्यमंत्री सतेज पाटील यांनी दिले होते.

नदीवरुन पाणी वाहत असताना एसटी बस चालकाने नको ते धाडस करत प्रवाशांचा जीव धोक्यात घातला. या पुलावरुन पाणी वाहून जात असतानाही चालकाने त्या पाण्यातून गाडी नेली आणि पाण्याच्या प्रवाहात ही बस वाहून गेली. या अपघाताचे दोन व्हिडीओ समोर आले होते. एका व्हिडीओत एसटी बस थेट पाण्यात वाहून जात असताना दिसत आहे. तर दुसऱ्या व्हिडीओत बसमधील प्रवासी आपले प्राण वाचवण्यासाठी धडपड करत असताना दिसत आहेत. बसच्या टपावर अडकलेले प्रवासी मदतीसाठी हाक देत असल्याचं व्हिडीओत दिसून आलं होतं. या एसटी बसमध्ये 2 कर्मचारी व 4 प्रवाशी होते.

गेल्या तीन दिवसांपासून यवतमाळ जिल्ह्यात मुसळधार पाऊस पडत आहे. या मुसळधार पावसामुळे नद्या-नाल्यांना पूर आला आहे. नद्या ओसंडून वाहत असल्याने वाहतुकीवर परिणाम झाला आहे. रस्त्याच्या दोन्ही बाजुला वाहनांच्या रांगा लागल्याने प्रशासकीय अधिकाऱ्यांनाही घटनास्थळी पोहोचण्यात अडचणी येत आहेत.