'रिपाइं कार्यकर्ते मशिदीवरच्या भोंग्यांना संरक्षण देतील', रामदास आठवलेंचं राज ठाकरेंना आव्हान

केंद्रीय सामाजिक न्याय राज्यमंत्री रामदास आठवलेंनी (RPI Ramdas Athawale) आता थेट मनसे अध्यक्ष राज ठाकरेंना (MNS Raj Thackeray)  आव्हान दिलं आहे.

Ramdas Athawale On Raj Thackeray

Ramdas Athawale On Raj Thackeray :  केंद्रीय सामाजिक न्याय राज्यमंत्री रामदास आठवलेंनी (RPI Ramdas Athawale) आता थेट मनसे अध्यक्ष राज ठाकरेंना (MNS Raj Thackeray)  आव्हान दिलं आहे. अजानला विरोध करणं चुकीचं असून राज ठाकरे समाजामध्ये तेढ निर्माण करत असल्याचा आरोप रामदास आठवले यांनी केला आहे. तसंच रिपाईंचे कार्यकर्ते 3 मे रोजी ठिकठिकाणी मशिदीवरच्या भोंग्यांना संरक्षण देतील, असंही रामदास आठवले म्हणालेत. राज ठाकरेंच्या औरंगाबादच्या सभेला परवानगी देऊ नका, अशी मागणीही आठवलेंनी केली आहे.. आठवलेंच्या या वक्तव्यांमुळे आता मनसे विरुद्ध रिपाइं असा संघर्ष निर्माण होण्याची शक्यता आहे.

आगामी महापालिका निवडणुकांच्या तोंडावर भाजप आणि मनसे यांच्या युतीची चर्चा राजकीय वर्तुळात रंगू लागली आहे. भाजपच्या नेत्यांनी गेल्या काही दिवसांमध्ये राज ठाकरेंच्या भेटीही घेतल्याचं पाहायला मिळालं आहे. मात्र, भाजप आणि मनसेची युती शक्य नाही, असं केंद्रीय सामाजिक न्याय राज्यमंत्री रामदास आठवले म्हणालेत. राज ठाकरेंना सोबत घेणं भाजपला परवडणारं नाही. तसंच रिपाइं सोबत असताना भाजपला मनसेशी युती करण्याची गरजच नाही, असंही आठवले म्हणालेत.

अजान काही मिनिटांची असते,  त्यामुळे कोणाला त्रास होत नाही

रामदास आठवले म्हणाले की,  अजानला विरोध करणे चुकीचे आहे. अजान काही मिनिटांची असते.  त्यामुळे कोणाला त्रास होत नाही, असं आठवले म्हणाले. 

राज ठाकरेंसोबत भाजपची युती अशक्य

रामदास आठवले म्हणाले की,  मुंबई महापालिकेत भाजपसोबत युती करणार आहे.  सत्ता आली अंतर आरपीआयला उपमहापौरपद मिळावे. राज ठाकरेंसोबत भाजपची युती अशक्य आहे. जोपर्यंत मी इथे आहे तोपर्यंत राज ठाकरे इथे येऊ शकत नाहीत. राज ठाकरेंना सोबत घेणं हे भाजपला परवडणारे नाही, असं आठवले म्हणाले.  राज ठाकरेंच्या औरंगाबादच्या सभेला परवानगी देऊ नये. राज ठाकरे समाजात तेढ निर्माण करत आहेत, असंही ते म्हणाले. 

आठवले म्हणाले की, शरद पवारांमुळे जातिवाद वाढला असं माझ मत नाही. पण पवारांच्या सोबतचे काही लोक जातिवादी आहेत. अमोल मिटकरी यांनी ब्राह्मण समाजाबाबत गरळ ओकण्याचं काहीच कारण नाही.

रामदास आठवले म्हणाले की,  महाराष्ट्रात राष्ट्रपती राज्यवट लागू करावी अशी आमची मागणी पहिल्यापासून आहे. त्यामुळे आज राणा दाम्पत्याची मागणी योग्य, पण केंद्र सरकार तसे करणार नाही. महाराष्ट्र पोलीसांनी सरकारच्या दबावात राहून काम करू नये,जे लोक घेराव घालत आहेत त्यांच्यावर कारवाई करावी, असं ते म्हणाले.