Ashok Kharat : रुपाली चाकणकर एक नंबरच्या खोटारड्या, अशोक खरातचं कांड एका वर्षापूर्वीच त्यांना माहिती; सुषमा अंधारेंनी पत्रच दाखवलं

Sushma Andhare On Rupali Chakankar : मार्च 2025 मध्ये एका स्थानिक वृत्तपत्राने अशोक खरातवर महिलेचे शोषण केल्याचा आरोप केला होता. त्यावर रुपाली चाकणकरांनी त्या वृत्तपत्राकडून माफीनामा घेतल्याचा दावा सुषमा अंधारेंनी केला. 

Sushma Andhare On Rupali Chakankar

Source : abp majha

मुंबई : नाशिकचा भोंदूबाबा अशोक खरात प्रकरणामुळे (Ashok Kharat) राज्य महिला आयोगाच्या अध्यक्षा रुपाली चाकणकर (Rupali Chakankar) आता अडचणीत येण्याची शक्यता आहे. अशोक खरातांच्या वैयक्तिक आयुष्य किंवा त्यांच्यावर झालेल्या आरोपांबाबत आपल्याला काही कल्पना नसल्याचं चाकणकर म्हणाल्या होत्या. त्यावर आता ठाकरेंच्या नेत्या सुषमा अंधारेंनी (Sushma Andhare) एका वृत्तपत्राचं पत्र समोर आणलं आहे. त्यामध्ये अशोक खरातशी संबंधित महिला शोषणाचा आणि रुपाली चाकणकरांच्या एका पत्राचा उल्लेख असल्याचं दिसतंय. 

अशोक खरातच्या कांडासंबंधी बातमी देणाऱ्या वृत्तपत्राकडून रुपाली चाकणकरांनी माफीनामा लिहून घेतला होता असा दावा सुषमा अंधारेंनी केला आहे. रुपाली चाकणकरांना जर खरातच्या प्रकरणासंबंधी काही माहिती नाही तर त्यांनी एका वर्षापूर्वी वृत्तपत्राकडून माफीनामा कसा घेतला असा प्रश्नही सुषमा अंधारेंनी विचारला.

Rupali Chakankar Letter : रुपाली चाकणकरांच्या पत्रात काय? 

सुषमा अंधारे यांनी एका स्थानिक वृत्तपत्राचं पत्र शेअर केलं आहे. त्या स्थानिक वृत्तपत्राने रुपाली चाकणकरांना ते पत्र लिहिलं होतं. गेल्या वर्षी 19 मार्च, म्हणजे बरोबर एका वर्षापूर्वीचं ते पत्र आहे. संबंधित वृत्तपत्राने अशोक खरातने केलेल्या महिलेच्या शोषणाची पोलखोल करणार असल्याची बातमी दिली होती. त्यानंतर रुपाली चाकणकरांनी त्या वृत्तपत्राला ती मोघम माहितीवर आधारित बातमी असल्याचं म्हटलं होतं असा दावा त्या पत्रातून करण्यात आल्याचं दिसतंय. तसेच अशोक खरात प्रकरणात रुपाली चाकणकरांनी तत्परता दाखवून पत्र लिहिलं, त्यांना महिलांचा कळवळा असल्यांचा टोलाही त्या स्थानिक वृत्तपत्राने लगावल्याचं दिसतंय. 

Sushma Andhare On Rupali Chakankar : काय म्हणाल्या सुषमा अंधारे? 

रूपाली चाकणकर क्रमांक एकच्या खोटारड्या आहेत.  कॅप्टन अशोक खरात काय लायकीचा माणूस आहे हे रूपाली चाकणकर यांना चांगलेच माहिती होते. खरात याची दुष्यकृत्य बाहेर आणण्याचा प्रयत्न एका स्थानिक वृत्तपत्राने केला तेव्हा त्याच्यावर कायदेशीर कारवाई करण्याची धमकी देत त्याच्याकडून चाकणकर बाईंनी माफीनामा घेतला. 

ज्या चाकणकर बाई मला या प्रकरणाची माहिती नव्हती असं सांगत आहेत त्या बाई या माफीनाम्याच्या संबंधाने काय बोलणार आहेत? 

राष्ट्रवादी काँग्रेसचे प्रदेशाध्यक्ष सुनील तटकरे यांना आपल्या पक्षाच्या प्रतिमेची फार काळजी असेल तर तटकरेंनी सांगावं, "पीडित महिलांना न्याय देण्याऐवजी महिलांचेच चारित्र्य हनन करण्याचा प्रयत्न करणाऱ्या, कधी वैष्णवी हगवणे कधी तनिषा दिसे तर कधी डॉक्टर संपदा मुंडे यांच्या चारित्र्यावर शिंतोडे उडवण्याचा प्रयत्न करत साततात्याने वादग्रस्त ठरलेल्या चाकणकर यांना महिला आयोगावर ठेवण्यात पक्षाची कोणती राजकीय अपरिहार्यता आहे? 

टीप: वृत्तपत्राने दिलेले सदरील माफीनामा पत्र बघता रूपाली चाकणकरांना या खरात प्रकरणाची संपूर्ण माहिती एक वर्ष आधीपासूनच होती मात्र याच्या मुळाशी जाण्यापेक्षा पिढीचांवरच आणि पिढी त्यांना न्याय देणाऱ्यांवरच दबाव आणण्यात चाकणकरांनी धन्यता मानली हे विशेष आहे.

Rupali Chakankar On Ashok Kharat : काय म्हणाल्या होत्या रुपाली चाकणकर? 

दरम्यान, अशोक खरातचे कांड समोर आल्यानतंर त्यावर रुपाली चाकणकर यांनी प्रतिक्रिया दिली. कॅप्टन खरातांच्या वैयक्तिक आयुष्य किंवा त्यांच्यावर झालेल्या आरोपांबाबत मला कल्पना नाही. आता जे आरोप होत आहेत त्याबाबत पोलीस निष्पक्षपणे चौकशी करतील, पोलिस तपासावर माझा पूर्ण विश्वास आहे, असं रुपाली चाकणकर म्हणाल्या. 

ही बातमी वाचा: