Maharashtra Education Scam : सहावीच्या विद्यार्थ्यांकडून दहावीचे पेपर तपासले, 268 शिक्षकांनी दिव्यांग, घटस्फोटीत असल्याचं सांगत बदली करुन घेतली; शिक्षण व्यवस्थेची लक्तरे वेशीवर
Maharashtra Education Scam : साताऱ्यात आणि अकोल्यामध्ये घडलेल्या दोन घटनांमुळे राज्यातील शिक्षण व्यवस्था कशा पद्धतीने कोलमडली आहे याचा प्रत्यय आला आहे.
मुंबई : राज्यातील शिक्षण क्षेत्रात दोन धक्कादायक प्रकार समोर आले असून शिक्षण व्यवस्थेवर गंभीर प्रश्नचिन्ह निर्माण झाले आहे. सातारा येथे दहावीच्या विद्यार्थ्यांचे पेपर सहावीच्या विद्यार्थ्यांकडून तपासून घेतल्याचा प्रकार उघड झाला आहे, तर अकोला येथे शिक्षक बदली प्रक्रियेत मोठा घोटाळा समोर आला आहे.
Satara Paper Scandal : सहावीच्या विद्यार्थ्याकडून दहावीचे पेपर तपासले
साताऱ्यातील फलटण तालुक्यातील विडणी येथील उत्तरेश्वर हायस्कूल आणि ज्युनिअर कॉलेजमध्ये हा प्रकार घडल्याचे समोर आले आहे. या प्रकरणात सहावीच्या विद्यार्थ्याकडून दहावीचे पेपर तपासून घेतले जात असल्याचा धक्कादायक प्रकार उघड झाला, ज्यामुळे शिक्षण व्यवस्थेची गुणवत्ता आणि विश्वासार्हता यावर प्रश्न उपस्थित झाले आहेत. या वेळी संबंधित शिक्षकांचे नाव वैभव शेंडे असल्याची माहिती समोर आली आहे. त्याचवेळी असा कोणताही प्रकार झाला नसल्याचा दावा शाळेने केला.
Satara SSC Paper Checking Scam : तक्रारदारालाच नोटीस
हा प्रकार उघड करणाऱ्या तक्रारदारालाच संस्थेकडून कारणे दाखवा नोटीस बजावण्यात आल्याने वाद अधिकच वाढला आहे. विशेष म्हणजे, पेपर तपासणारा शिक्षक आणि तक्रार करणारा व्यक्ती या दोघांनाही समान नोटीस देण्यात आली, अशी माहिती समोर आली आहे.
Akola Transfer Scam : 268 शिक्षकांनी बोगस प्रमाणपत्रे वापरली
दुसरीकडे अकोला जिल्हा परिषद शिक्षण विभागात आंतरजिल्हा शिक्षक बदली प्रक्रियेत मोठा घोटाळा उघड झाला आहे. बदलीत फायदा मिळवण्यासाठी 268 शिक्षकांनी दिव्यांग, परित्यक्त आणि अंतराच्या नावाखाली बोगस प्रमाणपत्रे सादर केल्याचे निष्पन्न झाले आहे. काही शिक्षकांनी स्वतःला दिव्यांग दाखवले, तर काहींनी खोटा घटस्फोट दाखवून लाभ मिळवण्याचा प्रयत्न केला, अशी माहिती चौकशीत समोर आली आहे.
Maharashtra Education Scam : अधिकाऱ्यांवर निलंबनाची कारवाई
या प्रकरणात प्रभारी गट शिक्षणाधिकारी दिनेश दुतोंडे यांच्यासह चार जणांना निलंबित करण्यात आले आहे. तसेच सुमारे 300 जणांवर कारवाईची टांगती तलवार असल्याचे सांगितले जात आहे.
Teachers Transfer Scam : चौकशीत गंभीर त्रुटी
तक्रारीनंतर झालेल्या त्रिस्तरीय चौकशीत अनेक अहवाल त्रुटीपूर्ण आढळले असून, अपात्र शिक्षकांना बदलीचा लाभ मिळाल्याचे स्पष्ट झाले आहे. यामुळे शिक्षण विभागाच्या पारदर्शकतेवर गंभीर प्रश्नचिन्ह निर्माण झाले आहे.
Education System Collapsed : शिक्षण व्यवस्थेवर प्रश्न
एकीकडे विद्यार्थ्यांच्या भवितव्याशी खेळ करणारे प्रकार, तर दुसरीकडे शिक्षकांकडूनच नियमांचा गैरवापर होत असल्याने सातारा ते अकोल्यातील शिक्षणातील घोटाळ्यांमुळे शिक्षण व्यवस्थेचे नुकसान होत असल्याची भावना व्यक्त होत आहे.
ही बातमी वाचा:
महत्त्वाच्या बातम्या
