प्रल्हाद कुमार अपहरण प्रकरण, आरोपी दिलीप खेडकरला जामीन नाकारला, बेलापूर कोर्टाचा महत्वपूर्ण निर्णय

प्रल्हाद कुमार अपहरण प्रकरणातील मुख्य आरोपी दिलीप खेडकरला जामीन मिळावा यासाठी बेलापूर कोर्टात सुनावणी घेण्यात आली. यामध्ये खेडकरला जामीन नाकारला आहे.  

Prahlad Kumar kidnapping case

Source : Getty Images

Navi Mumbai News :  रबाळे पोलिस ठाण्याच्या (Rabale Police Thane) हद्दीत झालेल्या मिक्सर क्लिनर प्रल्हाद कुमार या तरुणाच्या अपहरणात मुख्य आरोपी दिलीप खेडकर, प्रफुल्ल साळुंखे आणि मनोरमा खेडकर यांच्यावर गुन्हा दाखल करण्यात आला होता. यातील प्रफुल्ल साळुंखेला अटक करण्यात आली आहे. तर मुख्य आरोपी दिलीप खेडकर अद्याप फरार आहे. या प्रकरणातील मुख्य आरोपी दिलीप खेडकरला जामीन मिळावा यासाठी बेलापूर कोर्टात सुनावणी घेण्यात आली. यामध्ये खेडकरला जामीन नाकारला आहे.  

मिक्सर चालक प्रल्हाद कुमार यांच्या अपहरण प्रकरणात मुख्य आरोपी दिलीप खेडकर हा फरार आहे. सहआरोपी मनोरमा खेडकरला 13 तारखे पर्यंत अंतरीम जामीन झाला आहे. तर तिसरा आरोपी चालक प्रफुल साळुंखे अटकेत आहे.

नेमकं प्रकरण काय?

13 सप्टेंबर रोजी सायंकाळी सुमारे सव्वा सातच्या सुमारास मुलुंड ते ऐरोली मार्गावर सिमेंट मिक्सर ट्रक आणि MH 12 RP 5000 नंबरच्या कारमध्ये अपघात झाला. या ट्रकमध्ये चालक चंदकुमार चव्हाण आणि हेल्पर प्रल्हाद कुमार हे दोघे होते, तर कारमध्ये दोन अज्ञात व्यक्ती होते. अपघातानंतर दोन्ही बाजूंमध्ये वाद झाला आणि त्याच वेळी, कारमधील दोघांनी हेल्पर प्रल्हाद कुमारला जबरदस्तीने त्यांच्या कारमध्ये बसवून घेतले. त्यांनी ट्रक आमच्या मागे आणा, असे चालकाला बजावले, मात्र काही अंतर गेल्यावर कार नजरेआड झाली. घाबरलेल्या ट्रक चालकाने घटनेची माहिती ट्रक मालक विलास ढेंगरे यांना दिली. ढेंगरेंनी तात्काळ नवी मुंबईच्या रबाळे पोलीस ठाण्यात अपहरणाची तक्रार दाखल केली. तक्रार दाखल होताच पोलिसांनी तपास सुरू केला. तपासात MH 12 RP 5000 क्रमांकाची कार पुण्यातील पूजा खेडकर यांच्या घरात उभी असल्याचे निष्पन्न झाले. त्वरित कारवाई करत नवी मुंबई पोलिसांची टीम खेडकर कुटुंबाच्या पुण्यातील घरी पोहोचली. पोलिसांनी घरी पोहोचल्यावर खेडकर यांच्या आईने गेट उघडण्यास नकार दिला. त्यानंतर पोलिसांनी प्रश्नांची सरबत्ती करत छाननी सुरू ठेवली. काही वेळाने खेडकर यांच्या घरातून ट्रक हेल्पर प्रल्हाद कुमार याची सुटका करण्यात आली.

या प्रकरणात अनेक गंभीर प्रश्न उपस्थित झाले आहेत. अपहरण झालेला हेल्पर खेडकर कुटुंबाच्या घरात कसा पोहोचला? अपघातात वापरलेली कार त्यांच्या ताब्यात कशी आली? अपघातातील दोघे आरोपी कोण होते आणि त्यांचा खेडकर कुटुंबाशी नेमका काय संबंध आहे? या सर्व बाबींची चौकशी नवी मुंबई पोलीस करत आहे. दरम्यान मनोरमा खेडकर यांनी जामीन याचिकेत स्वतःला फसवले जात असल्याचा दावा केला आणि तपासात सहकार्य करण्याचे आश्वासन दिले. न्यायालयाने त्यांची याचिका मान्य करत अटक पासून संरक्षण दिले.

महत्वाच्या बातम्या: