Maharashtra News Updates 9th March 2023 : आज भरती आहे.... उद्या ओहोटी येणार हे भाजपने लक्षात ठेवावं; राज ठाकरेंचा इशारा
Maharashtra News LIVE Updates : दिवसभरातील ताज्या घडामोडी, महत्त्वाचे अपडेट्स, देशभरासह राज्यातील राजकीय, सामाजिक, आर्थिक, क्रीडा तसेच इतर अपडेट्स या लाईव्ह ब्लॉगमध्ये...
LIVE
Background
Maharashtra News LIVE Updates : दिवसभरातील ताज्या घडामोडी, महत्त्वाचे अपडेट्स, देशभरासह राज्यातील राजकीय, सामाजिक, आर्थिक, क्रीडा तसेच इतर अपडेट्स या लाईव्ह ब्लॉगमध्ये...
आज राज्याचा अर्थसंकल्प सादर करण्यात येणार आहे. शिंदे-फडणवीस सरकार सत्तेवर आल्यानंतर त्यांच्या हा पहिलाच अर्थसंकल्प असणार आहे. उपमुख्यमंत्री देवेंद्र फडणवीस यांच्याकडे अर्थ खाते आहे. त्यामुळे अर्थमंत्री म्हणून उपमुख्यमंत्री देवेंद्र फडणवीस आपला पहिला अर्थसंकल्प सादर करणार आहेत. स्थानिक स्वराज्य संस्थांच्या आगामी निवडणुका लक्षात घेता या अर्थसंकल्पात मोठ्या घोषणा होण्याची दाट शक्यता आहे.
अहमदाबाद
ऑस्ट्रेलियाचे पंतप्रधान भारत दौऱ्यावर आले आहेत. पंतप्रधान नरेंद्र मोदी यांच्यासोबत विविध मुद्यांवर चर्चा करणार आहेत. दोन्ही देशांचे पंतप्रधान भारत विरुद्ध ऑस्ट्रेलिया सामन्यात हजेरी लावण्याची शक्यता आहे.
मुंबई
महाराष्ट्र राज्य वरिष्ठ महाविद्यालय प्राध्यापक आणि कर्मचारी संघटनेनं आझाद मैदानावर आंदोलन सुरु केलंय. हे सर्व कर्मचारी प्राध्यापक 2001 नंतरच्या कायम विनाअनुदानित महाविद्यालयातील आहेत.
ठाणे
9 मार्च 2006 साली स्थापन झालेल्या मनसेला आज 17 वर्ष पूर्ण होत आहेत. या निमित्त गडकरी रंगायथन मध्ये संध्याकाळी 6 वाजता राज ठाकरेंची सभा होणार आहे.
नाशिक
ख्रिस्ती समाजावर होत असलेले अन्याय-अत्याचार, सातत्याने केले जाणारे धर्मांतरांचे आरोप, ख्रिस्ती संस्थांबाबत सापत्नभावांची वागणूक तसेच शासनाचे ख्रिस्ती समाजाबद्दलचे दुर्लक्षिततेचे धोरण याविरोधात ख्रिस्ती समाज बांधवातर्फे मूकमोर्चा काढण्यात येणार आहे.
पुणे
संत तुकाराम महाराजांचा 375 वा बिजोत्सव, देहू येथे कार्यक्रमांचे आयोजन
खासदार सुप्रिया सुळे या दौंड तालुक्यातील गाव भेटीच्या दौऱ्यावर असणार आहेत. दौंड तालुक्यातील विविध गावांना सुप्रिया सुळे भेट देतील.
छत्रपती संभाजीनगर
औरंगाबादचं नाव छत्रपती संभाजीनगर केल्याच्या निषेधार्थ सुरू असलेल्या साखळी आंदोलनाचा पाचवा दिवस. आज संध्याकाळी 7 वाजता जिल्हाधिकारी कार्यालय ते डॉक्टर बाबासाहेब आंबेडकर पुतळा भडकल गेट कॅण्डल मार्च काढणार आहेत.
सांगली
गॅस दरवाढीच्या निषेधार्थ सांगलीतील मदन भाऊ पाटील युवा मंचाकडून स्मशानभूमी मध्ये गॅसचे दहन करण्यात येणार आहे, सकाळी 11 वाजता.
जळगाव
कापूस दरासह विविध मागण्यांसाठी मंत्री गिरीश महाजन यांच्या जामनेर मतदार संघात बोडवड चौफुली ते तहसीलदार कार्यालयावर महाविकास आघाडीकडून जन आक्रोश मोर्चा काढण्यात येणार आहे.
निर्णायक कसोटी सामना
India vs Australia 4th Test : बॉर्डर गावस्कर ट्रॉफीमधील अखेरचा सामना नऊ मार्च रोजी अहमदाबादमध्ये होत आहे. चार सामन्याच्या कसोटी मालिकेत भारताने 2-1 ने आघाडी घेतली आहे. आता निर्णायक कसोटी सामन्यात कोण बाजी मारणार? याकडे क्रीडा विश्वाचं लक्ष लागलेय. भारतीय संघात काही बदल होण्याची शक्यता आहे. केएस भरतच्या जागी ईशान किशन याला संधी मिळण्याची शक्यता आहे. तर उमेश यादव याच्या जागी मोहम्मद शामी संघात परतणार आहे.
अकोला - विद्यार्थ्यांच्या दोन गटांमध्ये जोरदार हाणामारी
अकोला जिल्ह्यातील मूर्तिजापूर शहरात आज दुपारी विद्यार्थ्यांच्या दोन गटांमध्ये जोरदार हाणामारी झालीये. हे विद्यार्थी दहावीचे विद्यार्थी असल्याची माहिती मिळतीये. होळीच्या दिवशी रंग लावण्याच्या वादातून ही हाणामारी झाल्याचं बोललं जातंये. यात 8 जण जखमी झालेयेत. याप्रकरणी मूर्तिजापूर शहर पोलिसांनी 8 जणांवर गुन्हे दाखल केलेयेत. पोलिसांनी दोन आरोपींना अटक केलीये. जखमींवर मुर्तिजापूरच्या लक्ष्मीबाई देशमुख ग्रामीण रुग्णालयात उपचार सुरूयेत.
आगीत एका ८५ वर्षीय महिलेचा मृत्यू, वसईतील घटना
वसई येथे एका केमिकल फॅक्टरीला भीषण आग लागली होती. या आगीत एका ८५ वर्षीय महिलेचा मृत्यू झाला आहे. तर तीन जण जखमी झाले आहेत. सध्या त्यांच्यावरजवळच्या रुग्णालयात उपचार सुरु आहेत. घटना आज पावणे चार वाजताची आहे. थिनर ने भरलेल्या ड्रमला शॉर्टसर्किटमुळे आग लागल्याचा अंदाज वर्तवण्यात येतोय.
वसईच्या सातीवली येथील तुंगारफाटा येथे एका केमिकल कंपनीला भीषण आग लागली होती. या आगीत सूरय्याबानू अजगरअली या ८५ वर्षीय महिलेचा मृत्यू झाला आहे. तर दिनेश पासवान (वय २५ वर्षे), कमलेश यादव (वय २४ वर्ष) आणि विजय यादव (वय ३५ वर्ष) हे तिघे जखमी झाले आहेत. त्यांच्यावर जवळच्या रुग्णालयात उपचार सुरु आहेत. त्यांची प्रकृती स्थिर आहे.
आगीचा स्फोट एका मागून एक होत होता. या स्फोटाची भीषणात मोबाईल कॅमे-यत कैद झाली आहे. या आगीच्या घटनेने संपूर्ण परिसरात एकच खळबळ उडाली होती. घटनेची माहिती मिळताच वसई विरार अग्निशमन दलाच्या पाच गाड्या घटनास्थळी दाखल झाल्या होत्या. आग विझवण्यासाठी अग्निशमन दलाच्या जवानाना फार मेहनत घ्यावी लागली होती. दोन तासानंतर आग विझवण्यात अग्निशमन दलाला यश आलं होतं.
Vasai : केमिकल फॅक्टरीला भीषण आग; एका 85 वृद्धेचा मृत्यू, तीन जण जखमी
Vasai News : वसई : वसई येथे एका केमिकल फॅक्टरीला भीषण आग लागली होती. या आगीत एका 85 वर्षीय महिलेचा मृत्यू झाला आहे. तर तीन जण जखमी झाले आहेत. सध्या त्यांच्यावर जवळच्या रुग्णालयात उपचार सुरु आहेत. ही घटना आज 3.45 वाजण्याच्या सुमारास घडली. थिनरने भरलेल्या ड्रमला शॉर्टसर्किटमुळे आग लागल्याचा अंदाज वर्तवण्यात येत आहे.
Raj Thackeray: आज भरती आहे.... उद्या ओहोटी येणार हे भाजपने लक्षात ठेवावं; राज ठाकरेंचा इशारा
प्रत्येक पक्षाच्या इतिहासात भरती-ओहोटी आलेली आहे, 65 वर्षे सत्तेत असलेल्या काँग्रेसची आजची अवस्था काय आहे? त्यामुळे आज भरती आहे... उद्या ओहोटी येणार हे भाजपने लक्षात ठेवावं असा इशारा मनसे अध्यक्ष राज ठाकरे यांनी दिला आहे. मनसेच्या 17 व्या वर्धापन दिनाच्या कार्यक्रमात ते बोलत होते. यावेळी 'आम्ही काय केलं' हे डिजिटल डॉक्युमेंट्स प्रकाशित करण्यात आलं.
माहूरगडावर नारिशक्ती चित्ररथाचे प्रचंड जल्लोषात स्वागत
प्रजासत्ताक दिनी नवी दिल्ली येथील कर्तव्यपथावर संचलन सोहळ्यात गौरवान्वित झालेल्या महाराष्ट्राच्या साडेतीन 'शक्तीपीठे नारिशक्ती' या चित्ररथाचे गुरुवार दि.9 मार्च रोजी स.11 वा.श्रीक्षेत्र माहूरगड येथे जल्लोषात स्वागत करण्यात आले.
स्थानिक विश्रामगृहावर प्रशासनाचे वतीने श्री रेणुकादेवी संस्थानचे कोषाध्यक्ष तथा तहसीलदार किशोर यादव, मुख्याधिकारी डॉ. राजकुमार राठोड, नगराध्यक्ष फिरोज दोसाणी, उपनगराध्यक्ष ज्ञानेश्वर लाड, विश्वस्त चंद्रकांत भोपी, संजय काण्णव, समीर भोपी यांच्या हस्ते विधिवत पूजा करण्यात आली.त्यानंतर चित्ररथाच्या शोभा यात्रेस प्रारंभ झाला.
आदिवासी समाजाचे ढेमसा नृत्य व बंजारा समाजातील महिलांच्या लेंगी नृत्याने शोभा यात्रेत अधिक रंगत आणली.कार्यालयीन अधीक्षक वैजनाथ स्वामी यांचे मार्गदर्शनात स्वच्छता दूत गणेश जाधव आणि अग्निशमन चालक शे. मनसूर व त्यांच्या सहकाऱ्यांनी स्वच्छतेची जनाबदारी चोख बजावली. शहरातील सुवासिनीनी जागोजाग काढलेल्या रांगोळी डोळ्याचे पारणे फेडत होत्या. शोभयात्रेत फोस्टर किड्स शाळेचे विद्यार्थी, शहरातील नागरिक, महिला व पत्रकारांची मोठया संख्येने उपस्थिती होती. श्री रेणुकादेवी संस्थानच्या सुरक्षा रक्षकांनी सुव्यवस्थेचे उत्तम नियोजन केले होते. शोभा यात्रेचा पहिला मान दिल्याबद्दल शासनाचा सांस्कृतिक विभाग, ना. सुधीर मुनगंटीवार व आ. भीमराव केराम यांचे माहूरकरांनी ऋण व्यक्त केले.
महत्त्वाच्या बातम्या
ट्रेंडिंग न्यूज
