छ. संभाजीनगरात थकीत वीजबिल वसुलीसाठी आलेल्या महावितरणाच्या पथकाला मारहाण; व्हिडीओ व्हायरल
Chhatrapati Sambhajinagar: याप्रकरणी विद्युत सहायकांनी दिलेल्या तक्रारीवरून सिल्लोड ग्रामीण पोलिसात मारहाण करणाऱ्या व्यक्तीच्या विरोधात गुन्हा दाखल करण्यात आला आहे.
Chhatrapati Sambhajinagar News: छत्रपती संभाजीनगर जिल्ह्यातील (Chhatrapati Sambhajinagar District) सिल्लोडच्या वाघदावाडीत एक धक्कादायक घटना समोर आली असून, थकीत वीजबिल वसुलीसाठी गेलेल्या महावितरणाच्या (Mahavitaran) पथकाला मारहाण करण्यात आल्याचा प्रकार समोर आला आहे. शुक्रवारी (3 मार्च) रोजी दुपारी 12.30 वाजता ही घटना घडली असून, याचा व्हिडीओ सोशल मीडियावर व्हायरल झाला आहे. तर याप्रकरणी विद्युत सहायक यांनी दिलेल्या तक्रारीवरून सिल्लोड ग्रामीण पोलिसात मारहाण करणाऱ्या व्यक्तीच्या विरोधात गुन्हा दाखल करण्यात आला आहे. विशाल गोवर्धन बैरागी (वय 24 वर्ष असे मारहाण झालेल्या विद्युत सहायकाचे नाव असून, रामसिंग सरदारसिंग महेर (रा.वाघदावाडी ता. सिल्लोड) असे मारहाण करणाऱ्या व्यक्तीचे नाव आहे.
दरम्यान याबाबत अधिक माहिती अशी, थकीत वीजबिल वसुलीसाठी महावितरणकडून मोहीम राबवली आहे. छत्रपती संभाजीनगर जिल्ह्यातील अनेक भागात अशाप्रकारे महावितरण विभागाचे पथक मोहीम राबवत वीजबिल वसुली करत आहे. दरम्यान सिल्लोड तालुक्यात देखील अशाचप्रकारे मोहीम राबवली जात आहे. मात्र काही ठिकाणी या मोहिमेला विरोध होताना देखील पाहायला मिळत आहे. तर अशीच काही घटना सिल्लोड तालुक्यातील वाघदावाडी येथे समोर आली आहे. थकीत वीजबिल वसुलीसाठी गेलेल्या महावितरणच्या पथकाला मारहाण याठिकाणी चक्क मारहाण करण्यात आल्याचा प्रकार समोर आला आहे.
नेमकं काय घडलं!
सिल्लोडच्या भराडी सर्कलचे विद्युत सहायक विशाल गोवर्धन बैरागी यांनी सिल्लोड ग्रामीण पोलिसात दिलेल्या तक्रारीत म्हंटले आहे की, आम्ही वसुली पथक सोबत वाघदावाडी येथे गेलो होतो. यावेळी गावातील रामसिंग यांना थकीत वीज बिल का भरले नाही याबाबत विचारणा केली. तर याचाच राग आल्याने रामसिंगने महावितरणाच्या पथकाला शिविगाळ करून दगड फेकून मारला. यावरून रामसिंग सरदारसिंग महेर याच्या विरोधात गुन्हा दाखल करण्यात आला आहे. तर पुढील तपास फौजदार विकास आडे हे करत आहे.
व्हिडीओ व्हायरल!
दरम्यान महावितरणाच्या पथकाला मारहाण करतानाचा व्हिडिओ देखील समोर आला आहे. ज्यात रामसिंग हातात दगड घेऊन महावितरण पथकाच्या अंगावर धावून जात आहे. तसेच त्यांना शिवीगाळ देखील करत आहे. यावेळी महावितरणचे कर्मचारी आणि इतर लोकं वाद सोडवण्याचा प्रयत्न करताना पाहायला मिळत आहे. मात्र रामसिंग कुणाचेही आयकत नसून, पथकाला मारहाण करण्यासाठी अंगावर जात असल्याचे व्हिडिओमध्ये पाहायला मिळत आहे. तर त्याचे कुटुंबातील सदस्य देखील त्याला समजवण्याचा प्रयत्न करत होते, पण तो कोणाचेही आयकून घेण्याच्या मनस्थितीत नव्हता. त्यामुळे अखेर या प्रकरणी महावितरणच्या पथकाने पोलिसात धाव घेत, गुन्हा दाखल केला आहे.
इतर महत्वाच्या बातम्या: