Maharashtra Breaking News LIVE Updates : भाजप नेते किरीट सोमय्या यांना बीड दौऱ्यापूर्वी धमकी
Maharashtra Breaking News LIVE Updates : दिवसभरातील ताज्या घडामोडी, महत्त्वाचे अपडेट्स, देशभरासह राज्यातील कोरोना संबंधित, राजकीय, सामाजिक, आर्थिक, क्रीडा तसेच इतर अपडेट्स या लाईव्ह ब्लॉगमध्ये
LIVE
Background
आनंदवार्ता! नव्या वर्षात सिडकोच्या पाच हजार घरांसाठी लॉटरी निघणार
परवडणाऱ्या घरांचे स्वप्न पाहणाऱ्या नागरिकांचे नवी मुंबईत घर घेण्याचे स्वप्न पूर्ण होणार आहे. नवी मुंबईत सिडकोच्यावतीने पाच हजार घरांसाठी लॉटरी प्रक्रिया सुरू करण्यात येणार आहे. राज्याचे नगरविकास मंत्री एकनाथ शिंदे यांनी ही माहिती दिली आहे. नवी मुंबईतील कळंबोली, तळोजा आणि द्रोणागिरी आदी ठिकाणी ही घरे असणार आहेत. नवी मुंबईत सिडकोच्यावतीने पाच हजार घरांची ‘महागृहनिर्माण’योजना आहे. या घरकुल योजनेअंतर्गत अत्यल्प उत्पन्न गट, अल्प उत्पन्न गटांतील नागरिकांकरिता घणसोली, खारघर, कळंबोली, तळोजा आणि द्रोणागिरी येथे घरे उपलब्ध होणार आहेत. या घरांसाठीच्या लॉटरीची प्रक्रिया जानेवारी 2022 पासून सुरू करण्यात येणार असल्याचे नगरविकास मंत्री एकनाथ शिंदे यांनी म्हटले.
विनामास्क फिरणाऱ्या आमदाराला 200 रुपयांचा दंड, मंत्रालय पोलिसांची कारवाई
राज्यात दिवसागणिक ओमायक्रॉनच्या रुग्णांची संख्या वाढत असतानाही, लोकप्रतिनिधींना त्या वास्तवाचा सोयीस्कर विसर पडत असल्याचं वारंवार दिसून येत आहे. मंत्रालयात बिनधास्तपणे विनामास्क फिरणारे भाजप आमदार मंगेश चव्हाण यांच्यावर तर कारवाई करण्याची वेळ पोलिसांवर आली. मंगेश चव्हाण हे चाळीसगावचे आमदार आहेत. मंत्रालयातून बाहेर पडताना त्यांनी मास्क परिधान केलेला नसल्यामुळं त्यांच्यावर कारवाई करण्यात आली. मंगेश चव्हाण यांना पोलिसांनी 200 रुपयांचा दंड ठोठावला. त्या पार्श्वभूमीवर, आमदारांवर कारवाई करणाऱ्या पोलिसांचं मंत्रालयात कौतुक होत आहे. महाविकास आघाडी महावसुली करत असल्याचा आरोप मंगेश चव्हाण यांनी केला आहे. दरम्यान, महाराष्ट्रावर ओमायक्रॉनचे संकट दिवसेंदिवस वाढत चालले आहे. राज्यात आता ओमायक्रॉन रुग्णांची संख्या 28 वर पोहोचली आहे. मुंबई, पुणे, पिंपरी चिंचवड, नागपूरमध्ये ओमायक्रॉनचे रुग्ण आढळले आहेत.भारतातील नागरिक आता मास्कचा वापर करणे कमी करत आहेत. खासकरून ज्या लोकांनी कोरोना लसीचे दोन्ही डोस घेतले आहेत त्यांनी मास्कचा वापर करणे कमी केलं आहे. ही गोष्ट चिंताजनक आहे. जगभरातली परिस्थिती पाहून तरी भारतीय लोकांनी कोरोनाच्या नियमांचे पालन करणे आवश्यक असल्याचं निती आयोगाचे सदस्य व्हीके पॉल म्हणाले.
भाजप नगरसेविका पुत्रावर खंडणी अपहरणचा गुन्हा दाखल
भाजपच्या मुलुंड येथील नगरसेविका रजनी केणी यांच्या मुलांसह तिघांवर नवघर पोलीस ठाण्यात खंडणी आणि अपहरण प्रकरणी गुन्हा दाखल करण्यात आला आहे. पालिकेच्या एका कंत्राटदराने हा गुन्हा दाखल केला आहे. केणी यांच्या विभागात असलेले एक काम ऑनलाइन टेंडर मध्ये त्या कंत्राटदारला लागले होते. मात्र हे टेंडर त्याने मागे घ्यावे म्हणून केणी यांचा मुलगा नमित केणी याने त्या कंत्राटदारला कार्यालयात बोलावून धमकावले आणि टेंडर मागे घेण्यास सांगितले. त्यानंतर मनोज जाधव आणि गोविंद जाधव यांच्या मदतीने त्याला बळजबरीने पालिका टी विभागात नेण्यात आले आणि तिथे कंत्राटमागे घेण्यास भाग पाडल्याचा आरोप या कंत्राटदारने त्याच्या तक्रारीत केला आहे. या प्रकरणी आता नवघर पोलिसांनी गुन्हा दाखल केला असून पुढील तपास नवघर पोलीस करीत आहेत.
अंबरनाथमध्ये पुन्हा एकदा बिबट्याची शिकार, जणांवरांवर हल्ला
अंबरनाथमध्ये पुन्हा एकदा बिबट्यानं शिकार केल्यामुळे घबराट पसरली आहे. अंबरनाथ शहरालगतच्या वसत गाव परिसरात महिनाभरात तिसऱ्यांदा बिबट्याने दर्शन दिलं असून स्थानिक ग्रामस्थांच्या पाळीव प्राण्यांची शिकार केली आहे. त्यामुळे या परिसरात मोठी घबराट पसरली आहे.
सर्वोच्च न्यायालयाचा ओबीसी आरक्षणाबद्दलचा निर्णय दुर्दैवी - एकनाथ खडसे
सर्वोच्च न्यायालयाने ओबीसींच्या 27 टक्के आरक्षणाबाबत काढलेला अध्यादेश रद्द केला. यानंतर हा निर्णय अतिश दुर्देवी असून ओबीसीसह इतर मागासवर्गीय समुदायावर अन्याय करणारा आहे. तसंच केंद्र सरकारने इंपेरिकल डाटा न दिल्यामुळे ही स्थिती उद्भवली. आता काहीही करू पण आरक्षण मिळाल्याशिवाय निवडणुका घेऊ नका, अशी प्रतिक्रिया राष्ट्रवादी कॉंग्रेसचे ज्येष्ठ नेते एकनाथराव खडसे यांनी दिली आहे.
अमरावती-अकोला एटीएस पथकाकडून 53 किलो गांजा जप्त
अमरावती शहरातील ट्रान्सपोर्ट नगर येथे एटीएस पथकांनी दोघांना गांजा विकताना ताब्यात घेतलं आहे. यावेळी त्यांच्याकडून 53 किलो गांजा ज्याची किंमत साडे पाच लाख रुपये इतकी आहे. अमरावती पोलीसांना याची काहीही कल्पना न देता केलेल्या या कारवाईने शहर पोलिसात चांगलीच चर्चा सुरू आहे.
भाजप नेते किरीट सोमय्या यांना बीड दौऱ्याअगोदर मेसेजवर धमकी
भाजप नेते किरीट सोमय्या यांना व्हॉट्सअप मेसेजवर धमकी देण्यात आली आहे. उद्या किरीट सोमय्या हे बीड जिल्हयात जाण्याआधीच त्यांना धमकीचा मेसेज देण्यात आला आहे. पोलीस अधीक्षक आर राजा यांच्याकडे सोमय्यांनी तक्रार केली आहे.
महत्त्वाच्या बातम्या
ट्रेंडिंग न्यूज
