Sudhir Mungantiwar : वन्य प्राण्यांच्या हल्ल्यात गाय, म्‍हैस, बैलाचा मृत्यू झाल्‍यास 70 हजार रुपयांची मदत मिळणार : सुधीर मुनगंटीवार
वन्य प्राण्यांच्या हल्ल्यात मृत पावलेल्‍या व्‍यक्‍तीच्‍या कुटुंबियांना देण्‍यात येणाऱ्या अर्थसहाय्याच्‍या रकमेत वाढ करण्यात आली आहे.
Sudhir Mungantiwar : वन्य प्राण्यांच्या हल्ल्यात मृत पावलेल्‍या व्‍यक्‍तीच्‍या कुटुंबियांना देण्‍यात येणाऱ्या अर्थसहाय्याच्‍या रकमेत वाढ करण्यात आली आहे. पूर्वी 15 लाख रुपयांचे अर्थसहाय्य केलं जातं होतं, आता यामध्ये वाढ करुन ते 20 लाख रुपये करण्यात आलं आहे. तसेच वन्य प्राण्यांच्या हल्ल्यात गाय, म्‍हैस, बैल यांचा मृत्यू झाल्‍यास देण्‍यात येणाऱ्या 60 हजार रूपयांच्या रकमेत वाढ करुन ती 70 हजार रूपये करण्यात आली आहे. याबाबतचा निर्णय वनमंत्री सुधीर मुनगंटीवार (Sudhir Mungantiwar) यांनी विधान परिषदेत जाहीर केला.
2021-22 मध्ये वन्य प्राण्यांच्या हल्ल्यात 86 जणांचा मृत्यू
राज्‍याच्‍या वनविभागाच्‍या माध्यमातून उत्‍तम पद्धतीने वनसंवर्धनाचे कार्य सुरु असल्‍याने वन्‍यप्राण्‍यांच्‍या संख्‍येत मोठया प्रमाणावर वाढ झाली आहे. मानव आणि वन्‍यजीव संघर्ष कमी करण्‍याच्‍या दृष्‍टीने वनालगतच्‍या गावांमध्‍ये राहणाऱ्या नागरिकांचे वन विभागामार्फत प्रबोधन करण्यात येत आहे. डॉ. श्‍यामाप्रसाद मुखर्जी जन-वन विकास योजनेमार्फत स्‍थानिक जनतेचे वनावरील अवलंबीत्‍व कमी करण्‍याचा प्रयत्‍न करण्यात येत आहे. वन्य प्राण्यांच्या हल्‍ल्‍यामध्‍ये सन सन 2019-20 या वर्षी 47 तर 2020-21 ला 80 आणि 2021-22 ला 86 इतकी मनुष्यहानी झाल्याची माहिती मुनगंटीवार यांनी दिली आहे. मनुष्यहानी झालेल्या व्‍यक्‍तींच्‍या अवलंबित कुटुंबियांना वाघ, बिबट्या, रानडुक्‍कर, गवा, अस्‍वल, लांडगा, कोल्‍हा, हत्‍ती व रानडुकरे यांच्‍या हल्ल्यात होणाऱ्या मनुष्‍यहानीमुळे देण्‍यात येणाऱ्या अर्थसहाय्याच्‍या रकमेत वाढ करण्‍याचा निर्णय घेण्यात आला आहे. यापुढे 15 लाखांऐवजी 20 लाखांचे अर्थसहाय्य देण्‍यात येणार आहे.
कायम अपंग झाल्‍यास 5 लाखांची मदत
दरम्यान, अर्थसहाय्य मिळणाऱ्या 20 लाखापैकी 10 लाख रुपये देय असलेल्‍या व्‍यक्‍तीला तत्‍काळ धनादेशाद्वारे आणि उर्वरित रक्‍कम रुपये 10 लाख त्‍यांच्‍या राष्‍ट्रीयकृत बॅंकेत असलेल्‍या दरमहा व्‍याज देणाऱ्या संयुक्‍त खात्‍यामध्‍ये ठेव रक्‍कम अर्थात फिक्‍स डिपॉझीट जमा करण्‍याचा निर्णय घेण्यात आला आहे. व्‍यक्‍ती कायम अपंग झाल्‍यास 5 लाख तर व्‍यक्‍ती गंभीररित्‍या जखमी झाल्‍यास 1 लाख 25 हजार इतके अर्थसहाय्य देण्‍यात येणार आहे. व्‍यक्‍ती किरकोळ जखमी झाल्‍यास औषधोपचारासाठी येणारा खर्च देण्‍यात येणार असून खासगी रूग्‍णालयात औषधोपचार करणे अगत्‍याचे असल्‍यास त्‍याची मर्यादा 20 हजार प्रती व्‍यक्‍ती इतकी राहणार आहे.
गाय, म्‍हैस, बैल यांचा मृत्यू झाल्‍यास 70 हजार रुपयांची मदत
वन्‍यप्राण्‍यांच्‍या हल्ल्यात गाय, म्‍हैस, बैल यांचा मृत्यू झाल्‍यास देण्‍यात येणाऱ्या 60 हजार रुपये इतक्‍या रकमेत वाढ करुन ती 70 हजार रूपये इतकी करण्यात आली आहे. मेंढी, बकरी व इतर पशुधन यांचा मृत्‍यु झाल्‍यास देण्‍यात येणाऱ्या 10 हजार रूपये इतक्‍या रकमेत वाढ करून 15 हजार रूपये इतकी वाढ करण्यात आली आहे. गाय, म्‍हैस, बैल या जनावरांना कायम अपंगत्‍व आल्‍यास देण्‍यात येणारी 12 हजार इतकी रक्‍कम वाढवून 15 हजार करण्यात आली आहे. तसेच गाय, म्‍हैस, बैल, मेंढी, बकरी व इतर पशुधन जखमी झाल्‍यास देण्‍यात येणारी 4 हजार ची रक्‍कम 5 हजार इतकी करण्यात आली आहे. वन्य प्राण्यांच्या हल्ल्यात होणारी मनुष्यहानी आणि त्‍यामुळं संबंधित कुटुंबियांची होणारी आर्थिक परवड लक्षात घेता त्‍या पार्श्‍वभूमीवर वनमंत्री सुधीर मुनगंटीवार यांनी घेतलेला हा निर्णय महत्‍वपूर्ण मानला जात आहे.
महत्त्वाच्या बातम्या:
मानव आणि वन्यप्राणी संघर्षाची स्थिती दिवसेंदिवस बिकट! अहवालातील कटू सत्य...
महत्त्वाच्या बातम्या
ट्रेंडिंग न्यूज
