एक्स्प्लोर

सोलापूर एनटीपीसीत निर्माण होणाऱ्या वीजेचे दर झाले कमी, वीज निर्मितीसाठी सौर ऊर्जा प्रकल्प उभारणार असल्याची माहिती

लॉकडाऊनच्या काळात औद्योगिक कंपन्या बंद होत्या, त्यामुळे वीजेची मागणी घटली होती. मात्र अनलॉक होत असताना वाढत्या मागणीमुळे सोलापूर एनटीपीसी प्लान्टमधील दोन्ही युनिट पुर्ण क्षमतेने सुरू

Written By : आफताब शेख, एबीपी माझा | Updated at : 12 Nov 2020 04:42 PM (IST)

Electricity rate in NTPC has come down at Solapur सोलापूर एनटीपीसीत निर्माण होणाऱ्या वीजेचे दर झाले कमी, वीज निर्मितीसाठी सौर ऊर्जा प्रकल्प उभारणार असल्याची माहिती

सोलापूर : वीज निर्मितीसाठी लागणाऱ्या कच्च्या मालाच्या वाहतुकीत कपात झाल्याने उत्पादन खर्च कमी झाला. बचत झाल्याने कमी दरात वीज पुरवठा करण्यात यश आले त्यामुळे मागणीतही वाढ झाल्याची माहिती सोलापूर एनटीपीसीचे सरव्यवस्थापक नामदेव उप्पार यांनी दिली.

लॉकडाऊनच्या काळात औद्योगिक कंपन्या बंद होत्या, त्यामुळे वीजेची मागणी घटली होती. मात्र अनलॉक होत असताना वाढत्या मागणीमुळे सोलापूर एनटीपीसी प्लान्टमधील दोन्ही युनिट पुर्ण क्षमतेने सुरू झाल्याचेही त्यांनी यावेळी सांगितले. याचबरोबर 23 आणि 40 मेगावॅट अशा दोन सौरऊर्जा प्रकल्पांची उभारणी करण्याची योजना असल्याचेही त्यांनी जाहीर केले. आधी एनटीपीसीच्या सोलापूर प्रकल्पात दीड हजार किलोमीटर दूर असलेल्या ओडीसा राज्यातून कोळसा आणला जात होता. मात्र आता तेलंगणाच्या सिंगरेनी येथील कोळसा मिळू लागला आहे. त्यामुळे वाहतूक खर्चात मोठ्या प्रमाणात कपात झाली. परिणामी तीन रूपये 80 पैशांनी उत्पादित होत असलेल्या विजेचा उत्पादन खर्च एक रूपयाने कमी झाला आहे. आता 2 रूपये 80 पैसे प्रति युनीट दराने वीजेची विक्री केली जात असल्याची माहिती नामदेव उप्पार यांनी दिली. वीजदर कमी झाल्याने जुलैपासून तब्बल 80 कोटी युनीटची विक्री झाली आहे. दिवाळीत ही मागणी आणखी वाढण्याची शक्यता असल्याचे मत देखील त्यांनी यावेळी व्यक्त केले.

पर्यावरणाच्या दृष्टीने देखील एनटीपीसी विचार करत असून आगामी काळात 23 आणि 40 मेगावॅटचे दोन सौर ऊर्जा प्रकल्प, वीज निमिर्ती करण्यावेळी सल्फर डाय ऑक्साई़डची मात्रा कमी करण्यासाठी एफजीडी प्रणालीची अवलंब केला जाणार असल्याची माहिती देखील एनटीपीसी सोलापूरचे सरव्यवस्थापक नामदेव उप्पार यांनी दिली.

About the author आफताब शेख, एबीपी माझा

आफताब शेख हे एबीपी माझा वृत्त वाहिनीत सिनिअर करस्पॉन्डट म्हणून कार्यरत आहेत. मागील 9 वर्षांपासून एबीपी माझाच्या माध्यमातून कार्यरत असून आपल्या संवेदनशील आणि निष्पक्ष पत्रकारितेने त्यांनी स्वतंत्र ओळख निर्माण केली आहे. 3 जुलै 2017 रोजी मुंबई येथील एबीपी माझाच्या मुख्य कार्यालयातून त्यांनी पत्रकारितेच्या प्रवासाला सुरुवात केली. फेब्रुवारी 2019 पासून ते सोलापूर येथे सिनिअर करस्पॉन्डन्ट म्हणून कार्यरत आहेत. सध्या ते सोलापूर श्रमिक पत्रकार संघाचे सरचिटणीस म्हणूनही जबाबदारी सांभाळत आहेत.

सोलापूरच्या राजकीय घडामोडींपासून सामाजिक, शैक्षणिक, प्रशासकीय, औद्योगिक, मनोरंजन, क्रीडा आणि व्यावसायिक क्षेत्रांतील महत्त्वाच्या विषयांना त्यांनी एबीपी माझाच्या माध्यमातून राज्यस्तरीय व्यासपीठ मिळवून दिले आहे. ‘कामगारांचे शहर‘ म्हणून ओळखल्या जाणाऱ्या सोलापूरमधील कामगारांचे प्रश्न, सर्वसामान्य नागरिकांच्या समस्या आणि उपेक्षित घटकांचा आवाज शासनदरबारी पोहोचवण्याचा त्यांचा सातत्यपूर्ण प्रयत्न राहिला आहे. बहुभाषिक आणि समृद्ध सांस्कृतिक वारसा लाभलेल्या सोलापूरचा इतिहास, परंपरा आणि वर्तमानही त्यांनी आपल्या वार्तांकनातून प्रभावीपणे मांडले आहे. कोरोना काळात कोविड वॉर्डमध्ये प्रत्यक्ष जाऊन रुग्णांच्या व्यथा आणि आरोग्य व्यवस्थेतील वास्तव समोर आणला तर महापूर-दुष्काळातील रिपोर्ट्समधून त्यांनी आपल्या संवेदनशील पत्रकारितेचा प्रत्यय दिला. सोलापूरसह मुंबई, पुणे, धाराशिव, लातूर, बीड, नांदेड आणि छत्रपती संभाजीनगर जिल्ह्यांतही त्यांनी वार्तांकन केले आहे.

त्यांनी सोलापूरच्या दयानंद कला व शास्त्र महाविद्यालयातून कला शाखेची पदवी, तर मुंबई विद्यापीठातून मास्टर ऑफ मास कम्युनिकेशन अँड जर्नलिझम ही पदव्युत्तर पदवी प्राप्त केली आहे. पत्रकारितेसोबतच सामाजिक कार्याचीही त्यांना विशेष आवड आहे. महाविद्यालयीन जीवनातील सामाजिक योगदानासाठी 2016 मध्ये तत्कालीन राष्ट्रपती प्रणव मुखर्जी यांच्या हस्ते त्यांना इंदिरा गांधी राष्ट्रीय सेवा योजना पुरस्काराने (Indira Gandhi NSS Award-2016) सन्मानित करण्यात आले. याशिवाय, पत्रकारितेतील योगदानासाठी त्यांना विविध संस्था आणि संघटनांकडून अनेक पुरस्कारांनी गौरविण्यात आले आहे.

Published at : 12 Nov 2020 04:42 PM (IST)

Tags :

Ntpc Electricity Bill Solapur News