कोरोनाच्या पार्श्वभूमिवर रत्नागिरी ट्राफिक पोलिसांची कारवाई; विक्रमी दंड वसूल!

प्रशासनाकडून वेळोवेळी आवाहन करूनही लोक रस्त्यावर बिनदिकतपणे फिरताना दिसत आहेत. अशातच रत्नागिरी ट्रॅफिक पोलिसांन अनेकांवर कारवाई करत विक्रमी दंड वसुली केली आहे.

रत्नागिरी : कोरोनाच्या पार्श्वभूमीवर देशभरात पंतप्रधान नरेंद्र मोदी यांनी केलेल्या आवाहनानंतर जनता कर्फ्यू पुकारण्यात आला. पण, त्याच्या दुसऱ्याच दिवशी म्हणजे सोमवारी दिसलेले चित्र हे चिंता वाढवणारे असेच होते. कारण, मोठ्या प्रमाणात नागरिक घराबाहेर पडले होते, बाईक, कार, रिक्षा यांची संख्या देखील रस्त्यावर मोठी होती. त्यामुळे रविवारी कमावलं के सोमवारी गमावलं असे हे चित्र होते. दरम्यान, यामध्ये रत्नागिरीकर किंवा रत्नागिरी जिल्ह्यातील नागरिक देखील कुठेच मागे नव्हते. रत्नागिरी शहर असो किंवा जिल्ह्यातील काही मुख्य ठिकाणं या ठिकाणी देखील मोठ्या प्रमाणावर वाहनांची वर्दळ दिसून येत होती. प्रशासनानं केलेल्या आवाहनानंतर देखील त्याला हरताळ फासला जात होता. प्रत्येक जण केवळ मेडिकलला जात आहे असं उत्तर देताना दिसून येत होते. अनेकांनी तर, पाहुया बाहेरचं वातावरण आज कसं आहे? हे पाहण्यासाठी आलो आहे असं उत्तर दिलं. त्यामुळे वाहतूक पोलीस देखील काहीसे हतबल झालेले दिसून आले. अखेर जिल्हाधिकारी लक्ष्मीनारायण मिश्रा यांनी दिलेल्या आदेशानुसार या सर्व वाहनचालकांवर दंडात्मक कारवाई करण्यात आली. हेल्मेट, सिट बेल्ट नसणे, कागदपत्र नसणे आदी कारणांसाठी रस्त्यांवर धावणाऱ्या वाहनांवर अखेर वाहतूक पोलिसांनी ही कारवाई केली. यामध्ये जिल्ह्यातील तब्बल 1614 वाहन चालकांकडून 6 लाख 29 हजार 600 रूपयांचा दंड वसूल करण्यात आला. विशेष बाब म्हणजे एकाच दिवशी इतक्या मोठ्या प्रमाणावर एकाच दिवशी झालेली ही विक्रमी अशी कारवाई ठरली! वाहतूक पोलिसांनी नियमांवर बोट ठेवत केलेल्या कारवाईनंतर मात्र रस्त्यांवर धावणाऱ्या वाहनांची संख्या हळूहळू कमी झाली. सकाळी 7 ते रात्री 9 वाजेपर्यंत ही कारवाई करण्यात आली. शिवाय, रात्रभर देखील पोलीस सध्या नाक्यानाक्यांवर लक्ष ठेवून आहेत.

नागरिकांना आवाहन

रविवारी जनता कर्फ्यू यशस्वी झाल्यानंतर रविवारी संध्याकाळी राज्यात जमाव बंदी लागू करण्यात आली. उद्धव ठाकरे यांनी पत्रकार परिषद घेत याची घोषणा केली. त्यानंतर कोरोनाविरोधातील लढाई आणखी तीव्र होईल अशी आशा होती. पण, मुंबई, पुणेसह राज्यातील इतर शहरांमधील चित्र काही आश्वासक नव्हते. नागरिक आपल्या खासगी वाहनानं मोठ्या प्रमाणावर घराबाहेर पडल्याचं दिसून आले. दरम्यान, कोरोनाला हरवण्यासाठी केवळ एक दिवस नाही तर पुढचे 15 दिवस महत्त्वाचे आहेत, असे आवाहन सध्या शासन आणि प्रशासन करताना दिसत आहे. शिवाय, आम्ही केलेली ही दंडात्मक कारवाई विक्रमी म्हणून पाहण्यापेक्षा आजची परिस्थिती गंभीर आहे. नागरिकांनी सहकार्य करावं. केवळ हौस म्हणून ही कारवाई करण्यात आलेली नाही. नियम पाळा आणि कोरोनाला हरवा अशी आवाहन देखील यावेळी वाहतूक पोलिस निरिक्षक अनिल विभूते यांनी जिल्ह्यातील जनतेला केले आहे.

जिल्ह्याच्या सीमा बंद

राज्यात संचार बंदी लागू करण्यात आल्यानंतर जिल्ह्याच्या सीमा देखील बंद करण्यात आलेल्या आहेत. जीवनावश्यक वस्तुंचा पुरवठा सुरळीत राहिल. त्याबाबत कोणतीही काळजी करण्याची गरज नाही. जनतेनं कोणत्याही अफवांवर विश्वास ठेवू नये असं आवाहन देखील जिल्हा प्रशासनाने केले आहे. सध्या पोलीस, जिल्हा प्रशासन, आरोग्य यंत्रणा, पेट्रोल पंपधारक करत असलेल्या कामगिरीबद्दल सर्वच स्तरातून कौतूक केले जात आहे.

फक्त बाईकला मिळणार पेट्रोल

एकंदरीत सोमवारची स्थिती पाहता रत्नागिरी जिल्ह्यातील सर्व पेट्रोल पंपावर फक्त दुचाकीकरता सकाळी 10 ते  12 आणि दुपारी  4 ते 6 या वेळेत पेट्रोल मिळणार आहे. रिक्षा, कार आणि जड वाहनांना पेट्रोल किंवा डिझेल मिळणार नाही असा निर्णय जिल्हाधिकारी यांनी घेतला आहे. पुढील आदेश येईपर्यंत हा नियम लागू असेल.

संबंधित बातम्या : सर्वांना दिलासा देणारी बातमी; पुण्यातील पहिल्या कोरोनाबाधित दाम्पत्याची टेस्ट निगेटिव्ह coronavirus | 19 मार्चपर्यंत देशातून व्हेंटिलेटर, मास्कची निर्यात हा तर गुन्हेगारी कट : राहुल गांधी Lockdown and Curfew | लॉकडाऊन आणि कर्फ्यू यामध्ये फरक काय? Coronavirus | IIT दिल्लीकडून नवी पद्धत विकसित, कोविड-19ची स्वस्त चाचणी शक्य? Coronavirus | भारतावर कोरोनाचं सावट! कोरोनाविरूद्धच्या लढ्यात उद्योजकांचा मदतीचा हात