Kolhapur Crime : आजरा तालुक्यातील उत्तूरमध्ये चोरट्यांचा हवेत गोळीबार; सोनाराला लुटण्याचा प्रयत्न फसला
Kolhapur Crime : कोल्हापूर जिल्ह्यातील आजरा तालुक्यतीतल उत्तूरमध्ये दिनकर लहू कुंभार या सराफाला तीन चोरट्यांनी लुटण्याचा प्रयत्न केला. यावेळी नागरिक जमा झाल्याने एका चोरट्याने हवेत गोळीबार केला.
Kolhapur Crime : कोल्हापूर जिल्ह्यातील आजरा तालुक्यातील (Ajara Tehsil) उत्तूरमध्ये (Uttur Firing) दिनकर लहू कुंभार या सराफाला तीन चोरट्यांनी लुटण्याचा प्रयत्न केला. यावेळी नागरिक जमा झाल्याने एका चोरट्याने हवेत गोळीबार केला. यावेळी झालेल्या झटापटीत सुशांत आपके हा युवक व स्वतः कुंभार जखमी झाले. नागरिकांनी एका चोरट्याला पकडून पोलिसांच्या ताब्यात दिले.
याबाबत मिळालेली अधिक माहिती अशी की, कुंभार यांचे नेहरु चौकानजीक श्री अवधूत ज्वेलर्स नावाचे सोने चांदी विक्रीचे दुकान आहे. सायंकाळी साडेसात वाजता ते दुकान बंद करुन घरी जात असताना एका पिशवीत सोन्याचे व दुसऱ्या पिशवीत चांदीचे दागिने भरले होते. दुकानाला कुलूप लावत असताना त्यांनी दोन्ही बॅगा त्यांनी दुकानाबाहेर ठेवल्या होत्या.
बॅग ठेवताच चोरून नेण्याचा प्रयत्न
याचवेळी पल्सर मोटरसायकलवर थांबलेले अज्ञात तिघे चोरटे त्यांच्या दिशेने धावत आले व त्यांच्या हातातील बॅग हिसकावण्याचा प्रयत्न केला. यावेळी झटापट होवून एका चोरट्याने चांदीचे दागिने असलेली बॅग हिसकावून घेतली. सोनं असलेली बॅग कुंभार यानी छातीशी घट्ट पकटून ठेवली. यावेळी चोरट्यांनी पिस्तुलच्या मागच्या बाजूने कुंभार यांच्या पाठीत मारले. कुंभार यांनी आरडाओरडा सुरु केल्याने नागरिक जमा झाले.
सहकारी पकडताच इतर दोघांकडून हवेत गोळीबार करत पोबारा
यावेळी सुशांत आपके या युवकाने मोठ्या धाडसाने एका चोरट्याला पकडून ठेवले. यावेळी इतर दोघांनी सुशांतच्या डोक्यात मारहाण केली, यामध्ये तो गंभीर जखमी झाला. तोंडावर ठोसे मारल्याने एक दात पडला. यावेळी इतर युवक जमा होवून त्या चोरट्याला पकडून त्यांचे हातपाय बांधले. आपल्या सहकाऱ्याला पकडल्याचे लक्षात येताच इतर दोघांनी पोबारा केला. जाताना त्यांनी हवेत गोळीबार केल्याने भीतीचे वातावरण तयार झाले.
दरम्यान याबाबात पोलीसाना माहीती देण्यात आली. पोलिसानी घटनास्थळी धाव घेत एका युवकाला एक पिस्तूल व एक काडतूससह ताब्यात घेतले. पोलिसानी बराच प्रयत्न करुन त्याचे नाव माहित करून घेण्याचा प्रयत्न केला. मात्र, त्याने आपले नाव व पत्ता सांगितला नाही. घटनेनंतर नागरिकांनी उत्तूर औट पोस्ट पोलीस दुरक्षेत्रसमोर गर्दी केली होती.
तरुणांचे धाडस
सुशांत आपके, विश्वास उत्तूरकर, बाळासाहेब कुंभार, उत्तम उत्तूरकर, विजय उत्तूरकर, विश्वजित उत्तूरकर, उदय कुंभार या तरुणांनी धाडस दाखवून चोरट्यांचा प्रयत्न हाणून पाडला.
कुंभार यांचे दुकान चोरट्यांकडून 'टार्गेट'
कुंभार यांच्या दुकानात यापूर्वी दोन वेळा चोरी झाली होती. कुलूप तोडून सोन्या चांदीचे दागिने लंपास केले होती. या घटनेचा अद्याप तपास लागलेला नाही. यावेळी चोरट्यानी दुकानाची रेकी करुन त्यांना लुटण्याचा प्रयत्न केला. मात्र, युवकांनी दाखवलेल्या धाडसामुळे हा प्रयत्न असफल झाला.
इतर महत्वाच्या बातम्या
महत्त्वाच्या बातम्या
