जळगाव दूध संघावर भाजप-शिंदे गटाचं वर्चस्व; विरोधकांनी खोक्यांची ताकद लावली, म्हणूनच पराभव; एकनाथ खडसेंची प्रतिक्रिया
Jalgaon Dudh Sangh Elections: जळगाव जिल्हा दूध संघाच्या निवडणुकीत एकनाथ खडसेंना मोठा धक्का. मुक्ताईनगर येथील मतदारसंघातून भाजपचे उमदेवार मंगेश चव्हाण हे 76 मतांनी विजयी. तर मंदा खडसे यांचा निवडणुकीत पराभव.
Jalgaon Dudh Sangh: जळगाव जिल्हा दूध संघाच्या निवडणुकीत (Jalgaon Dudh Sangh Elections) एकनाथ खडसे (Eknath Khadse) यांना मोठा धक्का बसला आहे. मुक्ताईनगर येथील मतदारसंघातून भाजपचे उमदेवार मंगेश चव्हाण हे 76 मतांनी विजयी झाले आहे. तर एकनाथ खडसेंच्या पत्नी मंदा खडसे यांना निवडणुकीत पराभव पत्करावा लागला आहे. यासंदर्भात राष्ट्रवादीचे नेते एकनाथ खडसे यांनी एबीपी माझाला प्रतिक्रिया दिली. आम्हाला परभव मान्य आहे, पण विरोधकांनी खोक्याची ताकद लावून निवडणूक जिंकली असल्याचा आरोपही यावेळी बोलताना एकनाथ खडसेंनी केला आहे.
जळगाव जिल्हा दूध संघाच्या निवडणुकीत महाविकास आघाडीच्या पॅनलच्या पराभवानंतर एकनाथ खडसेंनी आपली प्रतिक्रिया दिली आहे. एकनाथ खडसे यांनी हा पराभव मान्य असल्याचं सांगत विरोधकांनी खोक्यांची ताकद लावली. त्यापर्यंत आम्ही गेलो नाही. खोक्याचा दबाव, आर्थिक बळावर विरोधकांनी ही निवडणूक जिंकल्याचा आरोप एकनाथ खडसेंनी यावेळी बोलताना केला आहे.
एकनाथ खडसे यावेळी बोलताना म्हणाले की, "विरोधी पक्षाकडून खोक्यांसह साम-दाम-दंड भेद नीतीचा वापर केला गेला, त्यामुळेच आम्हाला या निवडणुकीत पराभव पत्करावा लागला आहे. मात्र पराभव शेवटी पराभव असतो, तो आम्हाला मान्य आहे." तसेच, यावेळी बोलताना एकनाथ खडसेंनी विजयी उमेदवारांचं अभिनंदन केलं."
"नव्यानं निवडून आलेल्या संचालकांनी चांगल काम करून दाखवावं ही अपेक्षा आहे. ही निवडणूक लागली असताना तिला ब्रेक दिला गेला, नंतर पुन्हा निवडणूक जाहीर केली, असं राज्यात पहिल्यांदाच घडलं आहे. या निमित्तानं आम्हाला गाफील ठेवण्यात आलं आहे. या निवडणुकीत आम्ही निवडून येऊ अशी परिस्थिती होती. आम्ही सत्तेवर असताना चांगल्या प्रकारे आणि पारदर्शी पणानं संघाचा विकास करण्याचा प्रयत्न केला आहे. या निवडणुकीत आमचा पराभव झाला असला तरी कमी मताच्या फरकानं अनेक जागा गेल्या आहेत. आमच्या विरोधात दोन सत्ताधारी मंत्री, दोन खासदार, आमदार एवढे जण होते. त्याचाही विचार केला गेला पाहिजे, असंही एकनाथ खडसे यांनी म्हटलं आहे. भाजप सोडल्यामुळे आमची माणसं त्यांनी त्यांच्याकडे फोडल्याचं पाहायला मिळतंय.", असं सांगत झालेला पराभव आपल्याला मान्य असल्याचं एकनाथ खडसे यांनी म्हटलं आहे.
एकनाथ खडसेंच्या गडाला सुरुंग
जळगाव जिल्हा दूध संघाच्या निवडणुकीत राष्ट्रवादीचे नेते एकनाथ खडसेंना (Eknath Khadse) मोठा धक्का बसला आहे. खडसेंचं वर्चस्व असलेल्या जळगाव दूध संघावर भाजप-शिंदे गटानं (BJP-Shinde group) विजय मिळवला आहे. एकूण 20 पैकी 16 जागांवर भाजप आणि शिंदे गटाचे उमेदवार विजयी झाले आहे. विशेष म्हणजे या निवडणुकीत एकनाथ खडसे यांच्या पत्नी मंदा खडसे (Manda Khadse) यांना देखील पराभवाचा धक्का बसला आहे. भाजप आमदार मंगेश चव्हाण यांनी त्यांचा पराभव केला आहे. खडसे यांच्या गटाला केवळ चार जागा मिळाल्या आहेत.
महत्त्वाच्या बातम्या
ट्रेंडिंग न्यूज
