Mukesh Chandrakar Murder Case : पोस्टमॉर्टम अहवालात डोक्यात 15 खुणा, लिव्हरचे 4 तुकडे, मान, बरगड्या अन् हृदय सुद्धा तुटलेल्या स्थितीत

Mukesh Chandrakar Murder Case : मुकेशच्या पोस्टमॉर्टम रिपोर्टमध्ये डोक्यावर 15 जखमांच्या खुणा आढळल्या. यकृताचे 4 तुकडे सापडले, मान तुटलेली आणि हृदय तुटले यावरून खून क्रुरतेचा अंदाज येतो.

Mukesh Chandrakar Murder Case

Source : PTI

Mukesh Chandrakar Murder Case : छत्तीसगडमधील विजापूर जिल्ह्यातील पत्रकार मुकेश चंद्राकर हत्या प्रकरणाचा मुख्य आरोपी आणि सूत्रधार सुरेश चंद्राकरला अटक करण्यात आली आहे. चंद्राकरला विशेष तपास पथकाने (एसआयटी) हैदराबाद येथून पाच जानेवारीला रात्री उशिरा अटक केली. सध्या त्याची चौकशी सुरू आहे.

यकृताचे 4 तुकडे सापडले

आरोपी सुरेश हा पत्रकार मुकेश चंद्राकर यांचा चुलत भाऊ आहे. या प्रकरणी सुरेशच्या तीन सख्ख्या भावांसह चार आरोपींना यापूर्वीच अटक करण्यात आली आहे. मुकेशच्या पोस्टमॉर्टम रिपोर्टमध्ये डोक्यावर 15 जखमांच्या खुणा आढळल्या. यकृताचे 4 तुकडे सापडले, मान तुटलेली आणि हृदय तुटले यावरून खून किती क्रुर पद्धतीने केला गेला, याचा अंदाज येतो. 5 बरगड्याही तुटल्या होत्या. पोस्टमॉर्टम करणाऱ्या डॉक्टरांच्या म्हणण्यानुसार दोन किंवा अधिक लोकांनी मुकेशची हत्या केली आहे. मुकेशच्या शरीरावर एवढा जोरदार वार करण्यात आला की शरीराच्या अनेक अवयवांना जखमा झाल्या. मीडियाशी बोलताना डॉक्टरांनी सांगितले की, मी 12 वर्षात अशी केस कधीच पाहिली नव्हती.

बॅडमिंटन कोर्ट परिसरात खून

सुरेश चंद्राकर हा व्यवसायाने कंत्राटदार असून राजकारणाशीही संबंधित आहेत. मुकेश चंद्राकर यांनी ठेकेदाराच्या भ्रष्टाचाराची बातमी केली होती. याचा राग येऊन सुरेशने मुकेशची हत्या केली. सुरेशने मुकेशला जेवणाच्या बहाण्याने विजापूर येथील बॅडमिंटन कोर्टच्या आवारात बोलावले आणि त्याचा भाऊ आणि सुपरवायझरच्या हातून मुकेशची हत्या केली.

पत्नी आणि चालकाला सोडून सुरेश पळून गेला 

पोलिस सुरेश चंद्राकरचा शोध घेत होते. तो हैदराबादच्या दिशेने पळून गेल्याची माहिती मिळाली. हैदराबादपासून थोड्याच अंतरावर पोलिसांनी सुरेश चंद्राकरची पत्नी आणि ड्रायव्हर उपस्थित असलेले वाहन थांबवले. सुरेश हे वाहन सोडून पळून गेला होता. पत्नीची चौकशी करत असताना पोलिसांना सुगावा लागला, त्यानंतर सुरेशलाही पकडण्यात आले.

SIT अधिकारी बदलले जाऊ शकतात

हत्याकांडानंतर स्थापन झालेल्या एसआयटीचे अधिकारी बदलले जाऊ शकतात. विजापूर येथे यापूर्वीच तैनात असलेल्या काही अधिकाऱ्यांचा तपास पथकात समावेश करण्यात आला आहे. यावर पत्रकारांनी आक्षेप घेतला होता. या प्रकरणाची चौकशी अन्य अधिकाऱ्यांकडून करून घ्यावी, जेणेकरून निष्पक्ष तपास व्हावा, अशी मागणी पोलिस मुख्यालयातून करण्यात आली. याबाबत मुख्यमंत्र्यांशी चर्चा करून लवकरच निर्णय घेतला जाईल, असे गृहमंत्री विजय शर्मा यांनी सांगितले.

खुनाचा संपूर्ण कट घरीच रचला गेला

सुरेश चंद्राकरने विजापूर येथील घरात बसून मुकेशच्या हत्येचा कट रचल्याचे समोर आले. धाकटा भाऊ रितेश सुरेशला बोलवणार आणि सुपरवायझर महेंद्र रामटेके सोबत त्याला मारणार असे ठरले. रितेशने फोन केल्यावरच मुकेश येऊ शकतो हे सूत्रधारांना माहीत होते. पत्रकारांच्या दबावाने पोलिसांनी सर्व आरोपींना अटक केली.

घरापासून दोन किमी अंतरावर खून झाला

सुरेशने बॅडमिंटन कोर्टच्या आवारातील खोल्या स्टोअर रूम म्हणून ठेवल्या होत्या. जवळपास शेकडो घरेही आहेत. मुकेश चंद्राकर यांच्या घरापासून दोन किलोमीटर अंतरावर हा परिसर आहे. स्थानिक लोकांनी दिलेल्या माहितीनुसार ते नावापुरतेच बॅडमिंटन कोर्ट होते. येथे तिन्ही भाऊ अय्याशी करत होते. आतमध्ये कोणालाही प्रवेश दिला जात नव्हता. सुरेश, दिनेश किंवा रितेश यांनी ज्यांना इथे आणले होते तेच इथे जायचे.

इतर महत्वाच्या बातम्या