Karnataka Election Result 2023 Live Updates : कर्नाटकात काँग्रेसचं 'किंग', भाजपचा दारुण पराभव, कार्यकर्त्यांचा जल्लोष

Karnataka Assembly Election Result 2023 Live Updates : आज कर्नाटक विधानसभा निवडणुकीचा निकाल जाहीर होणार आहे. कर्नाटकच्या जनतेनं कोणाच्या पारड्यात मताचा कौल टाकला ते आज स्पष्ट होणार आहे.

Background

Karnataka Assembly Election Result 2023 Live updates : राजकीयदृष्ट्या आजचा दिवस खूप महत्वाचा असणार आहे. कारण आज कर्नाटक विधानसभा निवडणुकीचा निकाल जाहीर होणार आहे. कर्नाटकच्या जनतेनं कोणाच्या पारड्यात मताचा कौल टाकला ते आज स्पष्ट होणार आहे. कर्नाटकात काँग्रेस बाजी मारणार की भाजप सत्तेत कायम राहणार याचा फैसला अवघ्या काही तासांवर आला आहे. आज दुपारपर्यंत हा निकाल स्पष्ट होण्याची शक्यता आहे. तर बेळगावातील 18 मतदारसंघातील निकाल हे दुपारी दोन वाजेपर्यंत जाहीर होतील. 

कर्नाटकातील 224 जागांसाठी 10 मे रोजी निवडणूक झाली. कर्नाटकातील निवडणुकीसाठी 72.67 टक्के मतदारांनी आपला मतदानाचा हक्क बजावला. कर्नाटकातील विधानसभा निवडणुकीसाठी राजकीय पक्षांनी सुमारे महिनाभर प्रचार केल्यानंतर आता राज्यातील जनता सत्तेच्या चाव्या कुणाकडे देणार आज ठरणार आहे. भाजप सत्ता कायम ठेवणार की काँग्रेस सत्तेत येणार हे अवघ्या काही तासांमध्ये ठरणार आहे. 

2,615 उमेदवारांचे भवितव्य मतदान पेटीत बंद

विधानसभा निवडणुकीसाठी एकूण 2,615 उमेदवार उभे आहेत. त्यामध्ये 2,430 पुरुष तर 184 महिला उमेदवार आणि एक तृतीयपंथीय उमेदवार निवडणुकीच्या रिंगणात आहेत. या सर्व उमेदवारांचे भवितव्य 10 मे रोजी मतदान पेटीत बंद झालं. 

बेळगावचा निकाल दुपारी दोन वाजेपर्यंत येणार

बेळगाव जिल्ह्यातील 18 विधानसभा मतदारसंघातील मतमोजणीची तयारी पूर्ण झाली आज दुपारी दोन वाजेपर्यंत सगळे निकाल जाहीर होतील अशी माहिती जिल्हाधिकारी नितेश पाटील यांनी दिली. ही मतमोजणी आरपीडी कॉलेजमध्ये मतमोजणी होणार असून कॉलेज परिसराला पोलीस छावणीचे स्वरूप प्राप्त झाले आहे. 

सकाळी 6 वाजता मतमोजणीसाठी नियुक्त करण्यात आलेले कर्मचारी हजर राहणार आहेत. 7.30 वाजता मतदान यंत्रे ठेवण्यात आलेली स्ट्रॉंग रूम उघडल्या जाणार आहेत. त्यानंतर 8 वाजता प्रथम पोस्टाने आलेली मते मोजली जाणार आहेत. 8.30 वाजता मतदान यंत्रातील मतमोजणी प्रारंभ होणार आहेत. मतमोजणीच्या एकूण बावीस फेऱ्या असून बेळगाव ग्रामीण मतदारसंघात 29 मतमोजणीच्या फेऱ्या असणार आहेत. मतमोजणी केंद्राला निमलष्करी दल, सशस्त्र पोलीस आणि पोलीस अशी तीन पदरी सुरक्षा असणार आहे. मतमोजणी केंद्राच्या परिसरात जमावबंदी आदेश लागू करण्यात आला आहे.

सलग दोन वेळा कोणताही पक्ष सत्तेत नाही

कर्नाटक या राज्याचे वैशिष्ट्य म्हणजे आतापर्यंत इथल्या जनतेने सलग दोन वेळा कोणत्याही राजकीय पक्षाकडे सत्ता सोपवली नाही. दर पाच वर्षांनी राज्यात सत्ताबदल होतोय. हा समज मोडून काढण्यासाठी भाजपने कंबर कसली असून स्वतः पंतप्रधान नरेंद्र मोदी यांनी राज्यात प्रचारात आघाडी घेतल्याचं दिसून आलं. तर दुसरीकडे काँग्रेसच्या सिद्धारमय्या आणि डीके शिवकुमार या नेत्यांनी तोडीस तोड काम करत प्रचाराचा धडाका लावला. त्यामुळे आता जनता कुणाच्या पाठिशी राहते आणि कुणाला बाजूला सारते हे आज दुपारपर्यंत समजेल.

14:05 PM (IST)  •  13 May 2023

Karnataka Election 2023: कर्नाटकात काँग्रेसचंच 'किंग'

Karnataka Election 2023: आतापर्यंत काँग्रेस-129, भाजप-63 आणि जेडी(एस)-22 आघाडीवर आहेत, तर अंतिम निकालात काँग्रेसनं 4 आणि भाजपनं 2 जागा जिंकल्या आहेत.

14:03 PM (IST)  •  13 May 2023

Karnataka Election 2023: कर्नाटक भाजपच्या हातून कसं निसटलं? खुद्द भाजप नेत्यानं सांगितलं

Karnataka Election 2023: कर्नाटकातील भाजपचे राज्यसभा खासदार लहारसिंह सिरोया यांनी एबीपी न्यूजवर मोठं वक्तव्य केलं आहे. ते म्हणाले, "आमच्यावर भ्रष्टाचाराचे आरोप लावण्यात आलेत. त्यामुळेच सरकारचे अनेक मंत्री निवडणुकीत पराभूत झाले. आम्ही योग्य उत्तर देऊ शकलो नाही. तिकीट वाटपात अडचण निर्माण झाली. गुजरात मॉडेल स्वीकारायला हवं होतं, नव्या लोकांना संधी द्यायला हवी होती."

14:00 PM (IST)  •  13 May 2023

Karnataka Election 2023: काँग्रेसचं सरकार स्थापन झाल्यास कर्नाटकचा मुख्यमंत्री कोण?

Karnataka Election 2023: कर्नाटक काँग्रेसचे कार्याध्यक्ष सलीम अहमद यांनी एबीपी न्यूजवर बोलताना मोठं वक्तव्य केलं आहे. ते म्हणाले की, कर्नाटक काँग्रेसचे प्रदेशाध्यक्ष डीके शिवकुमार हे मुख्यमंत्रीपदाच्या शर्यतीतील आहेत. कर्नाटकात काँग्रेसच्या बाजूनं वातावरण निर्माण करण्यात राहुल गांधींच्या भारत जोडो यात्रेचा मोठा वाटा आहे. 

12:21 PM (IST)  •  13 May 2023

Karnataka Live: 1000 पेक्षा कमी फरकानं 16 जागांवर भाजप-काँग्रेसचे उमेदवार मागे-पुढे

Karnataka Live: 1000 पेक्षा कमी फरकाने 16 जागांवर उमेदवार मागे-पुढे

• 1000 पेक्षा कमी मतांचा फरक असलेल्या 5 जागांवर भाजप आघाडीवर आहे.
• 1000 पेक्षा कमी मतांचा फरक असलेल्या 5 जागांवर काँग्रेस आघाडीवर आहे.
• जेडीएस 2 जागांवर आघाडीवर आहे जिथे मताधिक्य 1000 पेक्षा कमी आहे.
• 1000 पेक्षा कमी फरक असलेल्या 2 जागांवर अपक्ष आघाडीवर आहेत.

12:20 PM (IST)  •  13 May 2023

Karnataka Election 2023: कर्नाटकात काँग्रेसचं 'किंग'; काँग्रेसला भाजपपेक्षा 7 टक्के जास्त मतं

Karnataka Election 2023: निवडणूक आयोगाच्या वेबसाईटनुसार, काँग्रेस 122 जागांवर आघाडीवर आहे, तर भाजप केवळ 71 जागांवर आघाडीवर आहे. तर JDS 24 जागांवर पुढे आहे. मतांच्या बाबतीतही काँग्रेस आघाडीवर आहे. काँग्रेसला भाजपपेक्षा सात टक्के जास्त मतं मिळाली आहेत.