एक्स्प्लोर

देशवासियांचा जीव इतका स्वस्त नाही, गंभीरचा निशाणा

Written By : एबीपी माझा वेब टीम | Updated at : 26 Apr 2017 12:03 AM (IST)

नवी दिल्ली : टीम इंडियाचा फलंदाज गौतम गंभीरची बॅट मैदानावर जशी तळपते, तसाच तो ट्विटरवरही बेधडक वक्तव्य करण्यासाठी प्रसिद्ध आहे. सुकमामध्ये नक्षलींनी केलेल्या हल्ल्याच्या पार्श्वभूमीवर गंभीरने पुन्हा तोंड उघडलं आहे. 'देशवासियांचा जीव इतका स्वस्त नाही', अशा शब्दात गंभीरने निशाणा साधला आहे. 'छत्तीसगड, काश्मीर, ईशान्य भारत... या कानठळ्या पुरेशा आहेत की आपण बहिरे झालो आहोत? आपल्या देशातील नागरिकांचा जीव इतकाही स्वस्त नाही, कोणाला तरी याची किंमत चुकवावी लागेल.' या शब्दात गंभीरने आपला संताप व्यक्त केला आहे. https://twitter.com/GautamGambhir/status/856558557768155136 यापूर्वी काश्मीरमधील जवानासोबत झालेल्या गैरवर्तणुकीवरही गंभीरने बोट ठेवलं होतं. 'माझ्या जवानांवर हात उगारल्याच्या बदल्यात कमीत कमी शंभर आत्मघातींचा जीव जाईल. ज्यांना स्वातंत्र्य हवं आहे, त्यांनी चालतं व्हावं. काश्मिर आमचं आहे.' असं ट्वीट त्याने केलं होतं. गौतम गंभीर आयपीलच्या दहाव्या पर्वात कोलकाता नाईट रायडर्सचा कर्णधार आहे. छत्तीसगडच्या सुकमा जिल्ह्यात नक्षलवाद्यांच्या हल्ल्यात सीआरपीएफचे 25 जवान शहीद, तर 6 जवान गंभीर जखमी झाले आहेत. सुकमा जिल्ह्यातील चिंतागुफा परिसरात CRPF च्या बटालियन 74 वर नक्षलवाद्यांनी हल्ला केला. या बटालियनमध्ये 90 जवान होते. 25 जवानांच्या मृत्यूमागे कोण? नक्षलवाद्यांचा गड मानला जाणाऱ्या सुकमा जिल्ह्यातील 25 जवानांच्या मृत्यूमागे कुख्यात नक्षली नेता हिडमा याचा हात असल्याचं बोललं जात आहे. हिडमाने जवळपास 300 नक्षलवाद्यांसह मिळून हा हल्ला केला. सुत्रांनी दिलेल्या माहितीनुसार पापल्स लिबरेशन ऑफ गुरिल्ला (PLGA) संघटनेने या हल्ल्याची जबाबदारी स्वीकारली आहे. ही संघटना बुरकापाल आणि चिंतागुफा भागात सक्रिय असते. कोण आहे हिडमा? 25 वर्षीय हिडमा हा पीएलजीएची पहिली बटालियन (PLGA 1) चा प्रमुख आहे. तो सुकमा जिल्ह्यातील पालोडी गावाचा रहिवासी आहे. घातपाताने हल्ला करणारा मास्टरमाईंड अशी हिडमाची ओळख आहे. हिडमा आणि त्याच्या बटालियनने आतापर्यंत CRPF वर अनेक मोठे हल्ले केले आहेत. दंतेवाडातील ताडमेटलामध्ये 2010 साली झालेल्या हल्ल्यात एक हजार नक्षलवाद्यांनी 76 जवानांची हत्या केली होती. हिडमा ग्रुपने यापूर्वीही मोठे हल्ले केले आहेत. 23 मार्च 2013 रोजी दरभातील झीरम घाटीत काँग्रेस परिवर्तन रॅलीवर करण्यात आलेल्या हल्ल्यात काँग्रेसच्या बड्या नेत्यांसह 31 जणांची हत्या करण्यात आली होती.