Cyclone Remal : 'रेमल' चक्रीवादळाचा वेग वाढला, पश्चिम बंगाल आणि ओडिशाच्या किनारपट्टीवर हाय अलर्ट जारी, NDRF च्या 12 तुकड्या तैनात
Cyclone Remal Update : पश्चिम बंगालच्या दक्षिण आणि उत्तर 24 परगणा या किनारी जिल्ह्यांमध्ये 26-27 मे साठी रेड अलर्ट जारी करण्यात आला आहे. येथे काही भागात अतिवृष्टी अपेक्षित आहे.
मुंबई : अवघ्या काहीच वेळेत रेमल चक्रीवादळ (Cyclone Remal Update) हे पश्चिम बंगाल आणि ओडिशाच्या किनाऱ्यावर धडकण्याची शक्यता आहे. बंगालच्या उपसागरावर कमी दाबाचा पट्टा निर्माण झाल्यामुळे हे चक्रीवादळ निर्माण झालं असून ते ताशी 130 ते 135 किमी वेगाने किनाऱ्यावर धडकणार आहे. सरकारने यासाठी योग्य त्या उपाययोजना केल्या असून पश्चिम बंगालसह ओडिशामध्ये NDRF च्या 12 तुकड्या तैनात करण्यात आल्या आहेत.
या चक्रीवादळासाठी रेमल हे नाव ओमानने सूचवलं असून अरेबिक भाषेत त्याचा अर्थ वाळू किंवा रेती असा होतोय. या चक्रीवादळाचा मान्सून वाटचालीवर तसेच महाराष्ट्रात सुरू असलेल्या उष्णता लाटसदृश्य स्थितीवर कोणताही विपरित परिणाम जाणवणार नसल्याची माहिती हवामान खात्याने दिली आहे.
बंगालच्या उपसागरावर निर्माण झालेल्या कमी दाबाच्या पट्ट्यामुळे वाऱ्यांचे चक्रीवादळात रूपांतर केले आहे. भारतीय हवामान संस्थेने सांगितले की हे वादळ रविवारी रात्री उशिरा पश्चिम बंगाल तसेच बांगलादेशातील खेपुपारा दरम्यानच्या किनारपट्टीवर धडकू शकते. रेमल हे मान्सूनच्या आगमनानंतर बंगालच्या उपसागरात निर्माण झालेले पहिले चक्रीवादळ आहे.
भारतीय हवामान विभागाने सांगितले की, या चक्रीवादळ रेमलचे केंद्र खेपुपारापासून सुमारे 360 किमी दक्षिण-दक्षिणपूर्व आणि सागर द्वीपच्या 350 किमी दक्षिण-पूर्वेस आहे. वादळाची तीव्रता आणखी तीव्र होऊन त्याचे तीव्र चक्रीवादळात रूपांतर होण्याची शक्यता आहे.
पश्चिम बंगाल आणि ओडिशामध्ये मुसळधार पावसाचा इशारा
IMD च्या मते, रविवारी मध्यरात्री सागर द्वीप आणि खेपुपारा दरम्यान पश्चिम बंगाल आणि लगतच्या बांगलादेशच्या किनारपट्टीला 110 ते 120 किमी प्रतितास वेगाने वाऱ्याचा वेग ओलांडण्याची अपेक्षा आहे. 26-27 मे रोजी पश्चिम बंगाल आणि उत्तर ओडिशाच्या किनारी जिल्ह्यांमध्ये अत्यंत मुसळधार पावसाचा इशारा देण्यात आला आहे. याशिवाय 27-28 मे रोजी ईशान्य भारतातील काही भागात अतिवृष्टीची शक्यता आहे.
IMD ने मच्छिमारांना 27 मे च्या सकाळपर्यंत उत्तर बंगालच्या उपसागरातील समुद्रात जाऊ नये असा सल्ला दिला आहे. दक्षिण आणि उत्तर 24 परगणा सारख्या पश्चिम बंगालच्या किनारी जिल्ह्यांमध्ये 26-27 मे साठी रेड अलर्ट जारी करण्यात आला आहे, जेथे काही भागात अतिवृष्टी अपेक्षित आहे.
याशिवाय, कोलकाता, हावडा, नादिया आणि पूरबा मेदिनीपूर जिल्ह्यांमध्ये 26-27 मे साठी ऑरेंज अलर्ट जारी करण्यात आला आहे या ठिकाणी ताशी 80 ते 90 किलोमीटर वेगाने जोरदार वारे वाहण्याची शक्यता आहे. चक्रीवादळ रामलचा संभाव्य परिणाम लक्षात घेता कोलकाता विमानतळ प्राधिकरणाने रविवारी दुपारपासून 21 तासांसाठी फ्लाइट ऑपरेशन स्थगित करण्याचा निर्णय घेतला आहे.
ही बातमी वाचा:
महत्त्वाच्या बातम्या
