Gautami Patil : गौतमी म्हणतेय 'रात्रभर जागली विचारात तुमच्या'; गौतमी पाटीलच्या आगामी सिनेमातील 'मी करते तुम्हाला मुजरा' लावणी प्रेक्षकांच्या भेटीला

Gautami Patil : गौतमी पाटीलच्या आगामी सिनेमातील 'मी करते तुम्हाला मुजरा' ही लावणी प्रेक्षकांच्या भेटीला आली आहे.

Gautami Patil

Gautami Patil : 'लावणी क्वीन' गौतमी पाटील (Gautami Patil) सध्या चर्चेत आहे. आपल्या नृत्याने सर्वांना घायाळ केल्यानंतर रुपेरी पडदा गाजवायला गौतमी सज्ज झाली आहे. गौतमीचा 'घुंगरु' (Ghungroo) हा आगामी सिनेमा असून या सिनेमातील पहिली लावणी आता प्रेक्षकांच्या भेटीला आली आहे. 'मी करते तुम्हाला मुजरा' (Me Karte Tumhala Mujra) असे या लावणीचे नाव आहे. 

गौतमीच्या 'मी करते तुम्हाला मुजरा'ने वेधलं चाहत्यांचं लक्ष 

गौतमीची 'मी करते तुम्हाला मुजरा' ही लावणी चाहत्यांच्या पसंतीस उतरली आहे. पण काही मंडळींकडून या लावणीवर आक्षेप घेतला जात आहे. आक्षेपार्ह डान्स स्टेप्स केल्यामुळे गौतमी गेल्या काही दिवसांपूर्वी वादाच्या भोवऱ्यात अडकली आहे. आता 'मी करते तुम्हाला मुजरा' या लावणीमुळे गौतमी चर्चेत आहे. 'रात्रभर जागली विचारात तुमच्या.. अहो पाव्हणं या बसा', 'करुन साज नटले आज, अहो श्रृंगार केलाय असा, मी करते तुम्हाला मुजरा', 'या बसा तुम्ही सोबतीला राखते मर्जी, चंद्रावाणी रुप माझं नजर लावू नका', असे या लावणीचे बोल आहेत. 

गौतमीच्या अदांनी चाहते घायाळ

'मी करते तुम्हाला मुजरा' या लावणीतील ढोलकीचा ताल, घुंगरांचे बोल आणि गौतमीच्या दिलखेचक अदांनी चाहते घायाळ झाले आहेत. साजशृंगार आणि सौंदर्याची नजाकत पाहण्याजोगी आहे. या गाण्यातील गौतमीचा लुक खूपच लक्षवेधी आहे. पांढऱ्या रंगाची नऊवारी साडी, त्याला लाल रंगाची जरीची काठ, साज, केसात गजरा, नथा असा काहीसा गौतमीचा लुक आहे. पण यात लक्ष वेधून घेतो तो ब्लाऊज. या गाण्यात गौतमीने घातलेल्या ब्लाऊजवर 'सबसे कातील गौतमी पाटील' असे लिहिलेले आहे. 

'मी करते तुम्हाला मुजरा' लावणीबद्दल जाणून घ्या...

'मी करते तुम्हाला मुजरा' ही लावणी साईनाथ पाटोळे आणि मारुती सोनू यांनी लिहिली आहे. वैष्णवी आदोडेने ही लावणी गायली आहे. तर महेंद्र बनसोडेने गौतमीची लावणी कोरिओग्राफ केली आहे. सिनेमातील या लावणीत तमाशाचा फड दाखवण्यात आला आहे. यात गौतमी पाटील लावणी सादर करत असून अनिल नगरकर, ऋषिकेश मोरे, साईनाथ  जवळकर, अमर गजघाटे, राजाभाऊ कदम ही मंडळी या लावणीचा आनंद घेताना दिसत आहेत. 

गौतमीच्या या लावणीवर 'गौतमी पाटीलचा नाद खुळा', 'सबसे कातील गौतमी पाटील', 'नाद फक्त गौतमीचा', 'इथ तिथं नाय, थेट काळजावर घाव' अशा कमेंट्स चाहत्यांनी केल्या आहेत. सध्या सोशल मीडियावर ही लावणी व्हायरल होत आहे. लावणी पाहिल्यानंतर चाहते आता सिनेमाची प्रतीक्षा करत आहेत. 

गौतमीचा 'घुंगरु' लवकरच येणार प्रेक्षकांच्या भेटीला

गौतमी पाटीलचा 'घुंगरु' हा सिनेमा लवकरच प्रेक्षकांच्या भेटीला येणार आहे. या सिनेमाचं शूटिंग सोलापूर, मढ, हंपीसह परदेशातदेखील झालं आहे. या सिनेमात गौतमी बाबा गायकवाडसोबत स्क्रीन शेअर करताना दिसणार आहे असे म्हटले जात आहे. या सिनेमाचं कथानक कलावंत आणि लोककलावंत यांच्या आयुष्यावर भाष्य करणारं आहे. 

संबंधित बातम्या