Beed Police: बीडमध्ये पोलिसांसाठी आदेश, आडनाव घ्यायचं नाही, नावाने हाक मारायची; पोलीस अधीक्षक नवनीत कावतांनी फर्मान सोडलं

Beed News: बीड जिल्ह्यात जातीय तणाव, मराठा विरुद्ध वंजारी असा संघर्ष सातत्याने होताना दिसत आहे. बीड पोलीस अधीक्षक नवनीत काँवत यांचा महत्त्वाचा आदेश.

Beed Police SP Navneet Kanwat

Source : ABPLIVE AI

बीड: मस्साजोग गावचे सरपंच संतोष देशमुख हत्याप्रकरणानंतर बीड जिल्ह्यातील राजकीय आणि सामाजिक वातावरण प्रचंड ढवळून निघाले आहे. लोकसभा निवडणुकीपासून मराठी विरुद्ध वंजारी हा सुरु झालेला वाद देशमुख हत्याप्रकरणानंतर आणखी उफाळला होता. त्यामुळे बीड जिल्ह्यातील सामाजिक सलोखा आणि सौहार्द नष्ट होण्याची परिस्थिती निर्माण झाली आहे. बीड जिल्ह्यातील सराकरी अधिकारी, पोलीस प्रशासन अशा सगळ्यांनाच या जातीयवादाचा फटका बसत आहे. या पार्श्वभूमीवर बीड जिल्ह्याचे पोलीस अधीक्षक नवनीत काँवत यांनी एक महत्त्वपूर्ण निर्णय घेतला आहे. नवनीत कावत यांनी मंगळवारी एक महत्त्वाचा आदेश जारी केला.  त्यानुसार आता बीड पोलीस दलातील कर्मचाऱ्यांना एकमेकांना पहिल्या नावाने हाक मारणे बंधनकारक करण्यात आले आहे.

बीड पोलीस अधीक्षकांना बीड मधील जातीयवाद कमी करण्यासाठी पाऊल उचलले आहे. पोलिस अधीक्षक नवनीत काँवत यांनी एक अनोखा आदेश लागू केला. यापुढे पोलिसांनी एकमेकांना फक्त पहिल्या नावानेच बोलवायचे, आडनाव घ्यायचे नाही, असे आदेशात म्हटले आहे. सरपंच संतोष देशमुख हत्या प्रकरणामुळे जातीय वातावरण ढवळून निघाले आहे. पोलिस खात्यात एकाच जातीचे कर्मचारी असून ते आरोपींना सहकार्य करत असल्याचाही आरोप झाला. त्यामुळे जातीय भेदभाव नष्ट करण्यासाठी हा आदेश लागू केला आहे. या आदेशाचे आता बीड जिल्ह्यात काय पडसाद उमटतात, हे पाहावे लागेल.

मनोज जरांगे यांच्या मराठा आरक्षण आंदोलनाचा सर्वाधिक प्रभाव बीड जिल्ह्यासह संपूर्ण मराठवाड्यात लक्षणीयरित्या दिसून आला होता. या आंदोलनाच्या काळात बीडमध्ये काही आंदोलकांनी जाळपोळ केली होती. त्यानंतर  लोकसभा निवडणुकीत बीड जिल्ह्यात मराठा विरुद्ध वंजारी असे जातीय ध्रुवीकरण झाल्याचे पाहायला मिळाले होते. त्यामुळे लोकसभा निवडणुकीत पंकजा मुंडे यांना पराभवाचा धक्का बसला होता. यानंतर वंजारी समाजात तीव्र पडसाद उमटले होते. विधानसभा निवडणुकीतही हा जातीय वाद पाहायला मिळाला होता. अनेक शाळांमध्ये लहान मुलांमध्येही आपापसात जातीय भेदभाव झाल्याच्या घटना बीड जिल्ह्यात घडल्या होत्या. त्यामुळे बीडमधील सामाजिक परिस्थितीबाबत अनेकांनी शंका व्यक्त केली होती.

बीड पोलीस दलात वाल्मिक कराडच्या मर्जीतील पोलीस अधिकारी

संतोष देशमुख हत्याप्रकरणाच्या तपासासाठी नेमण्यात आलेल्या पोलीस अधिकाऱ्यांबाबत वाद निर्माण झाले होते. या हत्याप्रकरणाच्या तपासासाठी गठित करण्यात आलेल्या विशेष तपास पथकात (एसआयटी) कराडच्या जवळच्या पोलीस कर्मचाऱ्यांचा समावेश असल्याचा आरोप झाला होता. त्यांचे फोटोही सोशल मीडियावर व्हायरल झाले होते. त्यामुळे एसआयटीतील काही अधिकाऱ्यांना पथकातून बाहेर काढण्यात आले होते. बीडमधील 26 पोलिस अधिकारी वाल्मिक कराडच्या मर्जीतील असून त्यांची जिल्ह्याबाहेर बदली करण्याची मागणी पुण्यातील भूमाता ब्रिगेडच्या प्रमुख तृप्ती देसाई यांनी केली होती.

आणखी वाचा