Bacchu Kadu : बच्चू कडू करणार अयोध्या दौरा, प्रभू श्रीराम चरणी मांडणार शेतकऱ्यांच्या व्यथा
Bacchu Kadu : आमदार बच्चू कडू हे 29 ऑक्टोबरला अयोध्येच्या दौऱ्यावर जाणार असल्याची माहिती देण्यात आली आहे.
अमरावती : प्रहारचे आमदार बच्चू कडू (Bacchu Kadu) हे 29 ऑक्टोबर रोजी अयोध्येच्या दौऱ्यावर जाणार आहेत. याविषयीची माहिती बच्चू कडू यांनी माध्यमांशी बोलताना दिली. दरम्यान 15 ऑक्टोबरला मुंबईत बच्चू कडू यांनी मुंबईत 'मेरा देश मेरा खून' या मोहिमेची सुरुवात केली. या मोहिमेचा दुसरा टप्पा हा अयोध्येमध्ये होणार असल्याचं देखील यावेळी बच्चू कडू यांनी म्हटलं.
राज्यातील शेतकऱ्यांच्या व्यथा प्रभू श्रीराम चरणी बच्चू कडू मांडणार आहे. त्यासाठी त्यांच्या अयोध्या दौऱ्याचं आयोजन करण्यात आलंय. सध्या शेतकऱ्यांच्या प्रश्नावर आमदार बच्चू कडू यांनी आक्रमक पवित्रा घेतला असल्याचं चित्र आहे. तर अयोध्येला जाऊन शेतकऱ्यांसाठी प्रार्थना बच्चू कडू आणि त्यांचे कार्यकर्ते अयोध्येला जाऊन करणार आहेत.
बच्चू कडूंनी काय म्हटलं?
यावर बोलताना आमदार बच्चू कडू म्हणाले की, तकऱ्यांचं मरण होऊ नये म्हणून आम्ही प्रभू रामचंद्राचं दर्शन घेणार आहोत. तिथे ऊस, कापूस, तूर, सोयाबीन आणि धान आम्ही प्रसाद चढवणार. शेतकऱ्यांचे प्रश्न प्रथम स्तरावर या सरकारने घ्यावे म्हणून हा अयोध्या दौरा आहे. आम्ही आर्थिक आरक्षणाची लढाई लवकरच सुरु करु. त्यासाठी आम्ही संपूर्ण भारत फिरणार. शहिदांसाठी आणि शेतकऱ्यांसाठी आम्ही मेरा देश मेरा खून’ राबवत आहोत. या देशाच्या स्वातंत्र्यासाठी हिंदू, मुस्लिम, दलित या सगळ्यानी बलिदान दिलंय.
हजारोंच्या संख्येने आयोध्येला जाणार - बच्चू कडू
आम्ही हजारोंच्या संख्येने अयोध्येला जाणार आहोत. या सरकारला बुद्धी दे ही प्रार्थना आम्ही प्रभू श्रीरामाकडे करु. शेतकऱ्यांचा विचार करणारं आणि त्यांच्या हिताचं सरकार यावं असं मागण आम्ही तिकडे मागू. अयोध्येमधील शहिदांचं स्मारक व्हावं. यासाठी देखील आम्ही जात आहोत, असं बच्चू कडू म्हणाले.
'आमचं आंदोलन सरकारच्या बाजूने की विरोधात हे त्यांनी शोधावं'
आमदार बच्चू कडू हे शेतकऱ्यांच्या मुद्द्यावरुन सातत्याने सरकारवर रोष व्यक्त करत असल्याचं पाहायला मिळत. यावेळी देखील त्यांनी याच मुद्द्यावर सरकारवर संताप व्यक्त केलाय. आम्ही जे आंदोलन सुरु केलंय ते सरकारच्या बाजूने आहे की त्यांच्या विरोधात हे सरकारने शोधावं. आम्ही मागणी करत आहोत. सरकारमध्ये आहे म्हणून मागणी करू नये असा काही कायदा नाही. सरकारला जर वाटत असेल हे आंदोलन त्यांच्या विरोधात आहे तर त्याची कोणतीही तमा आम्हाला नाही, असं म्हणत बच्चू कडू यांनी सरकारवर घणाघात केला.
बच्चू कडूंच्या या दौऱ्यामध्ये हजारो शेतकरी देखील सहभागी होणार असल्याचं सांगण्यात येत आहे. तसेच यासाठी राष्ट्रवादी किसान दलने आमंत्रित केल्याची माहिती यावेळी देण्यात आली. संत्राचा मुद्दा हा केंद्र सरकारचा आहे. बांग्लादेश संत्र्यावर आयात शुक्ल लावत असेल तर त्यांच्या मालावरही आपण लावावा, असं देखील बच्चू कडू यांनी म्हटलं.
हेही वाचा :
महत्त्वाच्या बातम्या
