प्रवरा नदीत बुडालेल्या दोघांचे मृतदेह सापडले, सहा जणांना जलसमाधी; अकोलेतील शोध मोहीम थांबली

SDRF boat capsizes in Pravara river : प्रवरा नदीत बुडालेल्या व्यक्तीचा शोध घेणारी एसडीआरएफची बोट उलटल्याची घटना गुरुवारी घडली होती. आता ठाणे टीडीआरएफच्या पथकाने दोन मृतदेह बाहेर काढले आहेत.

SDRF boat capsizes in Pravara river

अकोले : प्रवरा नदीत (Pravara River) बुडालेल्या व्यक्तीचा शोध घेणारी एसडीआरएफची बोट उलटल्याची (SDRF Boat Capsizes)  घटना गुरुवारी घडली होती. या घटनेमुळे परिसरात एकच खळबळ उडाली होती. बोट उलटल्याने तीन एसडीआरएफ (SDRF) जवानांचा मृत्यू झाला होता. तर दोन जणांचा शोध सुरु होता. आता दोन जणांचा मृतदेह सापडले आहेत. 

याबाबत अधिक माहिती अशी की, बुधवारी दुपारी अकोले (Akole) तालुक्यातील सुगाव बुद्रुक येथे प्रवरा नदीपत्रात पोहण्यासाठी गेलेले सागर पोपट जेडगुले (25) व अर्जुन रामदास जेडगुले (18) हे दोन तरुण बुडाले होते. सागर जेडगुले याचा मृतदेह बुधवारी सापडला होता. मात्र अर्जुन जेडगुले याचा शोध बुधवारी उशिरापर्यंत आढळला नाही. त्यामुळे तरुणाचा शोध घेण्यासाठी गुरुवारी एसडीआरएफचे पथक घटनास्थळी दाखल झाले होते. मात्र एसडीआरएफ पथकाची बोट उलटली. या पथकातील पाच जण आणि स्थानिक असे एकूण सहा जण प्रवरा नदी पात्रात बुडाले. यातील तीन जणांचे मृतदेह बुधवारी सापडले होते.  तर दोन जणांवर रुग्णालयात उपचार सुरु होता. मात्र अर्जुन जेडगुले आणि स्थानिक नागरिक गणेश मधुकर देशमुख (वाकचौरे) यांचा शोध गुरुवारी दिवसभर सुरु होता. 

प्रवरा नदीत बुडालेल्या दोघांचे मृतदेह सापडले

आता अर्जुन जेडगुले आणि गणेश देशमुख (वाकचौरे) यांचे मृतदेह सापडले आहेत. ठाणे येथील टीडीआरएफच्या (Thane TDRF) पथकाने दोनही मृतदेह बाहेर काढले आहेत. पाण्याचा विसर्ग कमी झाल्यानंतर दोन्ही मृतदेह सापडले. एकाचा मृतदेह घटनास्थळापासून जवळच तर दुसरा मृतदेह एक किमी अंतरावर सापडला आहे. या घटनेत एकूण सहा जणांचा मृत्यू झाला आहे. त्यामुळे अकोले (Akole) तालुक्यातील शोध मोहीम संपली आहे. 

सहा जणांना जलसमाधी, दोघांवर उपचार सुरु 

या घटनेत एकूण सहा जणांचा मृत्यू झाला आहे. सागर पोपट जेडगुले (25) व अर्जुन रामदास जेडगुले (18) हे दोघे नदीत पोहण्यासाठी आले होते. दोघांचे मृतदेह सापडले आहे. धुळे एसडीआरएफ बलगट क्रमांक 6 चे पोलीस उपनिरीक्षक प्रकाश शिंदे, पोलीस शिपाई वैभव वाघ व पोलीस शिपाई राहुल पावरा, आणि स्थानिक नागरिक गणेश मधुकर देशमुख (वाकचौरे), अशा एकूण सहा जणांचा मृत्यू झाला आहे. तर कॉन्स्टेबल पंकज पंढरीनाथ पवार, कॉन्स्टेबल अशोक हिंमतराव पवार यांना बाहेर काढण्यात यश आले होते. दोघांवर सध्या उपचार सुरु असून प्रकृती स्थिर आहे. 

पाण्याच्या भोवऱ्यात सापडल्याने बोट उलटली, प्रत्यक्षदर्शींची माहिती

नदीपात्रात बुडालेल्या तरुणांचा शोध घेण्यासाठी गुरुवारी सकाळी एसडीआरएफचे पथक गावात दाखल झाले. त्यांची शोध मोहीम साडेसहा वाजेच्या सुमारास सुरू झाली होती. एसडीआरएफ (SDRF) पथकाच्या दोन बोट पाण्यात उतरल्या. काही वेळाने एक बोट पाण्याच्या भोवऱ्यात सापडल्याने क्षणार्धात बोट उलटली. बुडालेल्या बोटीतील जवान पोहण्याचा प्रयत्न करीत होते. परंतु पाण्याच्या भोवऱ्यात अडकल्यामुळे त्यांना वरती येता आले नाही, असे  प्रत्यक्षदर्शी सुगाव गावचे पोलीस पाटील राजेंद्र शिंदे यांनी सांगितले.

आणखी वाचा