Ruckus in Gautami Patil Event : नगरमध्ये गौतमी पाटीलच्या कार्यक्रमात तुफान राडा, नोटांची उधळण; पोलिसांचा हुल्लडबाजांवर लाठीचार्ज

Ruckus in Gautami Patil Event : अहमदनगर जिल्ह्यातील राहाता इथे आयोजित गौतमी पाटीलच्या कार्यक्रमात तुफान राडा झाला. हुल्लडबाजांना आवरण्यासाठी पोलिसांचा लाठीचार्ज करावा लागला.

Gautami_Patil Show Ruckus

Ruckus in Gautami Patil Show : सोशल मीडिया स्टार गौतमी पाटील (Gautami Patil) आणि वाद हे समीकरण नवं राहिलेलं नाही. तिचा कोणताही कार्यक्रम वादाशिवाय पूर्ण होत नसल्याचे चित्र वारंवार समोर येतं. त्यातच आता गौतमी पाटीलच्या आणखी एका कार्यक्रमात तुफान राडा झाला आहे. अहमदनगर (Ahmednagar) जिल्ह्यातील राहाता (Rahata) इथे आयोजित कार्यक्रमात हा राडा झाला असून हुल्लडबाजांना आवरण्यासाठी पोलिसांचा लाठीचार्ज करावा लागला. त्यामुळे उपस्थित प्रेक्षकांची मात्र एकच पळापळ झाली आणि आयोजकांना कार्यक्रम आटोपता घ्यावा लागला. तर मोठ्या बंदोबस्तात गौतमीला कार्यक्रम स्थळावरुन बाहेर काढावे लागले.

राडा होण्याचं कारण काय?

अहमदनगर जिल्ह्यातील राहाता येथे गुरुवारी (23 फेब्रुवारी) रात्री गौतमी पाटीलच्या नृत्याचा कार्यक्रम बघण्यासाठी हजारोंच्या संख्येने प्रेक्षक उपस्थित होते. मात्र गौतमीचा डान्स सुरु होताच काही प्रेक्षकांनी तिच्यावर पैशांची उधळण सुरु केली. त्यामुळे गौतमीने नाराजी व्यक्त करत डान्स थांबवला आणि स्वतः माईक हातात घेत प्रेक्षकांना गोंधळ न करण्याची विनंती केली. गौतमीने डान्स थांबवल्याने प्रेक्षकांनी कल्ला करत तुफान राडा घातला. अतिउत्साही प्रेक्षकांना नियंत्रित करताना 60 बाऊन्सरसह आयोजकांची चांगलीच दमछाक झाली. 

बाऊन्सर आणि पोलिसांच्या सुरक्षेत गौतमी कार्यक्रम स्थळावरुन बाहेर

पोलिसांनी हस्तक्षेप करत गर्दीला शांत करण्याचा प्रयत्न केला. मात्र तरीही गोंधळ सुरुच राहिल्याने अखेर पोलिसांना लाठीचार्ज करावा लागला. यावेळी प्रेक्षकांची एकच धावपळ उडाली आणि आयोजकांना कार्यक्रम आटोपता घ्यावा लागला. एवढं होऊनही काही प्रेक्षकांनी गौतमी पाटील गाडीत बसत असताना तिच्या गाडीला घेराव घालत गोंधळ घातला अखेर बाऊन्सर आणि पोलिसांच्या गराड्यात गौतमी पाटील कार्यक्रम स्थळावरुन बाहेर पडली.

VIEO : Gautami Patil : गौतमी पाटीलच्या कार्यक्रमात तरुणांची हुल्लडबाजी, पोलिसांकडून लाठीचार्ज

नृत्याच्या शैलीमुळे गौतमी पाटील वादात

गेल्या काही महिन्यांपासून लावणी क्वीन गौतमी पाटीलची जोरदार चर्चा आहे. तिच्या कार्यक्रमांची चर्चा झाली नाही, असं कधी घडलेलं नाही. सुरुवातीला फारशी चर्चेत नसलेल्या गौतमीवर एका नृत्यादरम्यान केलेल्या अश्लील हावभावाने टीकेची झोड उठली. नंतर तिला अधिकच प्रसिद्धी मिळाली. तिच्या प्रसिद्धीमुळे तिला नृत्याच्या सुपाऱ्या देखील जास्त येऊ लागल्या. गौतमी पाटील तिच्या नृत्याच्या शैलीमुळे वादात अडकली होती. अश्लील हावभावामुळे गौतमी पाटीलने लावणीला बदनाम केल्याचा आरोप ज्येष्ठ लावणी कलावंतांनी तिच्यावर केला होता. या वादानंतर तिने माफी मागून असे प्रकार पुन्हा घडणार नसल्याचं म्हटलं होतं. परंतु एवढं सर्व घडत असताना तिची लोकप्रियता मात्र दिवसेंदिवस वाढतच आहे. 

हेही वाचा