Protein For Health : निरोगी शरीरासाठी प्रोटीन आवश्यक; रोज किती आणि कसे सेवन करावे? जाणून घ्या

Best Way To Consume Protein : केसांपासून डोळ्यांपर्यंत, वजन कमी करण्यापासून ते निरोगी त्वचा मिळवण्यापर्यंत प्रथिने (प्रोटीन) तुमच्या आरोग्यासाठी खूप महत्त्वाची असतात.

Best Way To Consume Protein

Best Way To Consume Protein : शरीरात प्रथिने (Protein) फार महत्वाची भूमिका बजावतात. यासाठी रोजच्या आहारात प्रथिनयुक्त पदार्थांचा समावेश करावा. यासाठी संतुलित आहार घ्यावा. ज्यामध्ये जीवनसत्त्वे, खनिजे, फायबर आणि प्रथिने यांचा समावेश होतो. प्रथिने आपले केस, त्वचा, स्नायू आणि डोळे निरोगी ठेवण्यास मदत करतात. प्रथिने अनेक रोगांपासून संरक्षण करतात. आपल्या शरीराचा प्रत्येक भाग तंदुरुस्त ठेवण्यासाठी प्रथिने आवश्यक असतात. अनेकांना रोजच्या आहारात किती प्रोटीनचा वापर करावा? याचे सेवन किती करावे तसेच प्रोटीनचे सेवन करण्याचा योग्य मार्ग कोणता? याबाबत त्यांना कल्पना नसते. या माध्यमातून जाणून घेऊयात प्रोटीनचे फायदे.   

शरीरासाठी प्रथिने (प्रोटीन) का महत्त्वाचे आहेत?

प्रोटीन आपल्या शरीरात बिल्डिंग ब्लॉक्स म्हणून काम करतात. प्रोटीनमुळे स्नायू मजबूत होतात. आपले डोळे, केस, स्नायू, त्वचा, हार्मोन्स आणि पेशींसाठी प्रोटीन आवश्यक असतात. प्रथिने पेशींची दुरुस्ती करण्यास मदत करतात आणि नवीन पेशी तयार होतात. आपण दररोज आपल्या आहारात काही प्रोटीनचा समावेश केला पाहिजे.

शरीरात प्रोटीनच्या कमतरतेमुळे काय होते?

प्रोटीनला तुमच्या आहाराचा भाग बनवा. जर तुमच्या शरीरात प्रोटीनची कमतरता असेल तर त्यामुळे तुम्हाला अनेक समस्या निर्माण होऊ शकतात. कमी प्रथिने आणि वाढत्या कर्बोदकांमधे आणि चरबीमुळे वजन वाढणे, लठ्ठपणा, हृदय आणि रक्तवाहिन्यासंबंधी रोग, मधुमेह यांसारखे आजार होतात. कमी प्रथिने घेतल्याने प्रतिकारशक्तीवरही परिणाम होतो. यामुळे तुम्हाला संसर्ग, सर्दी, खोकला यांसारखे आजार लवकर होतात. शरीराला आतून मजबूत बनवायचे असेल तर अन्नातील प्रोटीनचे प्रमाण वाढवा.

प्रोटीन कसे वापरावे?

तुम्ही दररोज तुमच्या आहारात प्रथिनयुक्त पदार्थांचा समावेश करू शकता. एका दिवसात भरपूर प्रोटीन घेऊ नका. जेवण आणि नाश्ता या माध्यमातून प्रोटीन घेतले तर तुमच्या शरीरात त्या प्रोटीनचा योग्य वापर होऊ शकतो. तुमच्या दिवसाच्या आहारात 1-2 प्रथिनयुक्त पदार्थांचा समावेश करा.

दररोज किती प्रोटीन खावे?

शरीराला प्रोटीनची गरज वेगवेगळी असते. तुमचे शरीर, वय, वजन, वैद्यकीय स्थिती यानुसार ते कमी-अधिक असू शकते. जर तुम्ही बॉडी बिल्डर असाल किंवा तुमचे वजन जास्त असेल तर तुम्ही दिवसातून 4 अंडी खाऊ शकता. त्याच वेळी, सामान्य व्यक्तीसाठी दिवसातून 1 अंडे खाणे पुरेसे आहे. मुलांना त्यांच्या वयानुसार प्रथिनेही दिली पाहिजेत. आपल्याला दररोज प्रथिने खाणे आवश्यक आहे. यासाठी आठवड्यातून 2-3 दिवस कडधान्ये खावीत, उरलेल्या दिवशी नाही. आपण आठवड्यातून 2-3 दिवस अंडी खावे आणि कॉटेज चीज 1-2 वेळा खावे. जर तुम्ही असा आहार घेतला नाही तर तुम्हाला प्रोटीन सप्लिमेंट्स घ्यावे लागतील.

'या' पदार्थांत असतात प्रोटीन : 

प्रथिनांसाठी तुम्ही अंडी, सोयाबीन, सोया दूध, दूध, दुग्धजन्य पदार्थ खाऊ शकता. याशिवाय डाळी, शेंगदाणे, पिस्ता, बदाम, अक्रोड, ओट्स, चिया सीड्स, एवोकॅडो, ब्रोकोली, मटार, चिकन, मासे यांसारख्या पदार्थांचा तुम्ही आहारात समावेश करू शकता. 

टीप : वरील सर्व बाबी एबीपी माझा केवळ माहिती म्हणून वाचक-प्रेक्षकांपर्यंत पोहोचवत आहे. यातून एबीपी माझा कोणताही दावा करत नाही. त्यामुळे कोणतेही उपचार, डाएट आणि औषधं तज्ज्ञांच्या सल्ल्यानं घ्यावीत.

महत्वाच्या बातम्या :