Santosh Juvekar News: संतोष जुवेकरच्या पायाला नेमकं झालंय काय? समोर आलेल्या फोटोमुळे चर्चांना उधाण
Entertainment News : मराठी अभिनेता संतोष जुवेकरच्या समोर आलेल्या फोटोमुळे चाहते हैराण, संतोष ठीक तर आहे ना? अशी चिंता चाहत्यांना लागली आहे.
Santosh Juvekar News: सध्या सोशल मीडियावर मराठी चित्रपटसृष्टीतील मराठी अभिनेता संतोष जुवेकरचा एक फोटो व्हायरल होत आहे. या फोटोमध्ये संतोष जुवेकरच्या उजव्या पायाला काहीतरी दुखापत झाल्याचं दिसतंय. त्यामुळे सध्या चाहते हैराण झाले आहेत. पण, संतोषच्या पायाला काहीच झालेलं नसून त्याच्या आगामी चित्रपटातील भूमिकेसाठी संतोषनं हा गेटअप केल्याचं समोर आलं आहे.
सिनेमांतल्या भूमिकांसाठी कलाकार काय-काय करत असतात? एखादं दृश्य खरं वाटावं यासाठी जीव ओतून मेहनत घेतात. काही कलाकार चित्रपटातील आपल्या कॅरेक्टरला योग्य न्याय देण्यासाठी कोणत्याही प्रकारची मेहनत किंवा रिस्क घ्यायला मागे पुढे पहात नाहीत. मराठीसोबतच हिंदीतही सक्रीय असणारा महाराष्ट्राचा लाडका अभिनेता संतोष जुवेकर याबाबतीत नेहमी आघाडीवर असतो. संतोषच्या नुकत्याच समोर आलेल्या फोटोवरुन तो त्याच्या आगामी चित्रपटासाठी किती मेहनत घेतोय, हे स्पष्ट होतंय.
आगामी 'रानटी' चित्रपटात शरद केळकरच्या बालपणीचा जिगरी मित्र 'बाळा'ची भूमिका अभिनेता संतोष जुवेकर साकारणार आहे. संतोषनं आपल्या भूमिकेसाठी चक्क संपूर्ण केसांचं टक्कल करून घेतलं आहे. तसेच, पायानं अपंग असणाऱ्या व्यक्तीची व्यक्तिरेखा साकारण्यासाठी खूप मेहनत घेतली आहे. प्रदर्शित झालेल्या पोस्टरवरून त्याचा खतरनाक अंदाज पाहायला मिळत आहे. पुनीत बालन स्टुडिओ निर्मित आणि समित कक्कड दिग्दर्शित 'रानटी' हा मराठीतला सगळ्यात मोठा अ‍ॅक्शनपट असणार आहे. हा चित्रपट 22 नोव्हेंबरला प्रेक्षकांच्या भेटीला येणार आहे.
अभिनेता संतोष जुवेकर त्याच्या दमदार भूमिकांसाठी ओळखला जातो. 'बाळा'च्या भूमिकेसाठी त्याला अनेक आव्हानांचा सामना करावा लागला, मेकअपच्या साथीनं भूमिकेला योग्य न्याय देण्यासाठी संतोषनं घेतलेली मेहनतही त्याच्या फोटोमधून दिसतेय. या गेटअपमध्ये धावण्यापासून ते अगदी अॅक्शन सीन करण्यापर्यंतची मेहनत घेत ही भूमिका संतोषनं साकारली आहे. या वेगळ्या भूमिकेचं आव्हान स्विकारत संतोषनं घेतलेली मेहनत 'रानटी' चित्रपटात दिसून येणार आहे.
आपल्या या भूमिकेबद्दल बोलताना संतोष जुवेकर म्हणाला की, "कोणतीही भूमिका एकरूप होऊन केली की, ती प्रेक्षकांपर्यंत सहजपणे पोहोचते, दिग्दर्शक समित कक्कडकडून मला नेहमी माझ्यातल्या अभिनयाला वाव देणाऱ्या भूमिका ऑफर झाल्या आहेत. त्याच्या चित्रपटात काम करण्यासाठी माझा उत्साह व्दिगुणीत होतो. भूमिकेचं सोनं करण्यासाठी मी वाट्टेल ती मेहनत घेतो. 'रानटी' चित्रपटातील माझी ही खलनायकी भूमिका प्रेक्षकांना 'बाळा'च्या प्रेमात पाडेल.
दरम्यान, 'रानटी' चित्रपटासाठी हृषिकेश कोळी यांचं लिखाण, अजित परब यांचं संगीत, अमर मोहिले यांचं पार्श्वसंगीत, एझाज गुलाब यांची साहसदृष्ये, सेतु श्रीराम यांचं छायाचित्रण, आशिष म्हात्रे यांचं संकलन अशी भक्कम तांत्रिक बाजू असलेली टीम चित्रपटाला लाभलेली आहे.
महत्त्वाच्या बातम्या
ट्रेंडिंग न्यूज
