एक्स्प्लोर

Satvya Mulichi Satavi Mulgi : टेलिव्हिजन विश्वातील सर्वात मोठं रहस्यमय लग्न; अद्वैत-नेत्रा लवकरच अडकणार लग्नबंधनात

Satvya Mulichi Satavi Mulgi : 'सातव्या मुलीची सातवी मुलगी' या मालिकेत 3 ते 8 जुलै दरम्यान अद्वैत आणि नेत्राचा लग्नसोहळा पार पडणार आहे.

By : एबीपी माझा एंटरटेनमेंट डेस्क | Edited By: मंजिरी पोखरकर | Updated at : 02 Jul 2023 02:48 PM (IST)

Satvya Mulichi Satavi Mulgi

Satvya Mulichi Satavi Mulgi Marathi Serial Latest Update : 'सातव्या मुलीची सातवी मुलगी' (Satvya Mulichi Satavi Mulgi) ही छोट्या पडद्यावरील लोकप्रिय मालिका आहे. अल्पावधीतच ही मालिका प्रेक्षकांच्या पसंतीस उतरली आहे. आता या मालिकेत अद्वैत आणि नेत्राचा लग्नसोहळा पार पडणार आहे.

टेलिव्हिजन विश्वातील सर्वात मोठं रहस्यमय लग्न

अद्वैत आणि नेत्राचा 3 ते 8 जुलै दरम्यान शाही थाटात लग्नसोहळा पार पडणार आहे. हे लग्न टेलिव्हिजन विश्वातील सर्वात मोठं रहस्यमय लग्न असणार आहे. मालिका सध्या अद्वैत-नेत्राच्या लग्नासंबंधीच्या रहस्यमय वळणावर आली असून अव्दैत आणि नेत्राच्या लग्नाचं रहस्य काय असणार आहे, याची उत्सुकता प्रेक्षकांना आहे.

नेत्राला त्रिनयना देवीचं वरदान असल्यामुळे नेत्राने अद्वैतबरोबर लग्नाचा निर्णय घेतल्यापासून त्रिनयना देवी तिच्या निर्धाराची परीक्षा पाहत आहे. राजाध्यक्ष कुटुंब मात्र कितीही अडथळे आले तरी अद्वैत-नेत्राचं लग्न होणारच, अशी इच्छा मनात बाळगून आहे. लग्नात येणाऱ्या अडथळ्यांमुळे शेखर हतबल होतो, अद्वैत-नेत्राचं लग्न निर्विघ्नपणे पार पडावं यासाठी तो साधूंना भेटतो. तेव्हा साधू शेखरला काही अटी सांगतात.

1. हे लग्न त्रिनयना देवीच्या मंदिरात व्हायला हवं.

2. भर माथ्यावर सूर्य असताना व्हायला हवं, गावातील कोणीही हे लग्न पाहू नये.

3. फक्त पाच व्यक्ती लग्नाच्या वेळी मंदिरात असाव्यात.

4. लग्नाच्या दिवशी वावोशी गावात कुणाचा जन्म आणि मृत्यू होता कामा नये.

या अटी ऐकून शेखर आश्चर्यचकीत होतो. तो घरी येऊन सर्व कुटुंबाला हे सांगतो, घरातील सगळे या अटी पूर्ण करण्याच्या निमित्ताने एकत्र येतात. सगळे मिळून योजना आखतात. अटींचं पालन करत येणाऱ्या अडथळ्यांवर मात करत मंदिरापर्यंत पोहोचतात.

नेत्राच्या घरातील मंगला आणि भालबा आणि दुसऱ्या बाजुला राजाध्यक्ष कुटुंब असे सगळे एकत्र येऊन फक्त पाचजण लग्नाच्या दिवशी मंदिरात जायचं ठरवतात. आता या पाच व्यक्ती कोण, अव्दैत-नेत्राच्या लग्नाचं रहस्य काय, अव्दैत-नेत्राचं लग्न सर्व अटी पाळून नीट पार पडेल का, नेत्रा त्रिनयना देवीने घेतलेल्या परीक्षेला खरी उतरेल का, अव्दैत नेत्राला या कठीण प्रसंगात कशी साथ देणार, या सर्व रहस्यमय घडामोडी एक आठवडाभर प्रेक्षकांना पहायला मिळणार आहेत.

टेलिव्हिजन विश्वातील हे रहस्यमय लग्न त्रिनयना देवीच्या मंदिरात कसं पार पडणार आहे. 'सातव्या मुलीची सातवी मुलगी' या मालिकेचा विवाह विशेष सप्ताह भाग 3 ते 8 जुलै रात्री 10.30 वाजता पार पडणार आहे.

संबंधित बातम्या