Rakesh Maria Biopic : माजी पोलीस आयुक्त राकेश मारियांचा बायोपिक येणार! रोहित शेट्टी करणार दिग्दर्शन
Rakesh Maria Biopic : हा बायोपिक राकेश मारिया यांच्या यशस्वी कारकिर्दीतील अनुभवांवर आधारित असेल आणि स्वत: रोहित शेट्टी या चित्रपटाचं दिग्दर्शन करणार आहे.
Rakesh Maria Biopic : ‘सिंघम’, ‘सिम्बा’, ‘सूर्यवंशी’सारख्या ‘कॉप’ चित्रपट तयार करणारा बॉलिवूडचा प्रसिद्ध दिग्दर्शक रोहित शेट्टी (Rohit Shetty) आता खऱ्याखुऱ्या पोलीस अधिकाऱ्याच्या आयुष्यावर आधारित चित्रपट बनवणार आहे. रोहित शेट्टी याने नुकतीच त्याच्या आगामी नव्या चित्रपटाची घोषणा केली आहे. माजी पोलीस आयुक्त राकेश मारिया (Rakesh Maria) यांच्या आयुष्यावर आधारित बायोपिकचे दिग्दर्शन रोहित शेट्टी करणार आहे. रोहित शेट्टी आणि रिलायन्स एंटरटेनमेंटने (Reliance Entertainment) या चित्रपटासाठी हातमिळवणी केली आहे.
हा आगामी बायोपिक राकेश मारिया यांच्या यशस्वी कारकिर्दीतील अनुभवांवर आधारित असेल आणि स्वत: रोहित शेट्टी या चित्रपटाचं दिग्दर्शन करणार आहे.
अभिमान वाटतो!
नव्या चित्रपटाची घोषणा करताना, निर्माता आणि दिग्दर्शक रोहित शेट्टी म्हणाला की, ‘राकेश मारिया, असा माणूस ज्याने 36 वर्षे या गुन्हेगारी विश्वाचा सामना केला. 1993चा मुंबईतील बॉम्बस्फोट, अंडरवर्ल्ड धोक्यापासून ते 2008मध्ये 26/11च्या मुंबई दहशतवादी हल्ल्यापर्यंतचा त्यांचा हा प्रवास अविश्वसनीय आहे. या खऱ्याखुऱ्या आयुष्यातील सुपर कॉपच्या धाडसी आणि निर्भय प्रवासाला पडद्यावर साकारताना खरोखरच अभिमान वाटतो आहे.’
कोण आहेत राकेश मारिया?
आयपीएस अधिकारी राकेश मारिया यांनी 1981च्या बॅचमधून सिव्हिल सर्व्हिस परीक्षा उत्तीर्ण केली. 1993 मध्ये पोलिस उपायुक्त (वाहतूक) म्हणून, त्यांनी मुंबई साखळी बॉम्बस्फोट प्रकरणाचा छडा लावला आणि नंतर ते मुंबई पोलिसांचे DCP (गुन्हे शाखा) आणि नंतर सह पोलिस आयुक्त (गुन्हे शाखा) झाले. राकेश मारिया यांनी 2003मधील गेटवे ऑफ इंडिया आणि झवेरी बाजार या दुहेरी बॉम्बस्फोट प्रकरणाचीही उकल केली. 2008मध्ये 26/11च्या मुंबई हल्ल्याच्या तपासाची जबाबदारीही मारिया यांना देण्यात आली होती. त्यांनी जिवंत पकडलेला एकमेव दहशतवादी अजमल कसाब याची चौकशी केली आणि या प्रकरणाचा तपास यशस्वी झाला.
ही एक मौल्यवान संधी!
राकेश मारिया यांनी या चित्रपटाविषयी बोलताना म्हटले की, ‘हा प्रवास पुन्हा एकदा जगायला मिळणं रोमांचकारी असणार आहे. विशेषत: रोहित शेट्टी सारख्या प्रतिभाशाली दिग्दर्शकाने हा चित्रपट हाती घेणं कौतुकाचं आहे. नॉस्टॅल्जियापेक्षा, खडतर आव्हानांना आणि सर्व अडचणींना तोंड देणाऱ्या मुंबई पोलिसांचे असामान्य कार्य लोकांसमोर मांडण्याची ही एक मौल्यवान संधी असणार आहे.’
हेही वाचा :
महत्त्वाच्या बातम्या
