कंगना रनौत आज मुंबई पोलिसांसमोर हजर राहण्याची शक्यता; शीख संघटनेने दाखल केली होती तक्रार

Kangana Ranaut : अभिनेत्री कंगना रनौत आज खार पोलीस ठाण्यात हजर राहण्याची शक्यता आहे.

कंगना रनौत आज मुंबई पोलिसांसमोर हजर राहण्याची शक्यता; शीख संघटनेने दाखल केली होती तक्रार

Kangana Ranaut statement on Sikh Community :  बॉलिवूड अभिनेत्री कंगना रनौत आज मुंबई पोलिसांसमोर हजर राहण्याची शक्यता आहे. कंगना बुधवारी खार पोलीस ठाण्यात जाऊन आपला जबाब नोंदवणार होती. मात्र, काही कारणास्तव ती पोहचू शकली नाही. त्यामुळे आज सकाळी 11 वाजेपर्यंत कंगना खार पोलीस ठाण्यात दाखल होऊ शकते. 

शीख समुदायाच्या तक्रारीवर एफआयआर

दिल्लीच्या सीमेवर सुरू असलेल्या शेतकऱ्यांच्या आंदोलनावर कंगनाने टीका केली होती. ही टीका करताना तिने या आंदोलनाचा संबंध एका फुटीरतावादी संघटनेशी असल्याचे सांगितले. त्यानंतर शीख संघटनांनी मागील महिन्यात खार पोलीस ठाण्यात कंगना रणौत विरोधात तक्रार दाखल केली होती. 

पोलिसांनी या महिन्याच्या सुरुवातीला कंगनाला चौकशीसाठी नोटीस बजावली होती. त्यानंतर कंगनाच्या वकिलाने ती 22 डिसेंबर रोजी पोलिसांसमोर उपस्थित राहील असे कोर्टात सांगितले होते. बुधवारी कंगनाच्या वकिलाने इतर दिवशी हजर राहण्याची परवानगी मागितली होती. 

शीख संघटनेने केलेल्या तक्रारीवर खार पोलिसांनी कंगनाविरोधात एफआयआर दाखल केला होता. या एफआयआरविरोधात कंगनाने या हायकोर्टात धाव घेतली होती. पोलिसांनी कंगनाविरोधात 25 जानेवारी 2022 पर्यंत कोणतीही कारवाई करणार नसल्याचे म्हटले होते. 

कंगनाने सोशल मीडियावर दिल्लीच्या सीमेवर सुरू असलेले शेतकरी आंदोलन हे खलिस्तानी आंदोलन असल्याचे म्हटले होते. शेतकऱ्यांच्या आंदोलनात पंजाबमधील शेतकऱ्यांचा मोठा सहभाग होता. कंगनाच्या या टिप्पणीनंतर शीख संघटनांकडून कंगनाविरोधात तक्रार दाखल करण्यात आली. 

इतर महत्त्वाच्या बातम्या:

LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोडी पाहा लाईव्ह - ABP Majha