Raju Srivastava Health Update : राजू श्रीवास्तव यांची प्रकृती चिंताजनक; अद्याप शुद्धीवर नाही, जवळच्या नातेवाईकांची एबीपी न्यूजला माहिती

Raju Srivastava : राजू श्रीवास्तव एम्स रुग्णालयात दाखल असून त्यांची प्रकृती चिंताजनक आहे.

Raju Srivastava

Raju Srivastava Health Update : विनोदवीर राजू श्रीवास्तव (Raju Srivastava) यांची प्रकृती अधिकच बिघडत चालल्याची माहिती समोर येत आहे. त्यांच्यावर एम्स रुग्णालयात उपचार सुरू आहेत. त्यांची प्रकृतीत लवकर सुधारणा व्हावी यासाठी चाहते प्रार्थना करत आहेत. राजू श्रीवास्तव अजूनही व्हेंटिलेटरवर असून त्यांची प्रकृती चिंताजनक असल्याची माहिती समोर आली आहे. 

राजू श्रीवास्तव यांच्या जवळच्या नातेवाईकांनी एबीपी न्यूजला माहिती दिली आहे की,"राजू श्रीवास्तव अद्याप शुद्धीवर आलेले नाहीत. त्यांच्या मेंदूला आलेली सूज अजूनही कमी झालेली नाही. त्यांच्यावर उपचार सुरू असून त्यांना शुद्धीवर आणण्यासाठी डॉक्टर सर्वतोपरी प्रयत्न करत आहेत. राजू श्रीवास्तव अजूनही व्हेंटिलेटरवर असून त्यांची प्रकृती चिंताजनक आहे. राजूच्या प्रकृतीत लवकर सुधारणा व्हावी यासाठी त्यांच्या कुटुंबियांसह चाहतेदेखील प्रार्थना करत आहेत". 

व्यायाम करताना आला हृदयविकाराचा झटका

राजू श्रीवास्तव दिल्लीतील एका हॉटेलमध्ये ट्रेडमिलवर व्यायाम करत होते. पण अचानक त्यांची प्रकृती खालावली आणि जमिनीवर कोसळले. त्यानंतर लगेचच राजू श्रीवास्तव यांना दिल्लीतील एम्स रुग्णालयात दाखल करण्यात आले. राजू अजूनही व्हेंटिलेटरवर असून त्यांची प्रकृती चिंताजनक आहे. 

राजू श्रीवास्तव यांची पत्नी शिखा श्रीवास्तव याआधी राजू यांच्या प्रकृतीसंदर्भात माहिती देत म्हणाल्या होत्या,"राजूजींची प्रकृती स्थिर आहे. डॉक्टर त्यांचे काम चोखपणे करत आहेत. राजूजी लवकरात लवकर बरे व्हावेत यासाठी संपूर्ण व्यवस्थापन दिवसरात्र काम करत आहे. आमचा त्यांच्यावर पूर्ण विश्वास आहे. राजूजी हे लढवय्ये आहेत, ते ही लढाई नक्कीच जिंकतील. ते लढतील आणि तुम्हा सर्वांचे मनोरंजन करण्यासाठी बरे होऊन परत येतील, हे माझे तुम्हा सर्वांना वचन आहे. आम्हाला शुभेच्छा, आशीर्वाद मिळत आहेत आणि बरेच लोक त्यांच्या आरोग्यासाठी प्रार्थना करत आहेत. मी सर्वांना प्रार्थना करत राहण्याचे आवाहन करू इच्छिते".

'मैंने प्यार किया' आणि 'बाजीगर' या सिनेमांत राजू श्रीवास्तव यांनी काम केलं आहे. तसेच  'बिग बॉस 3', 'नच बलिए' आणि 'कॉमेडी नाइट्स विद कपिल' या कार्यक्रमामध्ये देखील राजू यांनी सहभाग घेतला होता. राजू यांनी करिअरची सुरुवात स्टेज शोमधून केली. अनेक चित्रपट आणि मालिकांमध्ये राजू यांनी काम केलं. राजू यांच्या कॉमिक टायमिंगला प्रेक्षकांची पसंती मिळते. राजू यांचा चाहता वर्ग मोठा आहे. सोशल मीडियावर देखील राजू अॅक्टिव्ह असतात. 

संबंधित बातम्या