Chandrakant Patil : काल म्हणाले भाजप मुख्यमंत्रीपदी नवीन चेहऱ्यांना संधी देते, आज मात्र चंद्रकांत पाटील यांनी चक्क हातच जोडले!
Chandrakant Patil : पुण्यात काल बोलताना चंद्रकांत पाटील यांनी मुख्यमंत्रीपदी नवीन चेहराही असू शकतो असं विधान केलं होतं. मात्र आज चंद्रकांत पाटील यांनी पत्रकारांना हात जोडत निघून जाणं पसंत केलंय.
Chandrakant Patil पुणे: राज्यात विधानसभा निवडणुका पार पडल्या त्यामध्ये महायुतीने अभूतपूर्व यश मिळवलं. त्यानंतर आता महायुतीमध्ये मुख्यमंत्री पदासाठी रस्सीखेच सुरू झाली आहे. महायुतीमध्ये मुख्यमंत्री पद हे देवेंद्र फडणवीसांकडे जाणार असल्याचे जवळजवळ निश्चित झाल्याचे बोलले जात आहे. अद्यात दिल्लीतील पक्षश्रेष्ठींकडून त्याबाबतचं कोणतंही जाहीर वक्तव्य आलं नसलं तरीदेखील मुख्यमंत्री पदाचे प्रबळ दावेदार म्हणून फडणवीसांकडे पाहिलं जातं आहे, अशातच आता मुख्यमंत्री पदावरून नाराजीनाट्य देखील सुरू असल्याच्या अनेक चर्चा आहेत.
दरम्यान, पुण्यात कालच बोलताना चंद्रकांत पाटील (CHandrakant Patil) यांनी मुख्यमंत्रीपदी नवीन चेहराही असू शकतो असं विधान केलं होतं. त्याबाबत ते आज काय बोलणार अशी उत्सुकता असताना चंद्रकांत पाटील यांना याबाबत प्रश्न विचारण्याचा प्रयत्न केला असता, चंद्रकांत पाटील यांनी पत्रकारांना हात जोडत निघून जाणं पसंत केले. मी दाताच्या ट्रीटमेंटला शहरात आलो होतो. अशी पुष्टी त्यांनी जोडली. यावेळी पिंपरी चिंचवडमधल्या सर्वच जागा महायुतीने जिंकल्यानंतर आज भाजप नेते चंद्रकांत पाटील यांनी अजित पवार गटाचे पिंपरीचे आमदार अण्णा बनसोडे यांच्या कार्यालयाला सदिच्छा भेट दिली. त्यावेळी ते बोलत होते.
मुख्यमंत्री पदावर प्रश्न करताच
आपला नेता मुख्यमंत्री व्हावा यासाठी महायुतीतील नेते, पदाधिकारी आणि कार्यकर्ते आग्रही असल्याचं चित्र आहे. राज्याच्या मुख्यमंत्रीपदी देवेंद्र फडणवीस बसावेत यासाठी आता भाजपकडून सुद्धा देव पाण्यात ठेवण्यात येत आहेत. पुण्यात देवेंद्र फडवणीस मुख्यमंत्री व्हावेत यासाठी भाजप कार्यकर्त्यांकडून सारसबाग गणपतीला होम हवन आणि आरती करण्यात आली आहे. मंत्री चंद्रकांत पाटील शहराध्यक्ष धीरज घाटे यांच्यासह कार्यकर्त्यांकडून गणपती बाप्पाची आरती करण्यात आली.
राज्यात महायुतीमध्ये सरकारमध्ये देवेंद्र फडवणीस हेच मुख्यमंत्री व्हावेत यासाठी कार्यकर्त्यांकडून प्रार्थना करण्यात आली आहे. "पुन्हा या पुन्हा या देवेंद्रजी पुन्हा या" असं म्हणत भाजप कार्यकर्त्यांकडून पुण्यात होम हवन करण्यात आलं आहे. कोथरूडचे नवनिर्वाचित आमदार चंद्रकांत पाटील देखील होम हवनला उपस्थित होते. यावेळी चंद्रकांत पाटील यांनी मुख्यमंत्रीपदी नवीन चेहराही असू शकतो असं विधान केलं होतं. मात्र आज त्यांना याबाबत प्रश्न केला असता त्यांनी अधिक बोलणं टाळले आहे.
महत्त्वाच्या बातम्या
