तीन वृद्ध महिलांचा एकाच घरात संशयास्पद मृत्यू, दापोलीतील घटना
या तीन महिलांच्या एकाच घरात संशयास्पद मृत्यू झाल्याची धक्कादायक घटना घडली आहे. या प्रकरणी पोलीस अधिकचा तपास करत आहेत.
रत्नागिरी : दापोली तालुक्यातील वणौशीतील खोतवाडी येथील एकाच घरातील वृद्ध महिलांचा जळून मृत्यू झाल्याची घटना शुक्रवारी समोर आली आहे. या घटनेने अवघा दापोली तालुका हादरून गेला असून दापोली पोलीस या घटनेचा अधिक तपास करत आहेत.
दापोली पालगड रोडवरील वणौशी या गावांमध्ये खोतवाडी आहे. या खोतवाडी मध्ये सुमारे पस्तीस घरे असली तरी बहुतांशी घरे ही बंद अवस्थेत आहेत. येथील बहुतांश ग्रामस्थ हे कामधंद्याच्या निमित्त मुंबई येथे स्थलांतरित झालेले आहेत. गावांमध्ये केवळ चार ते पाच कुटुंबच वास्तव्याला आहेत. गावातच एका घरामध्ये सत्यवती पाटणे (वय 75), पार्वती पाटणे (वय 90) या वृद्ध महिला राहत होत्या. तर त्यांच्या समोरच्या घरात त्यांच्याच नातेवाईक असलेल्या इंदुबाई पाटणे (वय 85) या राहायला होत्या.
सध्या दापोलीत थंडीचे दिवस असल्याने त्या घराची दारं-खिडक्या बंद करून राहत असत. दररोज सकाळी त्या उन्हामध्ये बसत असत. त्यांच्या घराच्या समोर त्यांचे कुलदैवताचे मंदिर आहे. तेथे पूजा करण्याकरिता विनायक पाटणे हे दररोज सकाळी येतात. त्यांना शुक्रवारी सकाळी या महिला बाहेर उन्हामध्ये बसलेल्या दिसून आल्या नाहीत. शिवाय त्यांना मंदिराची किल्ली देखील हवी होती. म्हणून ते किल्ली मागण्यांकरिता या महिलांच्या घरामध्ये गेले. मात्र आतून काही प्रतिसाद आला नाही.
त्यांनी घराच्या मागील बाजूचा दरवाजा लोटून पाहिला असता तो त्यांना उघडा असलेला आढळून आला. त्यांनी तो लोटून पहिला असता त्यांना त्या वृद्ध महिला जळलेल्या रक्ताच्या थारोळ्यात पडलेल्या आढळल्या. त्यांनी ही बाब ग्रामस्थांना सांगितली. ग्रामस्थांनी येऊन खातरजमा केली असता घरामध्ये तीन खोल्यांमध्ये तीन महिला मृतावस्थेत आढळून आल्याचे त्यांना दिसून आले. त्यांनी ही घटना तत्काळ त्यांचे मुंबईतील नातेवाईकांना कळवली. हे नातेवाईक शुक्रवारी सायंकाळी मुंबई दापोली येथे येऊन दाखल झाले. त्यानंतर दापोली पोलीस स्थानकाचे पोलीस निरीक्षक नितीन ढेरे हे देखील आपल्या अधिकाऱ्यांसोबत शुक्रवारी सायंकाळी घटनास्थळी रवाना झाले. शुक्रवारी रात्री उशिरापर्यंत या घटनेची नोंद करण्याचे काम पोलीस स्थानकात सुरू होते.
या महिला ज्या घरांमध्ये मृतावस्थेत आढळून आल्या त्या घराचा पुढील दरवाजा का बंद होता व मागील दरवाजा उघडा होता. त्यातील सत्यवती पाटणे या पडवीमध्ये चुलीच्या जवळ मृतावस्थेत जळलेल्या अवस्थेत आढळून आल्या. त्यांचे डोके फुटून त्यातून बरेच रक्त देखील वाहून गेल्याचे दिसून येत होते. शिवाय पार्वती पाटणे या अनेक वर्ष जागेवरच असल्याने त्या दुसऱ्या खोलीमध्ये जळलेल्या अवस्थेमध्ये आढळून आल्या. इंदुबाई पाटणे या त्यांच्या समोरच्या घरात राहणाऱ्या त्यांच्या दुसऱ्या नातेवाईक होत्या. त्या या दोन महिलांच्या घरातील हॉलमध्ये मृतावस्थेत आढळून आल्या. शिवाय या घराचा दरवाजा आतल्या बाजूने बंद होता. यामुळे संशय व्यक्त करण्यात येत आहे. दापोली पोलीस या घटनेचा अधिक तपास करत आहेत.
महत्त्वाच्या बातम्या :
महत्त्वाच्या बातम्या
