Palghar : प्रेयसीच्या घरच्यांचा प्रेमसंबंधाला विरोध, भांडणा-भांडणात प्रियकराने प्रेयसीच्या डोक्यात दगड घातला अन् मृतदेह फेकून दिला
Palghar Crime : प्रियकराने डोक्यात दगड घालून प्रेयसीची निर्घृण हत्या केल्याची खळबळजनक घटना पालघर मधील मुरबे येथे घडली आहे. हत्या करून फरार झालेल्या तरुणाला पोलिसांनी अटक केली आहे.
पालघर: प्रेयसीच्या घरातून प्रेमसंबंधाला विरोध असल्याचं कारण मनात ठेवून रागाच्या भरात प्रियकराने प्रेयसीच्या डोक्यात दगड घालून तिची निर्घृण हत्या केल्याची धक्कादायक घटना पालघर तालुक्यातील मुरबे येथे घडली आहे. स्नेहा पुरुषोत्तम चौधरी (वय 19) वर्षे असे हत्या झालेल्या तरुणीचे नाव आहे. तर प्रियकराचं नाव सुमित तांडेल (वय 21) असं नाव आहे. आरोपी प्रियकर प्रेयसीची हत्या करून फरार झाला होता. सोमवारी संध्याकाळी सातपाटी येथून त्याला पोलिसांनी अटक केली.
स्नेहा चौधरी आणि तिचा प्रियकर सुमित तांडेल हे मुरबे या एकाच गावात राहणारे असून तारापूर औद्योगिक वसाहतीमधील कारखान्यात काम करत होते. सोमवारी सकाळी नेहमीप्रमाणे सकाळी 8 वाजेच्या सुमारास दोघेही आपापल्या घरातून कामावर जाण्यासाठी निघाले. पण मध्येच कुंभवली गावाजवळ रस्त्यात दोघांमध्ये भांडण सुरू झाले. या भांडणादरम्यान सुमितने स्नेहाच्या डोक्यावर दगडाने वार करून तिला रक्तबंबाळ केले.
या दरम्यान तिथे जमलेल्या नागरिकांना दोघांचे भांडण सोडवण्याचा प्रयत्न केला. या दरम्यान स्नेहाला उपचारासाठी रुग्णालयात घेऊन जातो असे सांगून सुमित तांडेल हा स्नेहा हिला दुचाकीवर बसवून एकलारे गावाजवळील खाडीच्या खाजण परीसरात घेऊन गेला.
मृतदेह खाजन परिसरात सापडला
दोघांमध्ये भांडण झाल्याची माहिती परिसरातील नागरिकांनी मुलीचे कुटुंबीय आणि पोलिसांना दिल्यानंतर बोईसर पोलिसांनी स्थानिक नागरिकांसह खाजन परीसरात शोधमोहीम सुरू केली. दुपारी 2 वाजेच्या सुमारास स्नेहा चौधरी हिचा मृतदेह खाजन परीसरात सापडला. लाल रंगाचे कपडे आणि काळ्या रंगाची बॅग यावरून तिची ओळख पटविण्यात आली.
यानंतर बोईसर पोलिसांनी तत्काळ तपासाची चक्रे फिरवत खून करून पसार झालेला आरोपी सुमित तांडेल याला सातपाटी येथून ताब्यात घेऊन अटक केली आहे. तर स्नेहाचा मृतदेह शविच्छेदनासाठी तारापूर प्राथमिक आरोग्य केंद्रात नेण्यात आला आहे. याप्रकरणी पोलिस अधीक्षक बाळासाहेब पाटील, उपविभागीय पोलीस अधिकारी विकास नाईक यांच्या मार्गदर्शनाखाली पोलीस निरीक्षक शिरीष पवार हे अधिक तपास करीत आहेत.
स्नेहाच्या कुटुंबीयांचा प्रेमसंबंधाला विरोध
स्नेहा चौधरी आणि सुमित तांडेल हे मुरबे येथे शेजारी शेजारी राहत होते. स्नेहा हिच्या मोठ्या बहिणीचा तीन दिवसांपूर्वीच साखरपुडा पार पडला होता तर स्नेहा आणि सुमित यांच्या प्रेमसंबंधास स्नेहाच्या कुटुंबीयांचा मोठा विरोध होता. त्याच रागातून सुमित याने स्नेहाची हत्या केली असल्याचा संशय पोलिसांनी व्यक्त केला.
ही बातमी वाचा:
महत्त्वाच्या बातम्या
ट्रेंडिंग न्यूज
