एक्स्प्लोर

मोठी बातमी : घाटकोपर होर्डिंग दुर्घेटनेतील आरोपी भावेश भिंडे कुटुंबासह फरार, पोलिसांकडून शोध सुरू

Who is Bhavesh Bhinde : घाटकोपर दुर्घेटनेतील आरोपी भावेश भिंडे कुटूंबाला घेऊन फरार झाल्याची मोठी माहिती समोर आली आहे.

By : विनायक पाटील, एबीपी माझा | Edited By: स्नेहल पावनाक | Updated at : 14 May 2024 09:14 PM (IST)

Ghatkopar Hoarding Accident Accused Bhavesh Bhinde absconded

मुंबई : घाटकोपर होर्डिंग दुर्घटनेतील (Ghatkopar Hoarding Accident) आरोपी भावेश भिंडे (Bhavesh Bhinde) फरार झाल्याची मोठी बातमी समोर आली आहे. घाटकोपर दुर्घेटनेतील आरोपी भावेश भिंडे कुटूंबाला घेऊन फरार झाल्याची माहिती समोर आली आहे. आरोपी भावेश भिंडे याचा आता पोलिसांकडून शोध सुरू आहे. भावेश भिंडे मुलूंड पश्चिमेला आशिष टॅावरमध्ये रहायला होता. (Who is Bhavesh Bhinde responsible for Ghatkopar Hoarding Falls)

आरोपी भावेश भिंडे फरार

मुंबईतील घाटकोपर येथे द्रुतगती मार्गावरील पंतनगर येथे असलेल्या पेट्रोल पंपावर 13 मे रोजी वादळी वाऱ्यामुळे मोठा जाहिरातीचा फलक कोसळून भीषण दुर्घटना घडली. या प्रकरणात भावेश भिंडे आरोपी असून त्याच्यावर सदोष मनुष्यवधाचा गुन्हा दाखल करण्यात आला आहे.

घाटकोपर होर्डिंग दुर्घटनेत 14 जणांचा मृत्यू

मुंबईतील घाटकोपरमध्ये होर्डिंग कोसळून सोमवारी मोठी दुर्घटना घडली. होर्डिंग दुर्घटनेत 14 जणांचा मृत्यू झाला आहे, तर होर्डिंगखाली अडकलेल्या 88 जण जखमी झाले आहेत. 43 जणांवर रुग्णालयात उपचार सुरु आहे. घाटकोपरच्या पोलीस मैदानावरील पेट्रोल पंपावर 250 टन वजनाचे बेकायदेशीर जाहिरात होर्डिंग अचानक वादळानंतर कोसळलं. या दुर्घटनेमुळे अनेक जणांचे संसार उघड्यावर पडले आहेत.

सदोष मनुष्यवधाचा गुन्हा दाखल

घाटकोपरमधील पंतनगर येथील पेट्रोल पंपावर 120 बाय 120 आकाराचा मोठा होर्डिंग कोसळला. घाटकोपर होर्डिंग दुर्घटनेत 14 निष्पाप लोकांनी आपला जीव गमावला. या प्रकरणात आरोपी भावेश भिंडे सह इतर काही जणांवर 304, 338, 337, 34 कलम अंतर्गत गुन्हा दाखल करण्यात आला आहे. पंतनगर पोलिसांकडून भावेश भिंडेचा शोध सुरु असून तो सध्या फरार असल्याचं समोर आलं आहे. भावेश भिंडे कुटुंबासह गायब झाला आहे.

कोण आहे भावेश भिंडे? (Who is Bhavesh Bhinde)

भावेश भिंडे हा इगो मीडियाचा संचालक आहे. याच मीडिया कंपनीचं हे होर्डिंग होतं. यामुळे त्याच्यासह इतरांवर गुन्हा दाखल करण्यात आला आहे. 2009 मध्ये भावेश भिंडेने अपक्ष निवडणूक लढवली होती. त्याने निवडणूक आयोगाला दिलेल्या शपथपत्रात त्याच्यावर 26 गुन्हे दाखल असल्याचं नमूद करण्यात आलं आहे. विनापरवाना साईन बोर्ड लावल्याप्रकरणी भावेश भिंडेवर हे गुन्हे दाखल केल्याची माहिती आहे.