जळगावमध्ये सुलेमान खानची टोळक्याकडून निर्घृण हत्या, मृतदेह घरासमोर फेकला अन् आई-वडिलांनाही बेदम मारलं
Jalgaon Crime: त्यांनी संतापाच्या भरात मयताच्या आई-वडिलांसह बहिणीलाही निर्दयतेने मारहाण केली. या घटनेनंतर गावात भीती आणि संतापाचे वातावरण निर्माण झाले आहे.
Jalgaon Crime: जामनेर तालुक्यात घडलेल्या एका थरकाप उडवणाऱ्या घटनेत सुलेमान खान (वय 21) या तरुणाची टोळक्याने अमानुष पद्धतीने हत्या केली. 10-15 जणांच्या टोळक्याने तरुणाची अमानुष मारहाण करून हत्या केली. तडफडत असताना त्याला वैद्यकीय मदत न देता, थेट मृत्यूच्या दाढेत ढकलले. एवढ्यावरच थांबता न, आरोपींनी त्याचा मृतदेह मूळ गावी आणून घरासमोर फेकला आणि त्याच्या आई-वडिलांसह बहिणीलाही बेदम मारहाण केली. या प्रकारामुळे परिसरात तणावाचे वातावरण निर्माण झाले आहे. (Crime news)
बीडप्रमाणेच निर्घृण मारहाण
मृत सुलेमानच्या कुटुंबीयांनी सांगितले की, संतोष देशमुख यांच्या बीडमधील हत्येप्रमाणेच सुलेमानलाही निर्दयतेने मारहाण करण्यात आली. टोळक्यातील 10-15 जणांनी सुलेमानला चारचाकीत बसवून तीन-चार वेगवेगळ्या ठिकाणी नेऊन लाठ्या-काठ्यांनी, रॉडने आणि हातपायांनी मारहाण केली. मारहाणीच्या सततच्या फेरीनंतर, आरोपींनी शेवटी त्याला त्याच्या मूळ गावी आणले. गावात आल्यावर आरोपींनी सुलेमानचा मृतदेह थेट त्याच्या घरासमोर फेकून दिला. एवढ्यावरच आरोपी थांबले नाहीत. त्यांनी संतापाच्या भरात मयताच्या आई-वडिलांसह बहिणीलाही निर्दयतेने मारहाण केली. या घटनेनंतर गावात भीती आणि संतापाचे वातावरण निर्माण झाले आहे.
कुटुंबीयांची मागणी ‘इन कॅमेरा’ शवविच्छेदन
सुलेमानला ज्या प्रकारे मारहाण करण्यात आली त्याबाबत कुटुंबीयांनी गंभीर आरोप केले आहेत. त्यांनी पोलीस व प्रशासनाकडे ‘इन कॅमेरा’ शवविच्छेदन करण्याची मागणी केली होती, जेणेकरून मृतदेहावरील जखमांचे आणि अमानुषतेचे स्वरूप स्पष्टपणे नोंदवता येईल. कुटुंबीयांच्या मागणीनुसार, जिल्हा रुग्णालय, जळगाव येथे पोलिस बंदोबस्तात शवविच्छेदनाची प्रक्रिया सुरू आहे.
मकोका अंतर्गत कारवाईची मागणी
कुटुंबीयांनी बीडप्रमाणेच या प्रकरणातील आरोपींवर महाराष्ट्र संघटित गुन्हेगारी नियंत्रण कायद्यानुसार (मकोका) कठोर कारवाई करण्याची मागणी केली आहे. त्यांनी सांगितले की, अशा टोळक्यांना कायद्याचा धाक बसण्यासाठी कठोर शिक्षा होणे आवश्यक आहे. तसेच, या मागणीसाठी जिल्हाधिकाऱ्यांमार्फत गृहमंत्री देवेंद्र फडणवीस यांना निवेदन पाठविण्यात येणार आहे. घटनेनंतर पोलिसांनी तातडीने परिसरात बंदोबस्त वाढवला असून, आरोपींचा शोध सुरू आहे. स्थानिक पोलिसांसह गुन्हे शाखा या प्रकरणाचा तपास करत आहे. प्राथमिक चौकशीत वैयक्तिक वादातून ही घटना घडल्याचे संकेत मिळत आहेत, मात्र तपास पूर्ण होईपर्यंत पोलिसांनी कोणतेही ठोस कारण जाहीर केलेले नाही. जामनेरमधील या अमानुष घटनेमुळे जिल्ह्यात खळबळ उडाली असून, गावकऱ्यांसह सर्वसामान्य नागरिकांत संतापाचे वातावरण आहे. आता या प्रकरणात आरोपींना किती कठोर शिक्षा होते, याकडे सर्वांचे लक्ष लागले आहे.
हेही वाचा
महत्त्वाच्या बातम्या
