Bhiwandi Crime News : भिवंडीत भाजप युवा मोर्चाच्या पदाधिकाऱ्याला धारदार शस्त्राने वार करुन संपवलं, शरद पवार गटाचे खासदार बाळ्या मामांवर गंभीर आरोप
Bhiwandi Crime News : भिवंडीतील खारबाव-चिंचोटी रस्त्यावरील खार्डी गावात दोन तरुणांची धारदार शस्त्राने निर्घृण हत्या करण्यात आली.
Bhiwandi Crime News : भिवंडी (Bhiwandi) तालुक्यातील खारबाव-चिंचोटी रस्त्यावरील खार्डी गावात रात्री दोन तरुणांची धारदार शस्त्राने निर्घृण हत्या करण्यात आली. या घटनेत भाजप युवा मोर्चाचे जिल्हा उपाध्यक्ष प्रफुल्ल तांगडी (Praful Tangdi) आणि त्यांचे सहकारी तेजस तांगडी (Tejas Tangdi) यांचा मृत्यू झाला. हत्या घडल्याच्या ठिकाणी तात्काळ मोठा पोलीस बंदोबस्त तैनात करण्यात आला असून, परिसरात तणावपूर्ण शांतता आहे. व्यावसायिक कारणातून ही हत्या झाल्याचा प्राथमिक अंदाज पोलिसांनी व्यक्त केला आहे. या घटनेनंतर प्रफुल्ल तांगडी यांच्या कुटुंबीयांनी मृतदेह घेण्यास केला नकार दिला आहे. तसेच राष्ट्रवादी शरद पवार गटाचे खासदार सुरेश म्हात्रे उर्फ बाळ्या मामा यांच्यावर देखील प्रफुल्ल तंगडी यांच्या कुटुंबीयांनी गंभीर आरोप केलाय.
मृतदेह ताब्यात घेण्यास कुटुंबियांचा नकार
हत्या झाल्यानंतर प्रफुल्ल तांगडी यांच्या कुटुंबीयांनी मृतदेह स्वीकारण्यास नकार दिला आहे. "जोपर्यंत सर्व आरोपी अटकेत घेतले जात नाहीत, तोपर्यंत मृतदेह घेतला जाणार नाही," अशी स्पष्ट भूमिका त्यांनी घेतली आहे. तांगडी कुटुंबीयांनी 11 जणांवर संशय व्यक्त केला असून, भिवंडी तालुका पोलीस ठाण्यात त्यांच्या विरोधात गुन्हा दाखल करण्यात आला आहे.
पूर्वीही झाला होता हल्ला, पोलिसांवर दुर्लक्षाचा आरोप
या घटनेला एक गंभीर पार्श्वभूमी आहे. तीन वर्षांपूर्वीही प्रफुल्ल तांगडी यांच्यावर जीवघेणा हल्ला झाला होता, मात्र पोलिसांनी त्यावेळी योग्य ती कारवाई केली नाही, असा आरोपही कुटुंबीयांनी केला आहे. त्यामुळे पोलिसांच्या कार्यप्रणालीवरही प्रश्नचिन्ह उपस्थित करण्यात आले आहे.
बाळ्या मामा यांच्यावर गंभीर आरोप
तसेच, राष्ट्रवादी काँग्रेस (शरद पवार गट) पक्षाचे भिवंडी लोकसभा मतदारसंघाचे खासदार सुरेश म्हात्रे उर्फ बाळ्या मामा यांनी आरोपींना सोडवण्यासाठी हस्तक्षेप केल्याचा गंभीर आरोप देखील प्रफुल्ल तांगडी यांच्या कुटुंबीयांनी केला आहे. या आरोपामुळे राजकीय वर्तुळात एकच खळबळ उडाली आहे.
नेमकं काय घडलं?
भिवंडीतील भाजप युवा मोर्चाचे जिल्हा उपाध्यक्ष प्रफुल्ल तांगडी हे JD टी इंटरप्रायझेस या आपल्या कार्यालयात दोन सहकाऱ्यांसोबत बसले असताना, रात्री सुमारे 11 वाजण्याच्या सुमारास अज्ञात हल्लेखोरांनी त्यांच्यावर तलवार आणि चाकूने प्राणघातक हल्ला केला. हल्ल्यानंतर प्रफुल्ल आणि त्यांचा सहकारी तेजस तांगडी हे दोघेही रक्ताच्या थारोळ्यात कोसळले. त्यांना तात्काळ रुग्णालयात नेण्यात आले, मात्र डॉक्टरांनी दोघांनाही मृत घोषित केले. या घटनेमुळे संपूर्ण परिसरात भीतीचे वातावरण निर्माण झाले असून, मृतदेह पोस्टमार्टमसाठी पाठवण्यात आले आहेत. प्राथमिक तपासात चार ते पाच हल्लेखोरांनी एकत्रितपणे हल्ला केल्याची माहिती समोर आली आहे. हल्ल्याचं नेमकं कारण अद्याप स्पष्ट झालेलं नसून, पोलिसांकडून तपास सुरू आहे. प्रफुल्ल तांगडी हे भाजप युवा मोर्चाचे जिल्हा उपाध्यक्ष म्हणून सक्रिय होते. त्यांच्या हत्येच्या घटनेने राजकीय वर्तुळात एकच खळबळ उडाली आहे.
आणखी वाचा
महत्त्वाच्या बातम्या
